Pagdawat og Pagpadayag—Bag-ohay nga mga Mensahe gikan sa mga Propeta, Apostoles, ug Ubang mga Lider sa Simbahan

“Gusto ko mopakigbahin og pipila sa akong nakat-onan bahin ni Propeta Joseph Smith.

“Ang pagtandi sa pagkabatan-on ni Joseph Smith mipatigbabaw sa iyang mapanagnaon nga pagpangalagad. Siya 14 anyos sa panahon sa Unang Panan-awon, 21 sa dihang nadawat niya ang bulawan nga mga palid, ug 23 lang sa dihang nahuman niya paghubad ang Basahon ni Mormon (wala kaabot og 60 ka adlaw nga tingtrabaho). Sobra sa katunga sa mga pagpadayag sa atong Doktrina ug mga Pakigsaad gihatag pinaagi niini nga propeta samtang nag-edad siya og 25 o mas bata pa. Siya 26 anyos sa dihang naorganisar ang Unang Kapangulohan ug labaw lang sa 33 anyos sa dihang mieskapo gikan sa pagkapriso didto sa Missouri ug misugod pag-usab sa pagpangulo sa mga Santos nga panagpundok sa Nauvoo. Siya traynta y otso anyos ug tunga sa dihang siya gipatay.

“Ang yawe sa pagkatalagsaon sa mensahe ni Joseph Smith ug sa Pagpahiuli mao ang pagpadayag. Ang pagpadayag mao ang pundasyon sa atong doktrina ug pagdumala sa Simbahan. Si Joseph Smith mideklarar, ‘Ang Simbahan ni Jesukristo sa mga Santos sa Ulahing mga Adlaw natukod pinaagi sa laktud nga pagpadayag, isip tinuod nga Simbahan sa Dios sukad pa kaniadto’ (Mga Pagtulun-an sa mga Presidente sa Simbahan: Joseph Smith [2007], 233).

“Sa atong panahon, ang pagpadayag nagpadayon sa paggiya sa Simbahan. Sa ingon, matag usa kanato makadawat og pagpadayag alang sa atong kaugalingon nga kinabuhi. Unta matag usa kanato makagamit sa gasa sa personal nga pagpadayag sa atong kinabuhi ug matinud-anong magtinguha sa #PagpaminawKaniya.”

“Kon maghunahuna ko og balik niadtong young adult pa ko, usa sa mga butang nga mosantop sa akong hunahuna mao kadtong usa pa ako ka misyonaryo sa England. Human lang kadto sa Ikaduhang Gubat sa Kalibotan, ug ang Simbahan ni Jesukristo mao lay pagka-establisar pag-usab ngadto. Responsable ko sa akong pagka-lider sa akong misyon, ug 20 anyos pa lang ko! Moangkon ko nga isip mga misyonaryo, wala pa kaayo mi pagtagad niadtong edara.

“Usa ka adlaw usa ka tawo ang midapit kanako sa pag-adto sa usa ka miting sa debate sa katilingban ug morepresentar sa atong Simbahan. Miuyon ko sa pagtambong, apan wala gyod koy ideya unsay akong gitambongan! Ako dinha sa posisyon sa pagpasabot sa Simbahan ngadto sa dako nga grupo sa katawhan ug nagtubag sa ilang mga pangutana. Dinhi niini nga okasyon nga ako unang nakaamgo sa gahom sa Espiritu Santo. Mitudlo ko bahin sa Espiritu Santo, ug ako kining gibasa, apan niini nga okasyon ako kining nasinati.

“Sa ilang pagpangutana, dinha na koy tubag sa akong hunahuna sa wala pa nila nahuman ang pangutana. Dali ra kong nakapakli sa mga kasulatan sa paagi nga wala pa nako masinati kaniadto. Mura ba og para nako ang mga pahina gipakli sa laing tawo samtang nanalipod ko sa Simbahan.

“Sa akong paghunahuna og balik niadto nga kasinatian 73 ka tuig na ang milabay, ako nakaamgo nga nakat-on ko og usa ka butang nga nakapanalangin kanako niining mga katuigan. Nahibalo ko sa akong kaugalingon nga ang Espiritu Santo mao gayod ang Maghuhupay ug nga pinaagi sa gahom sa Dios, Iyang ibutang sa atong hunahuna ang mga pulong sa Ginoo.

“Ako nanghinaot nga kamo adunay sama nga kasinatian isip usa ka young adult. Pabilin nga malig-on sa inyong pagtuon sa mga kasulatan, ug pag-ampo matag adlaw. Sugdi ang inyong adlaw uban sa usa ka pag-ampo, taposa inyong adlaw sa usa ka pag-ampo, ug pakigsulti ngadto sa Ginoo ingon sa gikinahanglan sa tibuok adlaw. Bisan unsa pa ang inyong mga sirkumstansya, ako nanghinaot nga makabaton kamo sa susama nga kasinatian nga akong nasinati uban sa Espiritu Santo sa inyong pangidaron.”

“Ang pagdawat og pagpadayag moabot, sa ako ra nga sitwasyon, kon ako adunay malinawon ug hilom nga mga panahon. Dili ka makakonektar sa langit kon daghan kaayo ang gihunahuna. Kinahanglan kang mangita niadtong hilom nga mga panahon sa imong kinabuhi nga ikaw makapamalandong sa mga butang sa Espiritu. Sa akong kasinatian, kon ako anaa niana nga gawi ug naningkamot nga magmalinawon, kana ang higayon nga ako makakuha og mga panghunahuna. Kana ang higayon nga akong mahunahuna nga ako nahibalo nga gikan sa langit.

“Nabalaka kaayo ko sa akong mga apo ug akong mga apo sa tuhod—gani, sa tanang batan-ong mga tawo—sa kalibotan karon. Nahadlok ko nga sila madaog sa social media, mga text, mga email, ug ubang mga makabalda. Samtang ang teknolohiya mahimong usa ka panalangin sa atong kinabuhi, kini usab mahimong usa ka makabalda nga nagbutang og babag tali kanato ug sa atong abilidad sa pagpaminaw sa tingog sa Ginoo. Akong gisultihan ang akong mga apo nga kinahanglan nga mogahin sila og hilom nga oras sa matag adlaw sa paghunahuna mahitungod sa ilang mga kinabuhi ug sa pagpamalandong kon unsa ang gusto sa Ginoo kanila nga buhaton. Ako nag-awhag kaninyo sa pagbuhat sa sama.”

Sa lain-laing panahon sa kinabuhi sa Manluluwas, Siya mipahimulos sa mga kahigayonan nga mag-inusara aron sa pagpamalandong ug pag-ampo. Ako modapit kaninyo sa paggahin og panahon sa mosunod nga pipila ka mga adlaw nga mag-inusara sa usa ka hilom nga dapit aron sa pagpakigsulti sa inyong Langitnong Amahan. #PaminawKaniya

“Pilia ang magmapainubsanon. Sa kinabubut-on pangitaa ang Ginoo ug salig sa Iyang paggiya. Mas andam kitang maminaw Kaniya kon kita adunay matudloan nga kasingkasing.”

“Ang panahon sa paghinuklog usa ka oportunidad alang sa espiritwal nga pagpahiuyon pag-usab. Usa kini ka tanaman sa paghinuklog diin kita maglakaw kauban ang Ginoo ug matudloan, malig-on, ug maputli pinaagi sa sinulat ug gipadayag sa Espiritu nga mga pulong sa atong Langitnong Amahan. Usa kini ka sagradong panahon diin kita mohinumdom sa atong ligdong nga mga pakigsaad nga mosunod sa malumo nga Kristo, diin kita mosusi sa atong kalamboan ug ipahimutang ang atong kaugalingon gamit ang espirituhanon nga mga timailhan nga gihatag sa Dios alang sa Iyang mga anak.

“Hunahunaa kini isip inyong personal, inadlaw nga pagpahiuli. Sa atong biyahe isip mga magpapanaw diha sa dalan sa kahimayaan, nasayod kita nga dali ra kaayo nga mobiya sa kamaturoan. Apan ingon nga ang ginagmay nga mga pagtipas makapalayo kanato sa Dalan sa Manluluwas, mao usab ang gagmay ug yano nga mga binuhatan sa pagpahimutang pag-usab ang siguradong makapabalik kanato. Kon ang kangitngit mohinay-hinay og sulod sa atong mga kinabuhi, ingon nga kini sagad gayod, ang atong inadlaw nga pagpahiuli mobukas sa atong mga kasingkasing ngadto sa langitnong kahayag, nga modan-ag sa atong mga kalag, mowagtang sa mga kangitngit, mga kahadlok, ug mga pagduhaduha.”

“Samtang mangita kamo sa inspirasyon aron makaangkon og kaalam nga gikinahanglan ninyo sa inyong kinabuhi, ako modapit kaninyo sa pagtan-aw ngadto sa Manluluwas. Usa sa maayo kaayo nga paagi sa pagduol ngadto kang Kristo mao ang pagbasa sa Basahon ni Mormon—gikan sa sinugdanan hangtod sa kataposan—ug ilhon ang mga hiyas ug mga kinaiya ni Jesukristo nga makita dinha. Sa inyong pagbuhat niini uban sa tinuod nga intensyon ug sinseridad sa kasingkasing, mahimo kang moduol ug maminaw sa Iyang tingog. Mahimo kamong makaila Kaniya sa labing talagsaon nga paagi.”

“Samtang motahod kita sa atong mga pakigsaad ug motuman sa mga sugo sa Dios, kita mapanalanginan sa pagpakig-uban sa Espiritu Santo. …

“Nagpuyo kita sa panahon sa dispensasyon sa kahingpitan sa mga panahon kon kita adunay purohan sa pagkab-ot sa talagsaong mga panalangin, usa niini mao ang kanunay nga pakig-uban sa Espiritu Santo. Sa tanang kagubot, sa tanang kasamok, ang matag usa kanato mahimong mapanalanginan sa pagkat-on alang sa atong kaugalingon sa mga butang nga labing mahinungdanon og bili ug sa pagtabang kanato sa pag-establisar sa gikinahanglang espirituhanon nga mga prayoridad. Mapasalamaton kaayo ako alang sa Espiritu Santo isip usa ka magtutudlo—isip ang magtutudlo—ug giunsa Niya pagtabang sa matag usa kanato sa daghan kaayong paagi.”

“Ang pagpakig-istorya gikan sa atong Amahan sa Langit moabot sa nagkalainlaing paagi sa nagkalainlaing panahon. Walay usa nga matang sa pagpadayag o inspirasyon. Ang Dios daghang lainlain nga gigamit sa pagkab-ot kanato, bisan unsa nga sa Iyang paminaw nga labing maayo. Ug kining tanan balido.

“Kinahanglan kita nga motuo nga Siya motubag sa Iyang paagi ug panahon. Kon kita makugihon sa pagsunod sa Iyang mga sugo ug adunay hugot nga pagtuo nga Siya motubag, kita makadungog Kaniya.”

“Pagmahimong takos sa pagpaminaw sa hinay, hinagawhaw nga tingog samtang kini namulong kanimo ug modala kanimo paingon sa husto. Samtang kamo naminaw, samtang kamo takos ug adunay paggiya sa Espiritu Santo, kini moluwas kaninyo, mogiya kaninyo sa agianan nga inyong pagaadtoan, ug modala og kalinaw sa inyong kinabuhi.”

“Sa umaabot nga mga bulan o mga tuig, tingali kamo adunay mga hagit. Tingali adunay mga kabalaka mahitungod sa mga sakop sa pamilya o pinansyal nga mga problema. Mahibulong kamo kon unsa ang buhaton. Ako moawhag kaninyo sa pag-adto sa inyong Langitnong Amahan diha sa pag-ampo. Hinumdumi kanunay nga makaistorya kamo sa inyong Langitnong Amahan.

“Hangyoa Siya sa paggiya kaninyo sa daghang desisyon nga kinahanglan ninyong himoon. Ingon ka kalig-on sa inyong personal nga pagpamatuod, makatubo kini ug mahimong mas lig-on. Ako mopamatuod kaninyo nga ang Langitnong Amahan naminaw sa inyong mga pag-ampo ug motubag kaninyo. Usahay sa labing wala damha nga mga higayon, ang pagpadayag nga inyong gikinahanglan moabot.”

“Usa sa labing maayo nga mga bahin sa 2020 alang kanako mao ang kahigayonan sa pagtutok og dugang ngadto sa atong Manluluwas, si Jesukristo, ug mamalandong sa mga paagi nga ako #MaminawKaniya. Sa bag-ohay nga debosyonal, ako midapit sa mga young adult sa pagpadala og mga komentaryo bahin kon giunsa nila sa pagpaminaw sa tingog sa Ginoo. Ako natingala sa kadaghang mga komentaryo nga among nadawat. Tingali ang uban sa ilang mga tubag molanog diha ninyo samtang inyong ikonsiderar kon unsaon sa pagpaminaw Kaniya sa inyong kinabuhi:

• Makadungog ako Kaniya kon ako mag-ampo nga sinsero. Ang Iyang tingog moabot kanako pinaagi sa putli ug hilom nga mga hunahuna.

• Akong gibati ang Espiritu pinaagi sa kaklaro sa pangisip, pinaagi sa mga hunahuna nga sa kalit nahiluna niadtong sa miagi nalibog pa.

• Ako naminaw Kaniya pinaagi sa katahom sa kinaiyahan ug sa gahom sa makapabayaw nga musika.

• Ako naminaw Kaniya sa kalinaw nga Iyang gisulti sa akong hunahuna ug ang pagsalig nga Iyang gihatag kanako kon ako mag-ampo alang sa panabang.

• Ako naminaw Kaniya samtang nakighigala ako niadtong anaa sa akong palibot. Samtang nagserbisyo ako ug nagdawat og serbisyo, makakita ako Kaniya.

“Ako gustong mopasalig kaninyo nga matag usa kanato makapaminaw Kaniya pinaagi sa pagpaminaw ug pagpatalinghog sa mga pag-aghat sa Espiritu Santo. Nakita nako kini sa dili maihap nga higayon na sa akong kinabuhi.”

“Si Presidente Russell M. Nelson balik-balik nga nagdapit kanato sa pagkat-on sa pagpaminaw sa tingog sa Ginoo. Kini mahinungdanon alang sa matag usa kanato nga mahibalo kon sa unsang paagi ang Ginoo nakigsulti kanato sa talagsaon ug sa indibidwal nga paagi. Sa dinalian man kini, sa usa ka mainiton nga paghupay, o sa klaro nga mga hunahuna nga masabtan, Siya makigsulti kaninyo sa paagi nga kamo makasabot.”