“Pagpanglagad pinaagi sa Pagserbisyo,” Liahona, Ago. 2023.
Mga Baroganan sa Pagpangalagad
Pagpangalagad pinaagi sa Pagserbisyo
Kita mas mahisama sa atong Manluluwas kon kita magkat-on sa pagpangalagad sama sa Iyang gibuhat. Kita makahimo og dakong kalainan pinaagi sa sinsero nga pagserbisyo sa natural nga mga paagi.
Si Jesus “mianhi dili aron alagaran, kondili sa pag-alagad” (Mateo 20:28). Ang pagserbisyo usa ka bahin sa pagpangalagad tungod kay ang pagserbisyo mao man ang gibuhat sa Manluluwas. Matag karon ug unya, Siya mohunong aron maminaw, moayo, motudlo, mag-ampo, ug gani makigtambayayong sa mga tawo nga naglibot Kaniya, bisan sa kahapo, ang daghan nga nangayo sa Iyang pagpangalagad, o ang singgit sa katawhan.
Ang Bag-ong Tugon naghisgot usab sa uban nga mga tawo nga walay kahakog nga mitukod sa nahaunang Simbahan, lakip ni Phoebe, “kay daghan siyag gitabangan” (tan-awa sa Mga Taga-Roma 16:1–2); si Priscilla ug ang iyang bana, si Aquila (tan-awa sa Mga Buhat 18:1–3; Mga Taga Roma 16:3–5); ug daghan pang uban (tan-awa sa Mga Taga Roma 16:6–15). Samtang ang mga detalye sa ilang daghang pagserbisyo wala narekord, kining nahaunang mga Santos nakakita sa panginahanglan ug mipuno niini.
Usahay ang pagserbisyo mao ang usa ka sakripisyo, naglakip sa mga oras, mga adlaw, o gani mga tuig nga gipahinungod ngadto sa usa ka kawsa—ug usahay kini ingon ka yano lang sama sa paghalad og pag-ampo alang sa usa ka higala. Usahay dili ang unsay atong gibuhat ang makahimo og kalainan sa mga kinabuhi sa uban apan sa ngan lang nga kita anaa diha alang kanila.
Ang labing importante nga aspeto sa pagserbisyo sama sa gibuhat sa Manluluwas—bisan kon dili hamugaway—mao ang pagserbisyo sa sinsero, malumo, ug kinasingkasing nga paagi.
Pagpalambo og Tinguha sa Pagserbisyo
Samtang kita makaila sa Manluluwas, kita mas masayod kon unsay atong buhaton aron makaalagad puli sa Iyang dapit. Unsaon nato pagpalambo og Kristohanon nga hiyas sa pagkaandam nga moserbisyo?
-
Ikonsiderar unsa ang gipasabot sa pagserbisyo sama ni Jesukristo. Unsa man ang Iyang gihimo? Giunsa man Niya sa paghimo niini? Unsaon nato sa paggamit kadtong mga butanga sa atong kaugalingong pagserbisyo?
-
Adunay daghang panalangin nga moabot sa walay paghinakog nga pagserbisyo, lakip sa pagkabalda gikan sa atong kaugalingon nga mga palas-anon ug mga kabalaka, bisan kon sa kadali lang nga panahon. Apan si Jesus miserbisyo gumikan sa gugma, ug kita nagtinguha sa pagserbisyo sa ingon niining paagiha usab!
-
Ang pagserbisyo sa uban mao ang pagserbisyo ngadto Kaniya (tan-awa sa Mateo 25:40).
-
Sa bisan unsa nga kahimtang kita moserbisyo gihapon: “Ang labing dako kaninyo kinahanglang mahimo nga inyong sulugoon” (Mateo 23:11).
-
Kita mahimong magtinguha sa giya gikan sa Espiritu Santo pinaagi sa pag-ampo. Kon ang hunahuna sa pagbuhat og maayo moabot, kini dinasig (tan-awa sa Moroni 7:13). “Ayaw gayod langaya sa pagsunod og pag-aghat” (Thomas S. Monson, “The Spirit Giveth Life,” Ensign, Mayo 1985, 70).
-
“Ang kalalakin-an [ug kababayen-an] kinahanghalan matinguhaon nga moapil diha sa usa ka maayo nga katuyoan, ug mobuhat og daghan nga mga butang sa atong kaugalingon nga gawasnon nga kabubut-on, ug magpahinabo sa daghan nga pagkamatarong” (Doktrina ug mga Pakigsaad 58:27).
-
Ayaw og kahadlok sa pagserbisyo gamit ang inyong kamamugnaon, mga talento, ug personal nga mga kaikag.
-
Ang parserbisyo dili kinahanglan nga ingrande. Hinumdomi nga bisan sa yano nga mga butang—sama sa pagkaanaa alang sa usa ka higala, mahimong kini pinaagi sa paghatag og mainit nga pagkaon, pagsulat og kard, o bisan sa padala og mensahe sa text—makahimo na og kalainan. Ang importante nga butang mao ang pagtabang sama sa pagtabang sa Manluluwas dinhi sa yuta.
Bisan og ang pagdalit og serbisyo usahay salikwaot pamation, uban sa pagbansay ug pag-ampo kita makapalambo sa atong mga abilidad sa pagserbisyo sa labing maayo nga mga paagi. Latas sa panahon, ang serbisyo lagmit mahimong usa sa labing natural ug makapahimuot nga bahin sa atong inadlaw-adlaw nga mga kinabuhi.