Mga Milagro sa Kaluoy

Human sa Iyang grabe nga pag-antos sa Tanaman sa Getsemani (tan-awa sa 2 Nephi 9:21; Mosiah 3:7), si Jesus mipukaw sa Iyang mga disipulo ug dihadiha giduol sa grupo sa mga gwardiya sa templo ug mga kasundalohang Romano.¹ Kauban nila mao si Judas ug usa ka sulugoon sa labaw nga pari. Samtang ang pundok miabot diha sa mangitngit nga kagabhion, si Judas miila ni Jesus pinaagi sa paghalok diha sa aping, diin ang Manluluwas mitubag, “Judas, inubanan ba diay og halok ang imong pagbudhi sa Anak sa Tawo?” (Lucas 22:48).

Samtang ang grupo nagduhaduha, si Jesus nangutana kanila, “Kinsay inyong gipangita?”

Sila mitubag, “Si Jesus nga taga-Nazaret.”

“Ako mao siya” mao ang Iyang tubag, ug si Juan, kinsa anaa didto, nagrekord nga sa Iyang pagtubag, ang daotang grupo “nanibog ug nangatumba sa yuta.” Ang kaharianon sa Manluluwas, bisan human sa Iyang tumang pag-antos, nabati sa gamhanan nga paagi. Human makapangutana pag-usab kinsa ang ilang gipangita, si Jesus misubli, “Giingnan na kamo nako nga ako mao siya.” Dayon, sa pagpanalipod sa Iyang mga disipulo, si Jesus miingon, “Kon ako man ang inyong gipangita, palakta kining mga tawhana” (Juan 18:4–8).

Si Pedro, bisan pa, adunay laing hunahuna. Tuyo ang pagpanalipod sa Manluluwas, iyang gilanit ang iyang espada ug gitigbas si Malco, ang sulugoon sa labaw nga pari, miputol sa iyang dalunggan (tan-awa sa Juan 18:10).

Apan si Jesus mipakalma sa makuyaw nga sitwasyon. Mipahunong ni Pedro, Siya miingon: “Iuli sa sakuban ang imong espada kay ang maggamit sa espada, sa espada usab mamatay.

“Wala ka ba masayod nga makahimo ako sa pagpakitabang sa akong Amahan ug ipadala dayon niya kanako ang kapin sa napulog-duha ka panon sa mga anghel?

“Apan unsaon man pagkatuman sa kasulatan nga nag-ingon nga kinahanglan mahitabo kini?” (Mateo 26:52–54).

Ang matag usa sa mga asoy nagrekord nga si Jesus mitahan sa Iyang Kaugalingon ug ang Iyang mga disipulo milayas. Hinoon, ang report ni Lucas nga una, si Jesus maluloy-ong “gihikap ang dalunggan [ni Malco], ug giayo siya” (Lucas 22:51).

Unsa nga kaaghop ang gipakita ni Jesus samtang Siya gitratar isip usa ka kriminal! Si Elder David A. Bednar sa Korum sa Napulog Duha ka Apostoles mitudlo nga si Jesus “mitabang ug mipanalangin sa hayan modakop Kaniya gamit ang samang langitnong gahom nga makapugong unta sa pagdakop ug paglansang Kaniya sa krus.”²

Bisan pa sa kalapad sa kapasidad sa misyon sa Manluluwas, Siya dili gayod makalimot sa usa ka indibidwal. Samtang gamay ra ang atong nahibaloan bahin ni Malco, nakaila si Jesus kaniya.

Si Malco ba natandog sa lihok sa Manluluwas? Ang iyang kasingkasing ba nakabig ngadto sa Manluluwas pinaagi niining pagpakita og malumo nga kaluoy? Wala kita makahibalo. Apan bisan unsa pa ang iyang personal nga mga pagpili, sa pag-ayo sa iyang dalunggan, siya gitanyagan og gasa nga wala niya pangayoa. Kining kataposang milagro sa pag-ayo sa pagka-mortal usa ka buhat sa kaluoy sa bahin sa Manluluwas, laing oportunidad sa pagpakita sa milagrosong gahom ug gugma sa Iyang Amahan.

Si Jesus nahigugma sa matag usa sa mga anak sa Iyang Amahan uban ang walay kinutoban nga gugma. Sa tanan nga gibuhat sa Manluluwas, Siya naningkamot sa pagdala sa mga kalag ngadto sa Iyang Kaugalingon, sa pagdala kanila ngadto sa paghinulsol aron sila maluwas (tan-awa sa 2 Nephi 26:24).

Nakasinati ba kamo og usa ka kausaban sa kasingkasing human makadawat og wala paabota nga panalangin? Ang inyo bang mga mata nabuka aron makita ang “nagpadayon nga buhat sa kaluoy, walay paghunong, [nga] pagtawag sa mga awit sa labing kusog nga pagdayeg”?³

Unsa ang mahitungod ni Pedro? Si Jesus nasayod nga Siya kinahanglan nga dakpon aron mag-antos ug mamatay aron nga mahimong posible alang nato nga makabalik ngadto sa Dios pinaagi sa paghinulsol ug sa Pagkabanhaw. Kini mao ang Iyang misyon. Apan Siya nagkinahanglan usab sa Iyang mga disipulo nga mabuhi alang Kaniya aron sa pagpadayon sa ilang misyon sa pagsangyaw sa ebanghelyo ug sa pagtukod sa Simbahan.

Ang daotang mga tawo nga nagpundok libot sa Manluluwas tingali nakapahadlok sa Apostoles. Si Pedro nahinayak, mikuha sa espada diha sa atubangan sa kadaghanan aron sa pagpanalipod sa iyang Agalon; hinoon, ang Ginoo miayo sa samad nga nahimo ni Pedro. Wala kita masayod kon ang pagkaayo ni Malco nakaluwas ba ni Pedro gikan sa mga sangpotanan nga makapugong unta kaniya sa pagtuman sa iyang misyon. Apan usa kini ka gasa ngadto ni Pedro!

Kamo ba nakasulti o nakahimo og butang nga dinanghag o nakapasakit, bisan agig pagpanalipod sa Manluluwas o sa Iyang Simbahan? Ang paghinumdom sa kasinatian ni Pedro makahatag nato og kaisog sa pagpangayo og pasaylo. Ang Manluluwas nakakita sa atong dili hingpit nga mga paningkamot sa pagsunod sa Iyang ebanghelyo ug sa pagpanalipod sa Iyang ngalan, bisan kon sa atong kahuyang kadto nga mga paningkamot makahimo og wala tuyoa nga kadaot.

Kon kita manalipod sa atong mga gituohan diha sa social media o sa personal, kita tingali usahay mahimong “hilabihan ka madasigon” (Mosiah 9:3) o “[naglaktaw] sa mas importanteng mga pagtulon-an sa balaod” (Mateo 23:23), lakip sa kaluoy. Kita dili mogamit og mga espada, apan ang mga pulong adunay gamhanan nga epekto, nga makahimo sa “pagdala sa katawhan sa pagbuhat niana nga [diin] makiangayon” (Alma 31:5) o makahimo kanila og sayop (tan-awa sa Santiago 3:2). Tingali makita nato ang atong kaugalingon sa samang dapit ni Pedro, nag-agad sa kaluoy sa Manluluwas sa pag-ayo sa mga samad nga atong nahimo ug sa pagtabang nato sa pagpadayon, pagpanalipod sa hugot nga pagtuo ug pagpaambit sa ebanghelyo uban ang “espiritu sa kaaghop” (Doktrina ug mga Pakigsaad 100:7), nga mopuli sa espiritu sa panagbingkil (tan-awa sa Mga Buhat 4:7–14; 5:40–42).

Wala maklaro kon duna bay mga miyembro sa daotang grupo ang nakasaksi sa pagkaayo sa dalunggan ni Malco, apan tingali ang Manluluwas mitanyag usab og kaluoy ngadto kanila, naghatag nila og kataposan nga oportunidad sa pagsaksi sa Iyang gahom ug paghinulsol.

Sa atong kaugalingong mga gutlo sa kahuyang, ang Ginoo nagtanyag og kaluoy, nga makapahimo nato sa pagbuntog sa mga hagit nga atong giatubang.

Niadtong Disyembre 2016, ang akong bana nasakit og pulmonya. Kami nagpuyo sa Moscow, Russia, diin si Bruce nagserbisyo diha sa Kapangulohan sa Europe East Area. Ang mga doktor miingon nga siya kinahanglan nga magpabilin sa ospital sulod sa pipila ka adlaw aron modawat og mga antibiotic. Nianang gabhiona ang iyang panglawas migrabe pag-ayo, ug sila mibutang niya sa induced coma.

Sulod sa misunod nga 10 ka adlaw, mobangon ko matag buntag, mangamuyo sa tabang sa Ginoo samtang magdrayb ko padulong sa estasyonan sa subway, mosakay sulod sa 45 minutos diha sa subway, ug dayon maglakaw sa nahibiling gilay-on padulong sa ospital. Maglingkod ko sa tibuok adlaw sa kiliran ni Bruce diha sa intensive care unit samtang siya hingpit nga naghigda, dili makasulti o makalihok, gilibotan sa tanang matang sa mga monitor. Matag gabii sa akong pagbalik sa pagbiyahe, moabot sa balay aron pundokon ang among mga butang sa pagpangandam sa among pag-uli ngadto sa Utah.

Bisan karon, ako nahinumdom nga niadtong mabugnaw, mangitngit nga mga panahon, wala gayod nako batia ang kahadlok samtang nagbiyahe ko sa subway. Nakahinumdom ko sa kalinaw ug kakalma nga akong gibati samtang naglingkod ko sa higdaanan ni Bruce sa ospital. Sa balay matag gabii, ako nag-inusara apan dili masulob-on.

Hinoon, sa wala madugay human sa among pagbalik sa Utah, si Bruce namatay.

Karong bag-o, samtang ako nahinumdom niadtong lisod nga mga panahon, ang Ginoo klarong namulong sa akong hunahuna, “Gibuhat nako kini alang kanimo.” Nianang higayona, ang Ginoo mipahibalo nako nga ang kalinaw nga akong gibati, ang kasiguroan nga akong nasinati, ug ang pagbati nga ako wala mag-inusara nagagikan sa usa ka mahigugmaong Langitnong Amahan ug sa Iyang Anak. Sila mihatag og kaluoy kanako sa akong kahuyang.⁴

Usahay kita nakahibalo sa Iyang kaluoy, ug sa ubang mga higayon kita mopadayon lang, wala makamatikod sa balaan nga tabang nga maoy nakapahimo nato sa pagpadayon. Apan samtang kita mag-ampo aron mabuka ang atong mga mata aron makakita sa kaluoy sa Manluluwas nga gihatag ngari kanato, ang atong mga kasingkasing maandam sa paghatag og kaluoy ngadto niadtong atong mahimamat. Siya miingon, “Magmaluluy-on kamo, sama nga maluluy-on ang inyong Amahan” (Lucas 6:36).

Kon kita nakadawat man niana nga kaluoy sa higayon nga kita naghimo og dili matarong nga mga pagpili, sama ni Malco; nasulod diha sa usa ka desperado nga sirkumstansiya, sama ni Pedro; o nakigbisog lang lapas sa atong kapasidad, sama nako; ang Ginoo makaduaw o moduaw nato diha sa Iyang kaluoy.

Samtang kita mamalandong sa labing mahinungdanon nga buhat sa kaluoy—ang pag-antos sa atong Manluluwas—kita makadungog sa Iyang mahigugmaong mga pulong ngari kanato: “Gihimo ni Nako alang kanimo.”