Mas Halawom nga mga Koneksiyon ngadto ni Kristo

Imahe

mga tawo nga nag-ambit sa sakramento

Litrato pinaagi ni Machiko Horii

Minahal nga mga Ginikanan,

Kini nga isyu karong bulana nagsangkap og mga artikulo nga nagtudlo unsaon nato nga atong mapalawman ang atong koneksiyon ngadto ni Jesukristo. Isip pamilya, mahimo ninyong rebyohon ang tahas sa Espiritu Santo sa paggiya kanato ngadto sa Manluluwas, sa makabalaan nga gahom ni Jesukristo samtang mag-ambit kita sa sakramento, ug sa anaa nga balaanong kaluoy pinaagi sa Pag-ula sa Manluluwas.

Mga Panaghisgotan sa Ebanghelyo

Usa ka Koneksiyon sa Pakigsaad

Ipaambit diha sa inyong pamilya ang pipila ka pagtulon-an gikan sa artikulo ni Elder David A. Bednar nga anaa sa pahina 4. Pakigsultihi ang inyong pamilya mahitungod sa mga pakigsaad nga gihimo o himoon sa matag usa ka tawo. Unsa nga tahas ang gidala sa Espiritu Santo sa pagtabang nga atong matuman ang atong mga pakigsaad ug mahinumdom ni Jesukristo?

Mga Tahas sa Espiritu Santo

Gamit ang artikulo nga Sukaranang Ebanghelyo diha sa pahina 22, pakigsultihi ang inyong pamilya bahin sa kon kinsa ang Espiritu Santo ug kon unsang mga tahas ang Iyang gidala sa plano sa Langitnong Amahan. Magpaambit og mga kasinatian diin kamo mibati sa Espiritu Santo o misunod sa Iyang mga pag-aghat.

Balaan nga Kaluoy

Diha sa pahina 40, si Presidente Susan H. Porter mihatag og mga panglantaw gikan sa asoy bahin sa pag-ayo ni Jesus sa dalunggan sa tawong gipaadto aron modakop Kaniya. Basaha ang artikulo ug dayon hisgoti uban sa inyong pamilya ang tahas sa kaluoy nga diha sa tawo ug ni Pedro, kinsa mitapyas sa dalunggan. Duna bay mga panahon nga ikaw nagkinahanglan sa usa o sa duha niining matang sa kaluoy?

Dali, Sunod Kanako nga Kalingawan sa Pamilya

Paglig-on sa Uban

Lucas 22

Si Jesukristo mihatag ni Pedro niini nga tambag bahin sa pagkakabig: “[Kon ikaw nakabig na] kanako, kinahanglan lig-onon mo ang imong kaigsoonan” (Lucas 22:32).

Basaha ang Lucas 22:32 kauban sa inyong pamilya.
Dapita ang mga sakop sa pamilya sa paglingkod sa salog.
Hangyoa sila nga mosulay sa pagbarog nga dili mogamit sa ilang mga kamot sa pagbalanse.
Pagpili og duha ka sakop sa pamilya sa paglingkod sa salog, nga magtalikod, nga ang mga bukton ilingkit.
Ingna ang maong mga sakop sa pamilya nga magdinus-anay sa ilang buko-buko ug dayon magdungan sa pagbarog. Pinaagi sa pagtambayayong, ang pagbarog mas sayon.
Sublia ang dula hangtod ang tanan makasulay nga magtambayayong.

Diskusyon: Kon kita tinuoray nga nakabig sa ebanghelyo ni Jesukristo, makalig-on kita sa uban. Unsa ang pipila ka paagi nga ang Langitnong Amahan makalig-on kanato? Unsaon nato sa paggamit ang atong pagkakabig sa paglig-on sa uban?