Elder J. Kimo Esplin

I ni nai masina talu ona maea lana misiona, sa i ai Elder J. Kimo Esplin i se faalavelave tau taavale lea na maliu ai lona tamā. I ni nai masina mulimuli ane, faatasi ai ma lona tina o loo nofo i ona tafatafa, sa so’a lana taavale mai tua. Sa taavalevale le taavale, ma sa maliliu ai lona tina ma si ona tei.

E ui lava i mala ma faanoanoaga na ia oo i ai, ae ua manatu Elder Esplin lava ia, ua faamanuiaina o ia. Ua ia faamati’e atu lena lagona i le Alii ma Lona agalelei ma le alofa mutimutivale.

“Sa lelei le olaga,” o lana tala lea.

O se tasi o ana faaupuga e sili ona fiafia i ai o le “E le o faia e le Alii ia te oe; O loo Ia faia mo oe.”

O le taunuuga o le maliliu ai o ona matua, sa tofu saosao ona tuafafine matutua ma auina atu o ia e suesue i fafo i le Nofoaga Autu o le Iunivesite o Brigham Young i Ierusalema. O iina, sa ia feiloai ai ia Kaye Davis.

Na avea le toalua lea o se uo lelei a o tolauapi le latou vaega i le toafa o Sinai, faigaluega i toga fa’i, ma suesue faatasi le Feagaiga Tuai ma le Feagaiga Fou.

Ina ua toe foi mai i Provo, Iuta, sa amata ona la tafafao faamasani. Sa la faaipoipo i le Malumalu o Sate Leki ia Tesema 1985. E toavalu le la fanau.

Sa soifua mai Jon Ross Kimo Esplin i le aso 18 Aokuso, 1962, i Kahuku, Hawaii, ISA. O ia o le ui’i—ma na o ia lava le tama—o le fanau e toavalu a Ross S. ma Olive Moody Esplin.

Sa maua e Elder Esplin se faailoga i le faatausitusi mai le Iunivesite o Brigham Young i le 1987. Ina ua mavae ona siitia atu lona aiga i Sikako, Ilinoi, sa amata lana galuega i teugatupe faafaigaluega ma maua ai se faailoga o le matuaofaiva i pulega faapisinisi.

Ina ua avea Elder Esplin ma sui peresitene ma taitai sili o mea tautupe mo le Huntsman Corporation, sa toe siitia le aiga mo sina taimi puupuu i Peleseuma a o lei faamautu i Cottonwood Heights, Iuta.

O Elder Esplin, o se Fitugafulu Eria i le taimi o lona valaauga o se Fitugafulu o le Pulega Aoao, sa auauna atu o se peresitene o le misiona i Misiona a Iapani Tokyo ma Iapani Tokyo i Saute. A o avea ma se faifeautalai faamisiona talavou, sa ia auauna atu i le Misiona a Kobe Iapani. Sa ia auauna atu foi o se peresitene o le siteki, fautua maualuga, ma se epikopo.