Sister Andrea Muñoz Spannaus

Fesoasoani Lua i le Au Peresitene Aoao o Tamaitai Talavou

A o laiti ma nonofo i Atenitina, sa auai Andrea Veronica Muñoz ma lona uso matua i se aoga Katoliko. E lei iloa lava e i laua isi aoaoga faalelotu seia oo ina iva tausaga o Andrea. O le taimi lena na amata ai e faifeautalai o le Au Paia o Aso e Gata Ai ona aoao lona aiga e uiga i le talalelei toefuataiina.

E lei leva ona uma le lesona a faifeautalai ma o ese atu, ae faamalamalama atu e le tina o Andrea e sili atu nai lo le na o le tasi le lotu. Sa fesili Andrea i lona tina po o le a le lotu sa ia manatu e sili ona avea ma sui o le Atua. Sa tali atu lona tina, “Ou te manatu o le lotu lenei”—O Le Ekalesia a Iesu Keriso o le Au Paia o Aso e Gata Ai, lea faatoa aoaoina ai i latou e faifeautalai.

I lona olaga atoa, sa “manao lava Andrea e faafiafia le Atua,” o lea sa popole ai o ia i le taliaina o se faatuatuaga fou. Peitai, sa na o ni nai minute lava na i ai le lagona, ma sa suia i se manao e aoao atili e uiga i le Ekalesia.

Sa papatisoina le aiga, “ma sa matou amataina se olaga fou,” o le tala lea a Sister Spannaus. “Sa matuai matagofie lava le ala na suia ai lo matou olaga faaleaiga mo i matou uma.”

Na soifua mai Andrea Veronica Muñoz Spannaus i le aso 18 o Me, 1968, i Buenos Aires, Atenitina, ia Carlos Alberto Muñoz ma Elida Menicucci. Sa soifua ae o ia i Béccar, Atenitina. Sa faaipoipo o ia ia Alin Spannaus i le Malumalu o Buenos Aires Atenitina ia Oketopa 1992. O i la’ua o ni matua o se fanau teine e toalua.

Sa maua e Sister Spannaus se faailoga i aoaoga o le popofou o le tamaitiiti, ma sa ia suesueina mamanu o faatufugaga i totonu. O loo galue o ia i le taimi nei i le aufono faufautua aoao a le Aualofa. Talu ai nei, sa ia auauna atu ai i le Eria o Amerika i Saute i Saute mo le Komiti o Konafesi O Le Malosi o le Autalavou, i le Komiti o le Konafesi a le MMA Iuta Latino, ma faatasi ai ma lona toalua o se taitai o le Misiona a Mekisiko Cuernavaca.

Sa ia auauna atu foi o se peresitene o le Aualofa, Tamaitai Talavou, ma le Peraimeri a le uarota, faiaoga seminare i le vaveao, faufautua o le uarota a talavou nofofua matutua faaSipaniolo, ma se faifeautalai i le Misiona a Atenitina Resistencia.