Gipanalipdan atol sa Dahili sa mga Bato

Imahe

mga kamot nga nagkupot sa manibela sa usa ka sakyanan

Mibisita ko sa Yellowstone National Park uban sa akong anak nga babaye ug sa iyang pamilya, ug nagsuroy-suroy mi sa tibuok adlaw. Usa kadto ka ting-ulan nga adlaw, apan wala kadto namo gitugotan nga makapadismaya kanamo. Ang akong anak nga babaye nagdrayb sa kadaghanan nianang adlawa, apan sa pagkagabii naaghat ko nga ako ang magdrayb balik sa among gipuy-an.

Dili klaro kanako ngano nga kinahanglan ako ang magmaneho, apan kanunay kong maningkamot sa pagsunod sa mga pag-aghat sa Espiritu Santo kon ingon niini ang akong gibati. Sama sa gitudlo ni Joseph Smith, “Pagbantay ug ayaw isalikway ang ligdong nga hinagawhaw nga tingog; motudlo kini ka[ninyo] sa unsay buhaton ug kon asa moadto.”¹

Mingitngit na, ug mibunok ang kusog nga ulan. Sa wala madugay, adunay mitungha diha sa atubangan sa akong trak. Dili ko sigurado kon unsa kini, apan kini duol na. Nasayod ko nga kami makaigo niini. Akong naamgohan nga ang usa ka bahin sa kilid sa bungtod nabungkag ug nahulog diha sa among agianan. Gadali sa unsay akong mahimo, misulay ko sa pagliso libot sa dakong bato, apan kini duol ra kaayo ug naigo namo kini.

Ang buylo sa trak miduso kanamo ngadto pasaka sa bato, hinungdan nga ang trak mikiling ug mipatong ang duha ka ligid. Gisulayan nako nga pahunongon ang trak, apan ang pedal sa gas naipit. Kami nagpadayon sa paspas nga pag-abante, sama sa usa ka rocket nga naglupad sa dalan sa duha ka ligid. Nianang higayona, nakaamgo ko nga nagpadulong kami sa usa ka railing nga koral sa usa ka pangpang paingon sa Yellowstone River. Nawad-an kog kontrol sa sakyanan, ug nakahibalo ko kon unsa ang naa sa pikas nga bahin sa railing nga koral kon moagi kami niini.

Nianang higayona, nag-ampo ko sa hilom: “Amahan, palihog tabangi ko sa pagluwas sa akong pamilya!” Sa kalit lang, ang Espiritu Santo miaghat nako sa pagpalong sa makina. Kana nagkinahanglan nga akong tangtangon ang usa ka kamot gikan sa manibela, apan kini nagkinahanglan sa akong duha ka kamot sa pagkontrolar sa trak. Naghunahuna ko, “Dili nako mabuhian.” Mibati ko og makahupay nga hunghong gikan sa Espiritu Santo: “OK ra. Tabangan tika. Palonga ang ignition.” Gikab-ot nako ang switch sa ignition ug gikuha ang yawe. Sa dihang mihinay na ang dagan sa trak, nakahimo na usab ako sa pagmaneho niini mao nga nagpabilin kami sa dalan.

Nasayod ko nga ang pag-aghat sa Espiritu Santo maoy mitultol kanako sa pagpalong sa makina. Morag gikuptan pag-ayo sa mga anghel ang ligid aron makuha nako ang akong kamot aron mapalong ang makina. Nasayod ko nga ang Langitnong Amahan ug ang Espiritu Santo mitabang nako nianang gabhiona. Mapasalamaton kaayo ko sa ebanghelyo sa akong kinabuhi nga nahimong posible alang kanako nga maandam sa pagdawat sa mga pag-aghat nga migiya kanamo ngadto sa pagkaluwas.