Ang Kahadlok Nakababag ba sa Dalan sa Imong Relasyon sa Dios?

Ako migahin sa kadaghanan sa akong kinabuhi nga nagpuyo sa emosyonal nga pagdistansya gikan sa mga tawo nga akong gimahal. Malingaw ko nga makahigala, apan ako wala gayod makat-on unsaon sa pagtugot sa mga tawo nga mahimong kabahin gayod sa akong kinabuhi—kana nagkinahanglan sa pagpaambit sa inyong mga pagbati ug sa mas personal nga paagi kay sa akong komportable nga himoon.

Sa milabay nga katuigan ako nasakitan sa huyang, naguba, ug napakyas nga mga relasyon. Mao nga ang risgo sa pagsulti sa akong mga pagbati aron masuod ngadto sa mga tawo kanunay nga gibati nga makuyaw. Dugay ko nga nakadawat niini, apan usa sa akong labing dakong kahadlok mao nga ako dili igo alang sa usa ka tawo nga importante nako ug mahimong biyaan.

Karong bag-o ako nakaamgo nga usahay ako makasinati niining maong kahadlok nga pagkabiniyaan diha sa akong relasyon sa Dios.

Kon ako mobasa sa mga kasulatan kon unsa ka kasaligan ang Dios, ako motuo niini. Apan sa gutlo nga ako kinahanglan nga mosalig Kaniya, mobati ko og gamay nga kahadlok ug nakapugong nako sa pagsalig sa hingpit. Si Presidente Thomas S. Monson (1927–2018) naghulagway niini nga pagbati: “Dunay mga panahon nga kamo makasinati og mga pagsulay ug panlimbasog. Tingali dunay mga panahon nga mobati kamo nga nahimulag—gani napalayo—gikan sa Tighatag sa matag maayo nga gasa. Nabalaka kamo nga kamo nag-inusara. Ang kahadlok mopuli sa pagtuo.”¹

Samtang akong gitun-an ang paagi nga ang kahadlok makaapekto sa akong mga relasyon, akong nadiskobrehan ang pipila ka kamatuoran nga nakatabang nako nga mas makaatubang sa kahadlok aron ako makabaton og paglaom ug makapadayon sa pagpalig-on sa akong relasyon uban Kaniya ug sa uban.

Kitang tanan gusto og segurado, masaligong mga relasyon sa kinabuhi, ilabi na uban sa Langitnong Amahan. Apan usahay ang kahadlok makababag sa pagtugot sa atong mga kaugalingon sa paghangop sa potensyal nga panaghigalaay, mahangtorong mga kauban, ug gani sa Langitnong Amahan. Mobati kita nga nahulga sa tanang matang sa butang, apan kasagaran sa panahon ang labing dako nga kahadlok moabot gikan sa panglantaw nga ang uban nagpahilayo gikan kanato—o nga sila sa umaabot mopahilayo.

Nakita nako ang akong kaugalingon nga naghinam-hinam nga naghulat sa usa ka tawo nga akong giganahan nga mo-text nakog balik. Kanunay nakong gitan-aw ang akong selpon, naglaom nga sila motubag—ug mabalaka kon sila dili motubag! Sa ubang higayon ako dili makataronganon nga mohukom nga ang relasyon sa pagpakig-date dili makatumbas sa emosyonal nga risgo nga masakitan o mapakyas, mao nga kini akong gitapos. Kining duha ka tubag nagpakita og daghan pa nga reaksyon nga gibase sa kahadlok kay sa pagsalig.

Sa pagkonsiderar niini, kini masabtan nga ako motubag sa Dios diha sa samang mga paagi kon ako wala magbutang sa akong hingpit nga pagsalig diha Kaniya apan mitugot sa kahadlok ug pagduhaduha nga motino sa akong mga aksiyon. Apan sa atong makat-onan sa mga Panultihon “salig sa Ginoo sa bug-os mong kasingkasing; ayaw gayod pagsalig sa [atong] kaalam” (Panultihon 3:5).

Imahe

babaye nga misagol sa uban

Pagtakda og Maayong mga Gipaabot

Kita tanan makapalambo og mas seguro, maayong mga relasyon, ug usa ka butang nga nakatabang nako mao ang pagtakda og reyalistik nga mga gipaabot. Kon ang duha ka tawo nga anaa sa usa ka relasyon adunay reyalistik ug matinuoron nga mga gipaabot, mas dili kaayo sila mobati nga ang mga aksiyon (o walay mga aksiyon) sa laing tawo makapapeligro sa relasyon.

Usahay kita adunay sayop nga mga gipaabot sa paagi nga ang Dios manginlabot sa atong mga kinabuhi. Ug kadto nga mga gipaabot sa kasagaran mao ang hinungdan ngano nga kita usahay mobati nga kita dili makasalig Kaniya—tungod kay Siya wala mopakita sa paagi nga atong gipaabot Kaniya o gusto nga Iyang buhaton. Tingali kita magsugod nga mobati nga napakyas, dili segurado, o mahadlok nga Siya wala diha, nga Siya wala mahigugma nato, o nga Siya dili motuman sa Iyang mga saad.

Kita tingali motubag uban sa kabalaka. O kita tingali mobase sa atong hugot nga pagtuo sa katumanan sa mga panalangin nga sa atong hunahuna angay alang nato o sa mga sangpotanan nga sa atong hunahuna mao ang labing maayo alang nato. O kita tingali molihok aron makalikay—kita mohunong sa pagbasa sa atong mga kasulatan o sa pag-ampo alang sa Iyang giya tungod kay kita mas mosalig sa atong kaugalingon nga kusog.

Kining tanan nga kalagmitan mao ang mga babag nga makapugong nato sa tinud-anay nga pagbati o pagbalos sa hingpit nga gugma sa Langitnong Amahan.

Niini nga mga sitwasyon, kita ang kinahanglan nga motimbang-timbang pag-usab sa atong mga gipaabot ug kinaiya. Imbis nga mosulti sa Dios kon unsaon Niya sa pagtabang nato, mas makatabang nga makat-on kon sa unsa nga paagi Siya naglihok. Sama sa gitudlo ni Elder D. Todd Christofferson sa Korum sa Napulog Duha ka Apostoles, “Tinuod gayod nga binuang alang nato sa atong limitado nga pagsabot sa pagtuo nga hukman ang Dios, sa paghunahuna, sama pananglit, ‘Ako dili malipayon, ang Dios tingali adunay gibuhat nga sayop.’”²

Sa pagpalambo og pagsalig sa atong relasyon uban sa Langitnong Amahan, kita makatutok sa atong mga pakigsaad. Ang mga pakigsaad klaro nga mopasabot unsa ang Iyang gipaabot gikan nato. Samtang kita makugihong maningkamot, kita mohimo sa atong bahin aron sa pagpalambo og pagsalig niining balaan nga relasyon.

Ang mga pakigsaad mao ang ebidensya nga ang Dios nahigugma ug mapasaligon ngari nato—nga walay makabulag nato gikan Kaniya o sa Iyang gugma (tan-awa sa Mga Taga-Roma 8:38–39) samtang kita magpadayon sa pagtinguha Kaniya ug maghinulsol matag adlaw. Kon kita makasabot sa atong kaugalingon nga Siya motuman sa Iyang mga saad ngari kanato kon kita motuman sa atong gisaad ngadto Kaniya, kita makasiguro nga kita makasalig Kaniya sa hingpit.

Ang pag-ila sa katumanan sa mga pakigsaad sa Dios magkinahanglan og pagsunod, pagpamalandong, ug hugot nga pagtuo. Kon kamo nakigbisog nga makakita Kaniya diha sa inyong kinabuhi, ikonsiderar kini nga mga paagi nga Iyang gisaad sa pagpanalangin kaninyo samtang kamo mohimo ug motuman sa mga pakigsaad:

• Kahupayan gikan sa kapakyasan, kasubo, o pagbasol³

• “Mas dako nga kahibalo bahin sa mga katuyoan ug mga pagtulon-an sa Ginoo”⁴

• Kusog batok sa mga tentasyon⁵

• “Dugang nga paglaom, kahupayan, ug kalinaw”⁶

• Ang usa ka suod ug gamhanan nga relasyon uban sa Manluluwas⁷

• Kalig-on sa pagkab-ot sa atong hingpit nga potensyal⁸

• Kalipay ug espirituhanong mga pag-aghat⁹

• “Walay kinutoban nga inspirasyon ug pagdasig”¹⁰

Samtang ako nagbantay pag-ayo niini nga mga panalangin, nahimong klaro ngari kanako nga ang Dios kanunay nga naggiya nako ug nagtuman sa Iyang mga saad sama sa Iyang gisaad na kanunay. Ug kana nakahatag nako og seguridad sa pagsalig nga Siya anaa alang kanako kon ako nagkinahanglan Kaniya. “Kay siya motuman sa tanan niya nga mga saad diin siya mihimo nganha kanimo, kay siya mituman sa iyang mga saad diin siya mihimo ngadto sa atong mga amahan.” (Alma 37:17).

Sa akong kinabuhi, dili tanang relasyon ang nagmalamposon. Ang naguba nga mga relasyon nakapahimo nako nga mahadlok sa pagsulay pag-usab. Apan ako nagtuo nga kitang tanan makabuntog sa atong mga kahadlok kon kita magbansay sa paglig-on sa pagsalig ug maningkamot nga makasabot sa espirituhanong gahom nga moabot tungod sa atong pakigsaad uban sa Dios.

Naglaom ko nga makakita sa akong mahangtoron nga kauban sa umaabot ug makapadayon sa paglig-on og talagsaong mga relasyon ngadto sa uban pinaagi sa unsay akong nakat-onan mahitungod sa pagtuman sa akong mga pakigsaad uban Kaniya. Sama sa gitudlo ni Elder Christofferson: “Sa kataposan, kini nga panalangin sa usa ka suod ug padayon nga relasyon uban sa Amahan ug sa Anak maoy atong gitinguha. Kini makahimo sa tanang kalainan ug walay kataposan ang bugti niini. … Bisan unsa pay ibilin sa atong mortal nga kasinatian, kita makasalig sa Dios ug makakaplag og hingpit nga kalipay diha Kaniya.”¹¹

Samtang kita padayon nga bug-os nga motuman sa atong mga pakigsaad, makabati kita sa pagsalig ug hingpit nga gugma diha sa atong relasyon uban sa Langitnong Amahan.