Tala’i Atu le Talalelei o le Filemu

O’u uso e ma tuafafine pele, susū maia i le konafesi aoao! Sa ou tulimatai lava i lenei aso ma le faamoemoe tele. Ou te tatalo mo outou i aso uma. Sa ou tatalo foi ia avea lenei konafesi ma se taimi o le faafouga faaleagaga mo outou uma taitoatasi.

Talu mai le konafesi mulimuli, o loo faaauau pea faigata i le lalolagi. O loo aafia pea o tatou olaga i le faama’ioti i le lalolagi atoa. Ma i le taimi nei ua luluina le lalolagi i se vevesi ua matua matata’u ai le faitau miliona o alii, tamaitai, ma tamaiti ta’umamaina.

Na muai vaai perofeta i o tatou aso, i le taimi o le a i ai taua ma tala o taua ma le taimi o le a vāvāō ai le lalolagi atoa.¹ I le avea ai ma soo o Iesu Keriso, tatou te aioi atu i taitai o malo ina ia saili se tali filemu i o latou eseesega. Tatou te valaau atu i tagata i soo se mea ia tatalo mo i latou o mafatia, ia faia mea latou te mafaia e fesoasoani ai i ē puapuagatia, ma saili le fesoasoani a le Alii i le faamutaina o soo se taua matuia.

Uso e ma tuafafine, e leai se isi taimi ua matua sili ona manaomia ai le talalelei a Iesu Keriso i lo le taimi nei. O fefinauaiga ua solia ai mea uma na tu atu ai le Faaola ma aoao atu. Ou te alofa i le Alii o Iesu Keriso ma molimau atu o Lana talalelei e na o le pau lea o le vaifofo tumau mo le filemu. O Lana talalelei o se talalelei o le filemu.²

O Lana talalelei e na o le pau lea o le tali i taimi ua toatele tagata i le lalolagi ua faateia i le fefe.³ Ua faamamafaina e lenei mea le manaoga faananati mo i tatou ia mulimuli i le faatonuga a le Alii i Ona soo ia “o atu ia … i le lalolagi uma, ma talai atu le talalelei i tagata uma.”⁴ Ua ia i tatou le tiutetauave paia e faasoa atu le mana ma le filemu o Iesu Keriso i tagata uma o le a faalogo ma ē o le a faamuamua le Atua i o latou olaga.

O tagata uma ua osia ni feagaiga ma le Atua ua folafola atu e popole i isi ma auauna atu ia i latou o ē mafatia. E mafai ona tatou faaali atu le faatuatua i le Atua ma saunia i taimi uma e tali atu ia i latou e fesili mai e uiga “i le faamoemoe o loo ia te i [tatou].”⁵ E tofu i tatou ma se matafaioi e fai i le faapotopotoina o Isaraelu.

O le asō ou te toefaamautu atu ai ua toe poloaiina e le Alii ia alii talavou agavaa uma lava, ma malolosi ia sauniuni mo ma auauna atu i se misiona. Mo alii talavou o le Au Paia o Aso e Gata Ai, o le galuega faafaifeautalai o se tiutetauave faaleperisitua. Na faapolopoloina outou alii talavou mo lenei taimi o loo tupu ai le faapotopotoina o Isaraelu na folafolaina. Pe a outou auauna atu i misiona, ua outou faia se matafaioi taua tele i le faapotopotoina o Isaraelu.

Mo outou tuafafine talavou ma malolosi, o se misiona o se avanoa mamana foi, ae tuu i le faitalia. Matou te alolofa i faifeautalai tamaitai ma talisapaia i latou ma le loto atoa. O le mea ua outou saofagā ai i lenei galuega e maoae! Tatalo ia iloa pe finagalo le Alii ia te oe e auauna atu i se misiona, ma o le a tali mai le Agaga Paia i lou loto ma le mafaufau.

Uo talavou pele, e taua outou taitoatasi i le Alii. Sa ia faapolopoloina outou seia oo i le taimi nei e fesoasoani ai e faapotopoto ia Isaraelu. O lau faaiuga e auauna atu i se misiona, pe o se misiona tala’i po o se misiona o auaunaga, o le a faamanuiaina ai oe ma le toatele o isi. Matou te talileleia foi ulugalii matutua e auauna atu pe a faatagaina ai e o latou tulaga. O a latou taumafaiga e le masuitulagaina.

O faifeautalai uma latou te aoao atu ma molimau atu e uiga i le Faaola. O le pogisa faaleagaga i le lalolagi ua matua manaomia atili ai le malamalama o Iesu Keriso i lo se isi lava taimi muamua. E manaomia e tagata uma le avanoa e iloa ai e uiga i le talalelei toefuataiina a Iesu Keriso. E manaomia e tagata uma ona iloa po o fea e mafai ona latou maua ai le filemu lea e “silisili lava i mea uma e manatu i ai.”⁶

Ia avea lenei konafesi ma se taimi o le filemu ma le tausamaaga faaleagaga mo oe. Ia outou saili ma maua faaaliga faaletagata lava ia i nei sauniga, ou te tatalo ai i le suafa paia o Iesu Keriso, amene.