“Ania Kita aron Magtinabangay,” Liahona, Hunyo 2023.
Mga Hulagway sa Hugot nga Pagtuo
Ania Kita aron Magtinabangay
Ang Ginoo misangkap sa akong panginahanglan. Gipanalangin Niya kanako ang akong panimalay ug ang tanang butang nga anaa sa sulod niini.
Mga litrato pinaagi ni Richard M. Romney
Leonard: nahimo ko nga usa ka palainom. Wala koy balay. Ang akong sinina mao ra gihapon kada adlaw. Matulog ko sa kasagbotan ug mokaon og mga pinunit gikan sa basurahan. Wala koy naangkon bisan unsa o bisan kinsa.
Elder Olsen: Giunsa nimo sa pagkausab?
Leonard: Nakahukom ko nga mag-ampo. Nangayo ko sa Ginoo og tabang, ug mao nga nakakaplag ko og kusog nga hunungon ang pag-inom. Kanunay kong naghunahuna mahitungod sa Ang Simbahan ni Jesukristo sa mga Santos sa Ulahing mga Adlaw. Mibati ko nga gihangop didto kaniadto. Naghunahuna ko nga basin makakaplag ko pag-usab og paglaom didto.
Elder Olsen: Giingnan ko nimo nga nagsugod kang mibati og mga pagdasig.
Leonard: Oo, ang Ginoo miagak kanako, ug dihang misunod ko Niya, misugod Siya sa pagpanalangin kanako.
Elder Olsen: Giunsa sa mga lokal nga lider sa pagtabang nimo?
Leonard: Na-excommunicate ko, apan gitabangan ko nila nga makasabot unsay kinahanglan nakong buhaton, ug makabuhat sa unsay angay nakong buhaton aron makabalik ko sa hingpit nga pakigdait. Sa hinay-hinay, ako nakalampos ra niini. Ang adlaw nga nabunyagan ko og balik maoy labing malipayon nga adlaw sa akong kinabuhi.
Elder Olsen: Karon nagpuyo ka diha ra gyod sa ubos sa bungtod gikan sa atong chapel [sa Dennehotso Branch meetinghouse sa Kayenta, Arizona, USA]. Ang imong balay usa ka gamay nga trailer, nga walay kuryente ug walay gripo, apan nag-ingon ka nga gikonsiderar nimo ang imong kaugalingon nga suwerte?
Leonard: Ang Ginoo misangkap sa akong panginahanglan. Gipanalangin Niya kanako kining panimalay ug ang tanang butang nga anaa sa sulod niini. Nalipay ko nga nakaangkon og hilom nga dapit diin makatuon ko sa mga kasulatan ug mag-ampo. Ang akong igsoon nga babaye nagpuyo sa duol, ug didto ko magkuha og tubig. Usahay kon magkinahanglan ko og kuryente, iya kong kutayan og kuryente gikan sa iyang balay.
Elder Olsen: Sa unsa nga mga paagi pa nga ang ebanghelyo mipanalangin kanimo?
Leonard: Ang Ginoo mipakita kanako nga adunay kahulogan kining kinabuhi. Butang kana nga nawala kanako sulod sa katuigan. Karon gusto kong motabang sa ubang mga tawo, sama sa Iyang pagtabang nako.
Elder Olsen: Akong nakita nga nagtabang ka sa mga tawo sa tanang panahon. Sa miaging adlaw, gitabangan nimo ang usa ka babaye kansang sakyanan nalubong sa balas.
Leonard: Duna lang koy kauban nga ubang miyembro sa Simbahan ug may mga pala. Gisugdan namo sa pagkabkab ug pagtulod. Wala madugay nakapadayon na siya sa iyang padulngan.
Elder Olsen: Sultihi ko bahin sa panahon dihang kanunay kang mibati og pagdasig nga mobisita sa imong pag-umangkon nga babaye, kinsa nagpuyo pipila ka milya ang gilay-on sa Farmington, New Mexico?
Leonard: Wa ko kasiguro nganong miingon ko nga moadto, apan nahibalo ko nga gusto sa Ginoo nga moadto ko.
Elder Olsen: Mao nga, gibuhat nimo unsay giaghat, nakakita ka og paagi unsaon nga makaabot didto, ug miabot ka sa tukma gayod nga panahon aron mahatag ang pipila ka dinaliang tabang nga gikinahanglan.
Leonard: Ang Ginoo nahibalo nga nagkinahanglan siya og tabang, ug nahibalo Siya nga ako makatabang niya.
Elder Olsen: Sa imong calling sa kapangulohan sa branch, mitabang ka nako sa mga buluhaton sa pagpangalagad, mga miting, mga kalihokan sa branch, ug sa programa sa Simbahan aron mamaayo ug maulian gikan sa pagkaadik. Unsay imong ikasulti kon dunay mangutana nimo, “Unsaon nimo sa paghigugma ang imong silingan?”
Leonard: Sa tibuok nakong kasingkasing.
Elder Olsen: Unsaon nimo sa pagpakita kana nga gugma?
Leonard: Ibalik lamang nako og hatag ang unsay gihatag sa Ginoo kanako. Ang mga tawo nagkinahanglang mobati nga gihigugma. Nagkinahanglan silang mobati og kahupay. Nagkinahanglan sila og giya. Nagkinahanglan sila nga makasabot kon unsay ikahatag sa Ginoo kanila. Kon naa ka sa kahiladman sa lungag, kinahanglan kang mobati nga inig kab-ot nimo, dunay tawo didto nga mobira.
Elder Olsen: Nagpuyo ka sa gamay nga trailer, apan ang imong kasingkasing sama kadako sa lapad kaayo nga wanang. Nagpuyo kang mapaubsanon, nga walay kalibotanong mga kabtangan. Apan ikaw sama kang Kristo, kanunay nga nagtabang niadtong mga nagkinahanglan.
Leonard: Mao kana nganong nia ta dinhi, di ba? Aron magtinabangay.
Si Leonard nagpuyo sa gamayng trailer nga walay kuryente o gripo, apan gikonsiderar niya ang iyang kaugalingon nga bulahan.
Nalingaw si Leonard sa pagbaton og hilom nga panimalay diin siya makatuon sa mga kasulatan.
Si Elder Olsen (dapit sa wala), usa ka pangserbisyo nga misyonaryo kinsa nagserbisyo nga presidente sa branch, naghisgot sa mga panginahanglan ngadto ni Leonard, kinsa nagserbisyo isip iyang unang magtatambag.
Sa unsang paagi nga gihigugma ni Leonard ang iyang isigkatawo? “Sa tibuok nakong kasingkasing,” miingon siya.
Si Leonard ug lain pang miyembro sa Simbahan mitabang sa usa ka babaye kansang sakyanan nalubong sa balas.
“Diha sa mga kasulatan,” miingon si Leonard, “atong nakat-onan nga kon kita nag-alagad sa uban, kita nag-alagad sa Dios” (tan-awa sa Mosiah 2:17).
Ang meetinghouse sa Dennehotso Branch sa Kayenta, Arizona, diin si Leonard nagserbisyo sa kapangulohan sa branch.