“Ikaw Anaa sa Templo,” Liahona, Ago. 2023.
Mga Tingog sa mga Santos sa Ulahing mga Adlaw
Ikaw Anaa sa Templo
Ako mapasalamaton nga kanunay ko nga makadawat og kalig-on gikan sa pagserbisyo diha sa templo sa Ginoo.
Drowing sa Tokyo Japan Temple ni Alan Klay
Akong nakat-onan ang ebanghelyo gikan sa mga full-time nga misyonaryo ug nabunyagan sa edad nga 17 niadtong 1972. Tulo ka tuig ang milabay, isip usa ka organista, didto ako sa Budokan arena sa Tokyo sa dihang si Presidente Spencer W. Kimball (1895–1985) mipahibalo sa pagtukod sa Tokyo Japan Temple.
Human ang templo gipahinungod niadtong 1980, ako mibiyahe gikan sa Sendai hangtod sa templo sa kada bulan. Mobiya ko sa trabaho Biyernes sa gabii aron makatambong sa templo sa sunod adlaw. Ang akong tinguha sa pagtambong sa templo nagkalig-on, busa mibalhin ko sa Tokyo niadtong 1981.
Sa wala madugay human ko naminyo, ang akong bana, si Osamu, natawag sa pagserbisyo isip presidente sa stake. Makugihon siya nga nagserbisyo ug nalambigit sa pagtukod sa annex sa templo. Uban sa tabang niya ug sa among mga anak, ug sa paggiya sa Ginoo, ang akong mga ginikanan mipasakop sa Simbahan 20 ka tuig human sa akong bunyag.
Si Nobuko ug Osamu Maeda niadtong 1996.
Litrato sa maayong kabubut-on sa tagsulat
Human lang gyod sa ilang pagkakabig, ako naoperahan tungod sa kanser sa ibabaw sa akong papangig. Sa adlaw sa akong pag-opera, ang presidente sa templo, diin ako miserbisyo isip usa ka organista ug usa ka ordinance worker, nagpuasa ug nag-ampo alang kanako. Human sa akong pag-opera, naglisod ko nga mosulti, mokaon, mokanta, ug mobuhat sa uban nga normal nga mga butang.
“Kon dili ka makasulti,” ang presidente sa templo miingon kanako, “mahimo gihapon ka nga organista!”
Kana nakapadasig kanako sa pagpadayon sa akong pagserbisyo human ko naayo. Samtang motugtog ko sa organ sa chapel sa templo, napuno ko sa Espiritu sa Ginoo ug mibati nga nalig-on sa espirituwal ug pisikal nga paagi. Kanunay ko nga nagpasalamat ug hilom nga nag-ampo samtang gikanta ang mga pulong sa himno.
Napulo ka tuig human sa akong pag-opera, ang akong bana gi-diagnose usab nga may kanser. Siya sa wala madugay sulod ug gawas sa ospital. Sa wala pa siya mitaliwan, nagbilin siya niini nga mga pulong: “Ikaw anaa sa templo, busa ma-OK ra ka.”
Ang templo kanunayng anaa sa sentro sa matag importanteng desisyon nga akong gihimo sa akong kinabuhi sa hugot nga pagtuo. Sa akong pagtugtog sa organ diha sa chaplel sa templo sa matag adlaw, akong mas nasabtan og maayo ang plano sa katubsanan sa Ginoo—ilabi na human ang akong bana gitawag na lapas sa tabil.
Ako mapasalamaton nga kanunay ko nga makadawat og kalig-on gikan sa pagserbisyo diha sa templo sa Ginoo. Diha sa templo kami nagiyahan ug napalig-on aron makalahutay sa pag-antos ug kalisdanan niini nga kinabuhi.