Ang Akong Paglaom alang sa usa ka Kinabuhi nga Gawasnon gikan sa Pornograpiya,” Liahona, Ago. 2023.
Mga Young Adult
Ang Akong Paglaom alang sa usa ka Kinabuhi nga Gawasnon gikan sa Pornograpiya
Ako adunay pagbati nga nakalingkawas o wala nay paglaom nga mabuntog ang pornograpiya, apan ang usa ka kausaban sa panglantaw nakahatag kanako og paglaom sa akong kaugalingon ug diha ni Jesukristo.
Detalye gikan sa Christ Walking on the Water [Si Kristo Naglakaw Ibabaw saTubig ], ni Robert T. Barrett
Ako unang nabantang sa pornograpiya sa dihang ako otso anyos pa. Wala koy ideya nga daotan kadto tungod kay walay usa nga naghisgot kanako mahitungod niini kaniadto. Apan sa dihang ako disesyete anyos na ug misugod sa pagkat-on mahitungod sa Ang Simbahan ni Jesukristo sa mga Santos sa Ulahing mga Adlaw, nakaamgo ko nga kini nga batasan nga akong gihimo sulod sa mga katuigan wala mahiuyon sa mga sugo o mga sumbanan sa ebanghelyo. Determinado ko sa pag-undang sa akong batasan samtang akong gipadayon ang pagsusi sa Simbahan ug sa kadugayan nahimong usa ka miyembro.
Sa sinugdanan ako nagtuo nga sayon lang ang pag-undang sa pagkagomon og pornograpiya. Makahimo ko sulod sa duha ka adlaw nga wala niini nga walay problema. Apan unya adunay makapaugtas nga mahitabo, ug mobalik na usab ang akong batasan. Kini nahitabo og kadaghan. Gibati kaayo nako ang hilabihan nga pagkaulaw, nahadlok nga ang mga tawo maghunahuna nga ako usa ka daotan og makahadlok nga tawo. Mao nga ako kining gitago sa tanan.
Nagpakitabang
Apan misugod ko sa pagbati og mga pag-aghat nga mangayo og tabang. Sa akong kaugalingon paningkamot makagahom lang ko og mubo nga panahon nga walay pornograpiya.
Sa dihang sa kataposan nagmatinuoron ko sa akong bishop ug sa ang akong suod nga higala, sila mapuanguron nga mitabang nako sa pagbiya. Miadto ko sa pagserbisyo og misyon, ug uban sa tabang sa akong presidente sa misyon, ako walay bisan unsang mga problema didto sa natad sa misyon.
Apan paglabay sa usa ka semana human ko nauli, ang COVID nga pandemiya misugod. Nag-inusara, nagmahadlokon, ug naguol, Ako mibalik sa akong daan nga batasan. Ako nanglimbasog hapit sa matag-adlaw, apan nakat-on ko nga mahimong dayag mahitungod niini ug nangita pag-usab og tabang gikan sa mga minahal.
Misugod ko sa pagtambong sa Brigham Young University. Nasayod ko nga gikinahanglan nakong makontrolar ang akong problema, apan bisan unsaon nako, masipyat ko kon ako mag-inusara ug maugtas. Sa matag higayon nga maningkamot ko ug mapakyas, mibati ko nga mobalik na usab ko sa uno. Ako mobasa sa akong kasulatan, nag-ampo sa kanunay, ug gibuhat ang tanan nga akong mahimo sa pagkonektar ngadto ni Kristo, apan nagkawala ang akong paglaom. Ang pornograpiya nakababag sa akong pag-uswag sa kinabuhi sa daghang paagi, ilabi na sa espirituhanong paagi.
Ug dayon nadiskobrihan nako ang BYU club diin ang mga estudyante nga nanglimbasog sa pornograpiya magkatigom ug mosuporta sa usag usa. Ang mga tawo nga akong gikahimamat mahigugmaon ug matinabangon kaayo. Gikan pa sa sinugdanan, sila mitabang sa pagpahibalik sa akong paglaom alang sa kinabuhi nga gawasnon gikan sa pornograpiya.
Detalye gikan sa Christ Raising the Daughter of Jairus [Si Kristo Mibanhaw sa anak nga Babaye ni Jairo], ni Greg K. Olsen
Ang Pagpaningkamot Mao ang Yawe
Hugot nga pagtuo, paglaom, ug ang grupo sa inadlaw adlaw nga pagkamaytulubagon ang nakatabang nako sa pasugod sa pagbiya gikan sa pornograpiya sulod sa mas taas nga panahon. Usa ka semana molabay nga walay pornograpiya, dayon duha ka semana, dayon usa ka bulan. Akong nakab-ot ang kanhi dili maabot nga gitas-on sa panahon. Usa kadto ka milagro. Akong nakat-onan nga aron makahimo og kauswagan, ako nagkinahanglan makakab-ot og ginagmay nga mga tumong imbis sa pagbati nga nakalingkawas o wala nay paglaom.
Hingpit akong moangkon nga ang akong panaw sa pagbuntog sa pornograpiya wala pa gyod matapos. Ang pornograpiya komplikado ug magsugod gikan sa wala makab-ot nga mga panginahanglan o sa uban nga nagpahipi nga mga problema nga kinahanglan maresulba. Kon sa estatistika nga pagkasulti, mahimong mobalik na usab ko, apan ang akong paghunahuna nausab na.
Ako naningkamot. Ako naningkamot sa matag adlaw nga modangop sa temporal ug espirituwal nga mga kapanguhaan ug ngadto ni Jesukristo aron tabangan ako nga mahimong mas maayo. Ang akong kidlap sa paglaom nagtubo sa matag higayon nga ako mopili sa pagbiya gikan sa pornograpiya; ang pagbati makapahingangha.
Kaniadto naghunahuna ko nga ako usa ka makahahadlok nga tawo tungod niini nga problema, apan si Brother Bradley R. Wilcox, Ikaduhang Magtatambag sa Kinatibuk-ang Kapangulohan sa Young Men, mipakigbahin og pipila ka mga pulong nga naghatag kanako og paglaom: “Ang uban nasayop sa pagdawat sa mensahe nga sila dili takos sa pag-apil sa hingpit sa ebanghelyo tungod kay sila dili hingpit nga gawasnon sa dili maayo nga mga batasan. Ang mensahe sa Dios mao nga ang pagkatakos dili ang pagkawalay tatsa. Ang pagkatakos mao ang pagkahimong matinuoron ug mapaningkamoton. Kita kinahanglan nga magmatinuoron sa Dios, mga lider sa pagkapari, ug sa uban kinsa nahigugma kanato,ug kita kinahanglan nga maningkamot sa paghupot sa mga sugo sa Dios ug dili mohunong tungod kay kita nasayop.”1
Sama sa usa ka batang lalake sa iyang pakigpulong nga nanglimbasog batok sa pornograpiya, Ako naningkamot alang sa “gamay, makab-ot nga mga tumong” ug “anam-anam nga paglambo,” imbis “dili gawasnon o walay paglaom.”2
Layo na ang akong naabtan sa pagbuntog sa pornograpiya tungod sa tabang nga akong nadawat gikan sa mahigugmaon nga mga lider sa Simbahan ug mga higala. Apan unsa usab ang nakatabang kanako mao ang balaan nga mga pamatasan. Kon ako manglimbasog sa hilabihan, ako sa kasagaran mibati og pagkadili takos sa pag-apil sa espirituhanon nga mga buhat—nasayop ko sa pagtuo nga ang Langitnong Amahan ug si Jesukristo naulawan kanako. Apan nakat-on ko nga Siya kanunayng nagdapit kanako sa pagdangop ngadto Kanila pinaagi sa kasulatan, pag-ampo, ug sa pagsimba sa templo aron magamit ang ilang makaalim nga gahom, ilabi na atol sa akong labing ngitngit nga mga gutlo.
Ako walay pagduha-duha nga samtang Ako mopadayon sa pagpaningkamot, Ako makahimo sa pagbalik usa niana ka adlaw ngadto sa akong Amahan sa Langit nasayod nga akong gibuhat ang akong labing maayo. Ug ako mobakho diha sa tiilan sa akong Manluluwas, nga si Jesukristo, sa paghimo niining posible. Ako labaw pang mapasalamaton alang sa gasa sa Iyang Pag-ula ug alang sa mga kahigayonan nga Iyang gihatag kanako samantang ako magpadayon sa pagpaningkamot.
Hugot nga Pagtuo ug Paglaom diha ni Kristo
Kon ikaw nagsagubang og batasan sa pornograpiya, hibaloi nga wala ka mag-inusara. Ayaw paghunong. Ang panaw sa pagbuntog magkinahanglan og panahon, hugot nga pagtuo, ug paningkamot. Apan sa pagkatinuod nga ikaw naningkamot nga matabangan nagpasabot nga ikaw anaa sa hustong dalan. Dangop ngadto sa Dios. Dangop ngadto niadtong nagmahal kanimo. Pangayo og tabang. Pagmatinuoron ug pagmapainubsanon. Pahibaloa ang imong mga lider sa Simbahan nga ikaw nanglimbasog.
Si Jesukristo nag-uban kanimo samtang ikaw naningkamot sa pagbuntog, bisan pila pa ka higayon ang gikinahanglan. Siya nasayod sa imong maayo nga kasingkasing ug sa imong balaan nga bili. Ang imong mga paningkamot nangahulogan sa tanang butang ngadto Kaniya, ug samtang mopakita ka og hugot nga pagtuo, Siya molugway sa Iyang kalooy nganha kanimo aron tabangan ka sa pagbuntog sa imong kahuyang (tan-awa sa Ether 12:27). Sama sa gisaad ni Presidente Russell M. Nelson, “Ang hugot nga pagtuo diha kang Jesukristo mao ang kinadak-ang gahom nga atong magamit niini nga kinabuhi. Ang tanan nga butang mahimo ngadto sa magatuo.”3