Digital Lamang: Mga Young Adult
Nakadaot ba ang Pornograpiya sa Akong Abilidad sa Pagbati ug Paghatag og Gugma?
Naghinulsol na ko gikan sa paggamit sa pornograpiya, apan wala pa gihapon ko maayo.
Sa nag-edad ko og 14, naamgohan nako nga ako adunay problema sa pornograpiya. Magsige kog ingon sa akong kaugalingon, “Kahibalo ko nga dili kini maayo. Kinahanglan kong mohunong.”
Apan nakita nako ang akong kaugalingon nga nagbalikbalik sa sama nga laang. Nakigbisog ko niining pabalikbalik nga sikulo sulod sa pipila ka tuig. Ug human sa daghang mga pagsulay aron mohunong, akong nasayran nga dili nako mabuntog kini nga batasan nga ako lang. Tungod kay ang mga propeta kanunayng nagpasidaan nato nga mopalayo niini, naulaw ko nga mangayo og tabang ni bisan kinsa, lakip na sa akong Manluluwas. Nasayop ko sa daghan na kaayong higayon. Mibati ko nga dili ko angayan sa katubsanan. Apan sa kataposan nakadesisyon ko nga mangayo og tabang.
Sa akong pakigkita sa akong bishop mahitungod sa akong pakigbisog, mitubag siya uban sa gugma. Apan nagsugod ko og kaamgo og usa ka butang: ang akong mga pakigbisog sa pornograpiya mitabon sa akong abilidad sa pag-ila ug pagdawat og gugma—paghigugma sa akong kaugalingon, paghigugma sa uban, ug paghigugma sa Dios.
Nalaang sa sunod-sunod nga mga pagpamakak sulod sa katuigan, naghunahuna ko nga kon adunay masayod sa unsay akong gipakigbisogan, dili ko nila higugmaon. Naghunahuna usab ko nga ang gugma temporaryo ug dili tinuod.
Sa kadugayan, samtang naghinulsol ko, nag-ugmad og mas maayong mga batasan, ug nagpraktis og pagkontol sa kaugalingon ug maayong sundanan nga panghunahuna, misugod ko sa pagkaamgo nga si Jesukristo mibati sa akong pag-antos ug Siya ug ang Langitnong Amahan makapasaylo nako. Misugod ko sa pagbati og paglaom imbes kaulaw. Apan nagkinahanglan kini og pipila ka panahon aron makasugod sa pagsinati sa gugma sa samang paagi.
Pagbati ug Pagpakigbahin sa Gugma sa Dios
Pipila ka tuig ang milabay, nagmisyon ko! Nalipay kaayo ko nga nagserbisyo sa akong Manluluwas, apan ang grabeng epekto sa akong sekreto nga gipakigbisogan mitumaw sa akong kinabuhi isip misyonaryo. Naglisod pa gihapon ko sa paghigugma sa uban ug sa pagbati og gugma, ilabi na gikan sa Langitnong Amahan.
Wala pa gihapon nako mapasaylo ang akong kaugalingon. Naghunahuna pa gihapon ko nga dili ko angay nga higugmaon, bisan kon naningkamot ko pag-ayo sa pagbuntog sa akong kanhi nga batasan. Nahadlok ko nga mapasakitan o modapit og bisan unsa nga gugma sa akong kinabuhi tungod sa kahadlok nga masakitan, masagmuyo, ug mag-antos. Mao nga kanunay nakong papahawaon ang mga tawo palayo ug dili motugot nga makigsuod sila nako.
Usa ka gabii sa dihang labihan ang akong pagbati nga nag-inusara, nagluhod ko nga nangamuyo sa Langitnong Amahan alang sa tabang. Akong gipahayag Kaniya ang akong kasubo tungod sa kahadlok sa paghigugma sa akong kaugalingon, paghigugma Kaniya, ug paghigugma sa Iyang mga Anak bisan kon gustohon man nako.
Samtang naghilak ko, mibati ko ug klaro ug malumo nga impresyon sa akong hunahuna. Gibati nako nga ang Dios nagsulti nako nga OK ra nga mahigugma og maayo. Kana nga gugma usa ka gasa nga Iyang gihatag kanako—usa ka talento nga akong gitago. Mibati ko og kadasig nga kinahanglan ko nga mogamit ug mopalambo kini. Ingon nga ang gugma sa Dios alang nako walay kinutoban, kinahanglan ko nga mas mahigugma og maayo.
Kini nga kalooy gikan sa Espiritu nakapatandog kanako lapas pa sa bisan unsa nga butang nga akong gibati kaniadto. Gibati gayod nako ang gugma sa Langitnong Amahan—unsay ipasabot nga mahimo Niya nga anak. Usa kadto ka pagbati nga dili nako malitok.
Gusto ko nga mobuhat og mas maayo sa pagpakigbahin sa iyang gugma ngadto sa uban ug motugot sa uban sa pagpakigbahin niini ngari nako. Nag-ampo ko og mga kahigayonan nga mapalawman kini nga kapasidad sa paghigugma ug kadugayan napanalanginan og daghan kaayong mga kasinatian sa pagpakigbahin niini ngadto sa akong mga kaigsoonan.
Ang Kristohanon nga Gugma Makapausab sa Tanan
Naghinulsol na ko gikan sa paggamit sa pornograpiya, apan gikinahanglan pa gihapon nako nga ayohon ang akong kasingkasing. Ug kadto nga pagkaayo wala mahitabo sa usa ka higayon—ang gahom sa Manluluwas miabot pinaagi sa pagtinguha Kaniya pinaagi sa pagtuon sa mga kamatuoran diha sa mga kasulatan ug tinud-anay nga pag-ampo alang sa tabang. Misugod ko sa pagtuo nga Siya ug ang Langitnong Amahan nahigugma gayod nako nga motanyag nako og katubsanan. Gibati nako nga ang akong kasakit ug pagdumot sa kaugalingon hinayhinay nga nawala.
Ang istorya bahin sa kahoy sa kinabuhi diha sa 1 Nephi 8 nagtudlo kanako kon sa unsang paagi nga ako makapangita ni Jesukristo. Matag usa anaa sa lainlaing dapit sa kinabuhi. Usahay, ang pagkaplag sa atong dalan paingon Kaniya nagkinahanglan og panahon. Apan nasayod ko nga ang mahangtorong kalipay naghulat kanato samtang naghimo kita og mga lakang diha sa dalan sa pakigsaad paingon Kaniya.
Ang mga sayop dili motino kanato. Si Satanas gusto nga kita maghunahuna nga kita dili angay nga higugmaon ug dili takos. Apan dili kana tinuod. Kita gihigugma gayod sa hingpit. Ug si Kristo makatabang nato nga mobangon gikan sa atong mga sala.
Adunay daghang nakigbisog sa pornograpiya ug ubang mga batasan nga dili nila gusto, ug kasagaran, sama sa akong sitwasyon, kini nga mga batasan mograbe tungod sa pagtago ug pagpalayo. Apan nakita nako kon sa unsang paagi nga ang Kristohanon nga gugma makapausab sa tanan alang niadtong nakigbisog.
Kita kinsa nakigbisog makahimo sa unang lakang sa pagpangita sa kahayag pinaagi sa pagkamatinuoron. Ang pag-ugmad og lig-on, matarong nga relasyon uban sa atong Langitnong Amahan ug ni Jesukristo, sa inyong pamilya, ug sa inyong mga higala mao ang labing makatabang nga panalangin sa inyong mga paningkamot sa pag-ugmad og mas maayong mga batasan ug sa pagduol ngadto ni Kristo.
Sa pagpamulong ngadto niadtong nakigbisog sa pornograpiya, si Elder Ulisses Soares sa Korum sa Napulog Duha ka Apostoles mahigugmaong mitambag:
“Ang pagdapit sa pagduol ngadto sa Manluluwas nagpasabot nga paglaom. … Kon kita modawat niini nga pagdapit, kita nagpaubos sa atong kaugalingon atubangan Kaniya. … Ug unsa may ipasabot sa pagpaubos sa atong kaugalingon atubangan Kaniya? Tingali nagpasabot kini … nga mangayo og tabang gikan sa atong mga lider, gikan sa atong mga paryente, gikan sa atong mga pamilya, ug gikan sa medikal nga mga propesyonal. … Nagpasabot usab kini nga kita dili gayod mohunong sa pagpaningkamot. Walay tawo nga hingpit. Kitang tanan makahimo og mga sayop. … Ang Ginoo adunay hingpit nga gugma alang natong tanan. Nakasabot Siya sa atong kasakit, atong mga hagit, atong mga problema.
“Mao nga kon kita mopadangop sa atong mga kasingkasing ngadto Kaniya … ang Ginoo makapasaylo kanato, [Siya] makahangop kanato, makahigugma kanato, makasabot kanato, ug makatabang ug makahatag kanato og kalig-on nga dili mohunong. Ayaw kalimot nga ang grasya sa Ginoo anaa kaninyo sa wala pa, atol sa, ug ‘human sa tanan nga [inyong] mabuhat’ (2 Nephi 25:23).”1
Dili kita angay nga motago tungod sa kaulaw—kita makaduol, magmatinuoron, ug mangayo og tabang. Ang pagkasayod nga ako gihigugma sa Langitnong Amahan ug niadtong naglibot nako nakahimo og labing dako nga kausaban sa akong abilidad sa pagkaayo gikan sa paggamit sa pornograpiya ug sa mga epekto human niini, tungod kay kana nga kahibalo nakatabang nako nga makita nga ako angayan sa pagtubos, gihigugma, ug takos sa tabang ni Kristo.
Kitang tanan ingon gayod niana kon kita magtinguha Kaniya.