Elder Ahmad S. Corbitt

Fai mai Elder Ahmad S. Corbitt o le auauna atu i le lalolagi atoa o se fesoasoani i le Au Peresitene Aoao o Alii Talavou na fesoasoani e aumaia i lona valaauga fou “se tomai sili atu e faalogo ai i taitaiga faaperofeta ma faaaposetolo ma faatonuga ma le faaeteetega tele ma le faatuatua.”

O le valaauina e auauna atu i le Au Peresitene Aoao o Alii Talavou ia Aperila 2020, na faaalu ai e Elder Corbitt le tolu tausaga talu ai e galulue ai ma isi taitai o le autalavou e faamalolosia le tupulaga faia’e ma valaaulia i latou ina ia auai malosi i le galuega o le faaolataga ma le faaeaga.

“Ou te le manatu o lou lagona o le faanatinati e faamalosia le tupulaga faia’e o le a faaitiitia,” o lana tala lea. ”O le a avea i latou ma ni taitai sili atu nai lo i tatou aua o le a latou tuputupu ae ma avanoa e faia ai le galuega o le faaolataga ma le faaeaga i auala maualuluga atu ma paia atu.”

Na soifua mai Ahmad Saleem Corbitt, 60, i le aso 16 Aokuso, 1962, ia James Earl Corbitt ma Amelia Corbitt, i Philadelphia, Penisilevania, ISA. I lona aso fanau lona 18, na auai ai Ahmad i le Ekalesia, ma mulimuli atu i lona tina ma nai ona tei i le vai o le papatisoga. Sa papatisoina lona tamā fai i le tausaga na sosoo ai.

Ina ua uma le Kolisi o Ricks (lea ua avea nei ma Brigham Young University–Idaho), ma auauna i le Misiona a Puerto Rico San Juan mai le 1982 i le 1984, sa feiloai i la’ua ma Jayne Joslin i se malaga a le autalavou matutua nonofofua i le malumalu. Sa faaipoipo le ulugalii ia Aokuso 1985 i le Malumalu o Washington D.C. O i laua o ni matua o se fanau e toaono.

E i ai faailoga o Elder Corbitt mai le mea ua avea nei ma Iunivesite o Stockton i New Jersey ma mai le Aoga Faaloia a le Iunivesite o Rutgers. Sa ia auauna atu o se peresitene o le Misiona a Tominiko Ripapelika Santo Domingo Sasae, peresitene o le siteki, fesoasoani i au peresitene o siteki e toalua, ma se fautua maualuga.

Sa galue Elder Corbitt o se loia mo faamasinoga, i sootaga lautele faalemalo, o se faatonusili o le Ofisa a le Ekalesia i Niu Ioka o Mataupu Lautele ma Faavaomalo, ma se tagata tomai faapitoa i le misiona a le eria.