Pagtinguha sa Gasa sa mga Pinulongan

Imahe

globo sa kalibotan nga adunay mga pulong sa Iningles ug French

Sa dihang giablihan nako ang akong mission call, nalipay ko nga moadto ko sa Ghana Accra Mission. Magserbisyo ko sa Ginoo pinaagi sa pagtudlo sa ebanghelyo sa Iningles. Ako gikan sa Democratic Republic of the Congo, mao nga French ang akong lumad nga pinulongan.

Sa dihang miabot ko sa natad sa misyon, makatimbaya ko sa mga tawo sa Iningles apan dili kaayo makasulti og daghan. Nasayod ko nga dili kana igo alang nako aron makatuman sa akong katungdanan isip usa ka misyonaryo.

Naghunahuna ko ni Propeta Joseph Smith, kinsa mihubad sa Basahon ni Mormon “pinaagi sa gasa ug gahom sa Dios.”¹ Naghunahuna usab ako sa mga pagtulon-an ni Apostol Pablo mahitungod sa “nagkalainlaing mga hiyas ,” lakip sa “lahi nga mga pinulongan” ug sa “kahulogan sa maong mga pinulongan” (1 Mga Taga-Corinto 12:4, 10; tan-awa usab sa Mormon 9:7, 24).

Usa ka pagbati sa kadasig ang miabot nako nga nakapabati nako nga ako makatinguha sa gasa sa mga pinulongan ug makadawat niini. Aron makadawat niana nga gasa, ako nakahukom sa paghimo og pipila ka inadlaw nga mga tumong:

• Mag-ampo alang sa gasa sa mga pinulongan.

• Magkugi sa pagtuon sa mga kasulatan ug doktrina ug mga baroganan sa ebanghelyo.

• Magtinguha og giya gikan sa Espiritu.

• Maminaw ngadto sa mga pakigpulong sa kinatibuk-ang komperensiya sa Iningles.

• Magtuon sa Iningles nga gramatika ug sa importante nga bokabularyo sa misyonaryo.

• Mosulti kanunay og Iningles.

• Mokanta og mga himno sa Iningles.

Naningkamot ko pag-ayo sa akong mga tumong. Ang gasa sa mga pinulongan, hinoon, wala moabot diha-diha dayon. Apan human sa pipila ka bulan, samtang ang akong kompanyon ug ako nagtudlo sa usa sa among mga higala, gibati nako nga masaligon sa mga pulong nga akong gipamulong. Ang among unang miting uban sa among higala mahagiton. Wala ko mobati og bisan unsa nga pagsalig sa akong abilidad sa pagsulti og Iningles, apan niining adlawa ang among higala ingon og nasurprisa.

“Elder Lono, diin ka gikan?” nangutana siya nako

“Gikan ko sa DR Congo,” ako mitubag.

“Sigurado ka?” nangutana siya.

“Oo!” Mitubag ko.

Wala ko makabantay niini, apan ako nahanas sa Iningles nga ang among higala nagtuo nga kini mao ang akong lumad nga pinulongan. Mapasalamaton ko nga ang Ginoo mipanalangin nako sa gasa sa mga pinulongan aron nga ako maayong makasulti og Iningles.

Nasayod ko nga ang Dios nahigugma sa Iyang mga anak ug mopanalangin nato sa mga gasa sa Espiritu samtang kita magtinguha niini nga makugihon uban sa hugot nga pagtuo diha kang Jesukristo.