Digital Lamang
“Ang Tubag sa Tanan Nimong Problema Anaa Niini nga Libro”
Ang tagsulat nagpuyo sa Canada.
Ako nahimong nagkalayo gikan sa Simbahan sa Ginoo. Usa ka kapahayag gikan sa akong igsoon nga lalaki misugod sa pag-usab sa tanan.
Nagdako ko sa Simbahan sa usa ka mahigugmaong panimalay. Apan sa akong pagkatin-edyer, misugod ko sa pagkalayo gikan sa ebanghelyo. Nagsimba gihapon ko halos kada Dominggo. Mituo ko sa unsay gitudlo, apan kulang lang ko sa pasalig sa pagsunod sa ebanghelyo.
Sa dihang ang akong magulang nga lalaki mipauli gikan sa iyang misyon, iyang nakita nga ako wala moadto sa direksyon nga angay nakong adtoan. Misulod siya sa akong kuwarto usa ka gabii ug misulay sa pagpakigsulti kanako. Apan wala gyod ko mainteresado. Sa kataposan siya miingon, “Ang tanan nga mga tubag sa tanan nimong mga problema anaa niini nga basahon,” ug iyang gibutang ang Basahon ni Mormon sa akong higdaanan. Dayon mibiya siya. Human sa pipila ka minuto, miingon ko sa akong kaugalingon sa mabiay-biayon nga tingog, “Ang tanang tubag sa tanan nimong problema anaa niini nga libro.”
“OK,” naghunahuna ko, “tan-awon nato.”
Akong giablihan ang Basahon ni Mormon ug ang unang bersikulo nga akong nakita mao ang Alma 29:13, nga nag-ingon, “Oo, ug kana nga mao gihapon nga Dios mitukod sa iyang simbahan taliwala kanila; oo, ug kana nga mao gihapon nga Dios mitawag kanako pinaagi sa usa ka balaan nga pangatungdanan, sa pagsangyaw sa pulong ngadto niini nga mga katawhan, ug mihatag kanako og daghan nga kalamposan, diin ang akong hingpit nga kalipay napuno.” Gibati nako nga susama ni Joseph Smith sa dihang siya miingon, “Wala pay bisan unsang tudling sa kasulatan nga mituhop uban sa labaw nga gahom ngadto sa kasingkasing sa tawo kay sa nahimo niini nga panahon ngari kanako” (Joseph Smith—Kasaysayan 1:12).
Ang Espiritu kusog kaayo, ug ako nakahibalo nga ako gimandoan sa Ginoo. Nangita dayon ko og pula nga lapis, nahadlok nga basin mawala nako kini nga kasulatan ug dili na nako makit-an pag-usab. Girebyo nako kini pag-usab, naningkamot nga masabtan kon unsa ang gipasabot niini alang kanako. Akong nasabtan nga kinahanglan kong magmisyon, nga ako magmalamposon, ug nga ako malipay sa pagbuhat niini.
Nahadlok nga basin mausab ang akong hunahuna o magduhaduha sa pag-aghat, misakay ko sa akong sakyanan ug miadto sa tindahan sa pizza sa akong papa aron mangayo sa iyang suporta, nga iyang gihatag dayon. Dayon miadto ko sa balay sa akong bishop ug nangutana kaniya kon unsay akong buhaton aron makaadto og misyon. Wala madugay, akong nadawat ang akong tawag sa pagserbisyo sa Philippines Manila Mission. Ingon sa nahitabo, ako nahimong malipayon ug malamposon.
Sukad niadto, ang akong kinabuhi nausab gayod. Dili ko sigurado kon asa ko o unsay akong buhaton kon ang akong igsoong lalaki wala pa mosulod sa akong kuwarto nianang gabhiona, apan sigurado ko nga ang akong kinabuhi padulong sa sayop nga direksyon. Ang Basahon ni Mormon miluwas gayod sa akong kinabuhi. Nasayod ko nga ang Ginoo nakahibalo kanato ug gusto nga motabang kanato kon kita maningkamot ug magpakita nga kita interesado Kaniya.