Digital Lamang: Mga Young Adult
Sa Unsang Paagi nga ang Pagkaselyo diha sa Templo Nakahimo og Kalainan sa Akong Kaminyoon
Tungod sa pandemiya, ang akong bana ug ako kinahanglang maminyo sa huwes imbis sa templo.
Sa dihang ang pagpahibalo gihimo nga ang tanang templo sirad-an sa wala pa hibaloi kon kanus-a mobalik atol sa pandemiya, nahinumdom ko sa pagtawag ni Keaton (ang akong uyab atong higayona) ug sa paghisgot kon unsa ang sunod namong buhaton. Maminyo unta mi diha sa templo sulod sa pipila ka semana, ug wala kami makasiguro kon kinahanglan ba namong maghulat hangtod moabli pag-usab ang mga templo aron maminyo o kinahanglan ba magminyo mi sa huwes ug dayon magpaselyo sa dili madugay.
Sa personal nga paagi, naguol ko tungod kay kanunay nakong gihunahuna ang adlaw sa akong kasal diha sa templo ug kana nga kahigayonan nawala na. Nagplano na usab ko sa pagdawat sa akong pagtoga sa samang semana sa among pagminyo, mao nga maghulat gyod kami og dugay dugay kon kanus-a moabli pag-usab ang mga templo alang sa pagtuga ug pagselyo nga appointment.
Sa kataposan, human sa daghang pag-ampo ug paghisgot-hisgot, si Keaton ug ako mipili sa pagminyo sa huwes sa among orihinal nga petsa sa templo. Apan determinado kami nga maselyo inig abli pag-usab sa mga templo.
Pagpangandam
Sa among paghulat alang sa pag-abli pag-usab sa mga templo, gigamit namo ang among panahon sa paghulat sa pagkat-on og dugang pa bahin sa mga pakigsaad nga among himoon sa pagselyo nga ordinansa (ug sa akong pagtuga). Si Keaton ug ako nakigsulti sa among bishop bahin sa pagkuha og temple prep nga klase, ug siya nadasig sa paghangyo ni Keaton nga maoy akong magtutudlo. Matag semana, si Keaton ug ako magtapad og lingkod ug maghisgot sa templo.
Espesyal gayod kini kaayo ug makapalig-on nga panahon sa among relasyon samtang naghisgot kami sa mga saad sa pakigsaad nga among himoon sa usag usa kon kami maselyo.
Unom ka bulan human sa among kasal sa huwes, nadawat nako ang akong pagtuga ug si Keaton ug ako naselyo. Gilibotan kami sa pamilya, apan dili sama sa adlaw nga kami naminyo, wala kami ginerbyos o nabalaka—hilabihan ang among kahinam! Ang among tumong mao lamang ang unsa ang mahangturon nga kaminyoon—ang mga pakigsaad nga among gihimo. Siyempre, ang mga selebrasyon ug mga kalihokan nga kasagaran mahitabo sa adlaw sa kasal mahinamon gayod ug makalingaw. Apan mapasalamaton ako sa panahon nga giandam gayod namo sa paghimo og mga pakigsaad sa usag usa ug uban sa Dios. Dili igsapayan kon naminyo ka sa huwes o una diha sa templo, nasayod ko nga ang tinud-anay nga pagpangandam sa paghimo og mga pakigsaad uban sa imong kapikas ug paghimo niana nga ordinansa nga mao ang tumong sa inyong adlaw sa kasal mao ang usa sa labing malipayon nga sukad imong masinati.
Sa higayon nga kami nangluhod sa altar ug naselyo, usa ka gamhanan nga pagbati sa pasalamat, gugma, ug hingpit nga kalipay mipuno sa among mga kasingkasing. Kaming duha mibati dayon og dakong kalainan sa among relasyon.
Bisan og malipayon kami sa among kaminyoon sa milabay nga unom ka bulan, pagkagabii niana si Keaton ug ako nag-istorya bahin sa usa ka talagsaon nga kasagrado nga karon among gibati sa among kaminyoon. Usa ka bag-o nga pagbati sa pagkausa ug kalinaw miabot sa among relasyon. Ang Espiritu diha sa among panimalay nianang gabhiona kusog kaayo nga hapit kini mahikap. Gibati namo ang bag-ong lebel sa gugma alang sa usag usa ug alang sa Manluluwas diri sa among mga kasingkasing. Ug nasayod kami nga kini tungod kay kami nausa sa among kaugalingon ngadto sa usag usa ug ngadto sa atong Langitnong Amahan pinaagi sa mahangturon nga mga pakigsaad.
Namalandong
Pinaagi sa among mga kasinatian, si Keaton ug ako nakasaksi sa kamahinungdanon sa pagtukod ug paglig-on sa among relasyon sa tinagsa ug dungan uban sa atong Manluluwas nga si Jesukristo ug sa atong mahigugmaong Langitnong Amahan. Ang maselyo diha sa templo magtugot kanato nga mobati sa hingpit sa gahom nga ang paghimo ug paghupot og mga pakigsaad magdala ngadto sa kaminyoon—kon sa unsang paagi kini sa tinud-anay mousab sa atong gugma alang sa usag usa ug modapit sa makaayo, makatubos, ug makahimo nga gugma sa Manluluwas ngadto sa atong relasyon.
Ako mousab sa bag-ohay nga pagdapit ni Presidente Russell M. Nelson: “Kon mahimo pa lang nga makigsulti ko tinagsa-tagsa sa matag young adult, ako mangaliyupo gyod kaninyo sa pagpangita og kompanyon diin kamo maselyo didto sa templo. Tingali maghunahuna mo unsa nga kalainan ang mahimo niini sa inyong kinabuhi. Ako mosaad nga kini makahimo sa tanan nga kalainan! Kon kamo magminyo sa templo ug balik-balik nga moadto, kamo malig-on ug magiyahan sa inyong mga desisyon.”1
Si Keaton ug ako nakasinati sa “tanan nga kalainan” sa among kinabuhi nga gihulagway ni Presidente Nelson. Bag-ohay lang, amo usab gihangop ang among unang anak, usa ka gwapa nga gamayng bata, kinsa miabli sa among mga kasingkasing ug mga hunahuna ngadto sa gugma sa Dios alang kanamo diha sa bag-o nga lebel. Matag higayon nga motan-aw kami sa iyang matahom nga mga mata, mahinumdom kami sa lawom nga mga panalangin sa templo ug sa mahangturon nga mga pamilya. Amo siya sa kahangtoran, ug si Keaton ug ako mapanalanginan nga mag-uban sa kahangtoran tungod kay kami naselyo alang sa karon ug sa tanan nga kahangtoran.
Ako mopamatuod nga ang pagkaselyo diha sa templo bililhon sa tanan ug nga makita ninyo ang magiyahong impluwensya sa Ginoo sa inyong relasyon kon magpadayon kamo sa pagpunting sa inyong mga pakigsaad ug sa paghimo sa templo nga prayoridad sa inyong kinabuhi.