Aoao Atu, Aoao Mai, ma le Faaaogaina o Savali mai le Konafesi Aoao

O fesili nei e mafai ona fesoasoani i faiaoga ao latou fuafua e faaaoga se savali o le konafesi aoao e aoao atu. Pe a manaomia ai, e fefautuaai faiaoga ma le au peresitene o le korama a toeaina po o le au peresitene o le Aualofa a o latou mafaufau loloto i nei fesili.

• Aisea na filifili ai e le au peresitene o le korama a toeaina po o le Aualofa lenei savali e talanoaina? O le a se mea latou te faamoemoe o le a iloa ma faia e tagata pe a uma ona talanoaina lenei savali?

• O le a se mea o finagalo le failauga ia malamalama ai tagata? O a ni mataupu faavae o le talalelei o loo ia aoao mai? E faapefea ona faatatau nei mataupu faavae i la’u korama po o le Aualofa?

• O a mau na faaaoga e le failauga e lagolago ai lana savali? O i ai nisi mau e mafai ona faitau e tagata o le a loloto ai lo tatou malamalama? (Atonu e te ono mauaina nisi i vaefaamatalaga o le savali pe i le Taiala i Tusitusiga Paia [scriptures.ChurchofJesusChrist.org].)

• O a ni fesili e mafai ona ou fai atu o le a fesoasoani ai i tagata o le Ekalesia e mafaufau loloto ai ma faaaoga aoaoga o i le savali? O a fesili o le a fesoasoani ia i latou e iloa ai le taua o le savali i o latou olaga, i o latou aiga, ma i le galuega a le Alii?

• O le a se mea e mafai ona ou faia e valaaulia ai le Agaga i la matou sauniga? O le a se mea e mafai ona ou faaaogaina e faalautele ai le talanoaga, e aofia ai tala, tala faafaataoto, musika, po o faatufugaga? O le a le mea na faia e le failauga e fesoasoani ai i tagata ia malamalama i lana savali?

• Pe na tuuina mai e le failauga se valaaulia? E mafai faapefea ona ou fesoasoani i tagata ia lagona le manao e faatino na valaaulia?

E tele ni auala e mafai ona fesoasoani atu ai faiaoga i tagata e aoao mai ma faaaoga savali o le konafesi aoao. O ni isi nei o nai faataitaiga; atonu o i ai ni isi ‘aitia a faiaoga o le a sili ona aoga i le korama a le au toeaina po o le Aualofa.

• Faaaoga upumoni i o tatou olaga. Valaaulia tagata e toe iloilo le savali o le konafesi ma vaavaai mo upumoni e mafai ona fesoasoani ia i latou e faataunuu ai le galuega ua tuuina atu e le Atua ia i latou o ni tagata taitoatasi po o se korama a toeaina po o le Aualofa. Mo se faataitaiga, o le a se mea ua tatou aoaoina e mafai ona fesoasoani ia i tatou o ni ē auauna atu? o ni matua? o ni faifeautalai o le au paia? E faapefea e lenei savali ona faatosinaina o tatou mafaufauga, lagona, ma faatinoga?

• Talanoa i vaega. Vaevae tagata i ni vaega laiti, ma atofa atu i vaega taitasi ni vaega eseese o le savali o le konafesi e faitau ma talanoaina. Ona fai atu lea i vaega taitasi e faasoa mai se upumoni na latou maua ma pe faapefea ona faatatau ia i latou. Pe e mafai foi ona e fatuina ni vaega o tagata o le au paia o e sa suesue i vaega eseese o le savali ma tuu atu ia i latou e fefaasoaai i le tasi ma le isi mea na latou mauaina.

• Tagai mo ni tali o fesili. Valaaulia tagata e tali i fesili e pei o fesili nei e uiga i le savali o le konafesi: O a ni upumoni o le talalelei o tatou mauaina i lenei savali? E mafai faapefea ona tatou faaaogaina nei upumoni? O a valaaulia ma faamanuiaga folafolaina na tuuina atu? O le a se mea o aoao mai e lenei savali ia i tatou e uiga i le galuega o loo finagalo le Atua tatou te faia? Pe fatu ni nai au lava fesili e uunaia ai tagata o le au paia e mafaufau loloto e uiga i le savali pe faaaoga upumoni o loo aoao mai ai. Faataga tagata e filifili se tasi o nei fesili ma sue tali i le savali.

• Faasoa atu faamatalaga mai le savali. Valaaulia tagata e faasoa mai ni upusii mai le savali o le konafesi lea na musuia ai i latou e faataunuu o latou tiutetauave i le galuega o le faaolataga ma le faaeaga. Uunaia i latou e mafaufau pe mafai faapefea ona latou faasoa atua nei upusii e faamanuia ai se isi tagata, e aofia ē pele ia i latou ma tagata latou te auauna atu i ai.

• Faasoa atu se lesona faitino. Ia muai valaaulia ni nai tagata e aumai ni mea faitino mai le fale e mafai ona latou faaaogaina e aoao atu ai e uiga i le savali o le konafesi. I le taimi o le sauniga, fai atu i tagata e faamatala mai pe faapefea ona fesootai na mea faitino i le savali ma pe faapefea ona faatatau le savali i o latou olaga.

• Saunia se lesona e aoao atu i le fale. Fai atu i tagata e galulue i ni paga e fuafua ai se lesona o le afiafi faaleaiga e faatatau i le savali o le konafesi. E mafai ona latou taliina fesili faapenei: E mafai faapefea ona tatou faia le savali ia talafeagai i o tatou aiga? E mafai faapefea ona tatou faasoa atua lenei savali i tagata tatou te auauna atu i ai?

• Fefaasoaai aafiaga. Faitau faatasi ni isi o faamatalaga mai le savali o le konafesi. Fai atu i tagata e faasoa mai ni faataitaiga mai tusitusiga paia ma mai i o latou olaga lea e faapupula ai pe faamalosia ai le aoaoga faavae lea na aoaoina i nei faamatalaga.

• Sue se fasifuaitau. Valaaulia tagata e saili i le savali o le konafesi, e vaavaai ai mo fuaitau lea e taua ia i latou. Fai atu ia i latou e faasoa mai ni fasifuaitau ma mea sa latou aoaoina mai ai. Fai atu ia i latou e faasoa mai pe faapefea ona fesoasoani nei aoaoga ia i latou e faataunuu ai le galuega a le Alii.

Mo nisi manatu i le auala e suesue ma aoao atu ai mai savali o le konafesi aoao, tagai i “Manatu mo le Aoao Mai ma le Aoao Atu mai le Konafesi Aoao.” (Kiliki “Manatu mo Suesuega” i lalo o le “Konafesi Aoao” i le Gospel Library.)