“Pagiya sa Kabataan ngadto sa Manluluwas,” Liahona, Ago. 2023.
Pagiya sa Kabataan ngadto sa Manluluwas
Sa unsang paagi nga ang programa sa Kabataan ug Kabatan-onan makapadasig sa kabataan ug kabatan-onan sa hinayhinay nga mahimong mas sama ni Kristo.
Imahe ni Kristo, ni Heinrich Hofmann
Bisan pa man sa kabug-at sa Iyang misyon, ang Manluluwas migahin og higayon sa pagpangalagad ngadto sa kabataan. Siya midapit kanila sa pagduol ngadto Kaniya ug mapanalanginan. (Tan-awa sa Marcos 10:13–16.) Sama nga si Kristo migahin og panahon sa paggiya sa kabataan sa ilang linghod nga pangidaron, ingon usab kita.
Ang Simbahan milunsad sa programa sa Kabataan ug Kabatan-onan niadtong 2019 aron matabangan ang kabataan ug kabatan-onan sa paglig-on sa ilang hugot nga pagtuo diha ni Jesukristo ingon man sa pag-ila ug pagsabot sa mga pag-aghat gikan sa Espiritu Santo samtang sila magtinguha sa pagsabot sa plano sa Langitnong Amahan alang kanila. Makatabang kini kanila nga personal nga molambo ug moapil diha sa buhat sa kaluwasan ug kahimayaan. Ang importante nga bahin niini nga programa mao ang paggiya sa batan-on nga miyembro sa “pagsunod sa ehemplo sa Manluluwas samtang [sila] magtubo.”1 Atong makat-onan sa kasulatan nga “mitubo si Jesus sa lawas ug sa kinaadman ug gikahimut-an siya sa Dios ug sa mga tawo” (Lucas 2:52). Kini nga sundanan gikan sa sayo nga bahin sa kinabuhi sa Manluluwas nakatabang sa kabatan-onan nga molambo sa upat ka paagi: intelektuwal, pisikal, espirituwal, ug sa sosyal nga paagi.
Samtang namalandong diha sa mga kalihokan ug sa mga proyekto sa pagserbisyo sa ubos, pangutan-a ang inyong kabataan unsa ang ganahan nilang sulayan. Daghan pa nga mga ideya ang makita diha sa childrenandyouth.ChurchofJesusChrist.org.
Usa ka ward sa Missouri, USA, nakat-on og dugang pa kabahin sa Basahon ni Mormon sa usa ka kalihokan nga gitawag og “Camp Nephi.”
Litrato pinaagi ni Sheri Skog
Espirituwal
“Si Jesus mitubo sa “kahimuot kaniya sa Dios.” Mahimo ka nga mouswag sa espirituhanong paagi pinaagi sa pagpakita sa imong gugma ngadto sa Dios ug sa imong kaandam sa pagsunod sa ebanghelyo.”2
Si Gloria Pereira, usa ka inahan gikan sa Chile, miingon, “Ang [kabataan] makapalig-on sa ilang espirituwal nga pagkatawo pinaagi sa pagpalambo og mga tumong nga masubay sa ilang mga personalidad ug mga tinguha.”
Si Daniela Moreira, usa ka presidente sa Primary gikan sa Mendoza, Argentina, miingon nga ang kabataan sa iyang ward naningkamot sa pagsabot sa katuyoan sa templo. Aron makab-ot kini nga tumong, mibisita sila sa konstruksiyon sa Mendoza Argentina Temple. Nakat-onan usab nila kon unsaon nga maselyo ang pamilya diha sa templo ug sa kadugayan naghimo og modelo nga templo.
“Ang mga kalihokan sa espirituwal nga aspeto mao ang kadtong magbilin og labing importante nga timaan sa mga bata,” miingon si Daniela. “Nakat-onan nila ang pag-ila ug pagbati sa makanunayon nga pagkig-uban sa Espiritu Santo ug mahimong pamilyar sa maong pagbati.”
Mga ideya sa espirituwal nga kalihokan: Mopasiugda og usa ka miting sa pagpamatuod; magmemorya sa inyong paborito nga kasulatan; magpahigayon og usa ka gabii sa pangutana ug tubag uban sa bishopric o kapangulohan sa branch; motambong sa bunyag; magbuhat og family history aron maandam ang mga ngalan alang sa templo; mobasa sa kasulatan nga nalista ubos sa imong paborito nga mga himno; mopahulay sa social media.
Si Dayra—usa ka batan-ong babaye gikan sa Nuevo León, Mexico—nagpintal og mga pulong sa pagdasig diha sa mga bato aron ihatag sa mga silingan.
Litrato pinaagi ni Melissa Sue Lara Garza
Sosyal
Si Jesus miuswag sa “kahimuot … sa tawo.’ Mahimo ka nga mouswag sa sosyal nga paagi pinaagi sa pagpakita og gugma sa tanang tawo.”3
Si Melissa Lara gikan sa Mexico mipaambit kon giunsa sa iyang anak nga babaye, si Dayra, sa pagtakda og tumong sa paghatod og mga mensahe sa pagdasig atol sa COVID-19 nga pandemiya: “Nag-adorno siya og mga bato nga adunay mga sulat, gipang-apod-apod kini sa iyang lugar, ug mibilin niini diha sa pultahan.” Sa usa ka balay, usa ka mas tigulang nga babaye miabli sa pultahan ug nangutana kon unsa ang iyang gibuhat. Human mipasabot si Dayra sa iyang proyekto, ang babaye nangutana kon unsa nga mga pulong ang gisulat ni Dayra alang kaniya. Si Dayra misulti kaniya, “Ikaw makapadayon sa unahan. Kami magauban kanimo.”
Si Melissa miingon, “Ang babaye nga may luha ang mga mata misulti, ‘Salamat; kadto nga mga pulong nga akong gikinahanglan nga madunggan. Nagsagubang ako og hagit ug nag-ampo. Dayon miabot ka sa akong pultahan aron sa paghatag kanako og mensahe nga akong gikinahanglan.’ Mapasalamaton ko sa akong anak nga babaye nga mipaambit sa iyang pagpamatuod. Misulti siya nako nga, ‘Ma, wala ko kahibalo nga ang akong gibuhat adunay epekto.’”
Mga ideya sa sosyal nga kalihokan: Makig-istoya ngadto sa usa ka tawo nga adunay trabaho nga imong gipangandoy; magtudlo sa manghod; magsulat ngadto sa mga misyonaryo; motupad og lingkod sa usa ka tawo nga bag-o atol sa tingpaniudto; magdapit og usa kahigala ngadto sa kalihokan sa Simbahan; magmemorya sa mga ngalan sa mga miyembro sa ward o branch; mopaila sa imong kaugalingon ngadto sa usa ka silingan nga wala pa nimo makaila; maghimo og usa ka pormal nga panihapon aron magkat-on og pamatasan sa kan-anan.
Pisikal
‘Si Jesus mitubo sa ‘gidak-on.’ Mahimo ka nga makat-on sa pagtrabaho ug pag-atiman sa imong lawas, sa kahimsog sa imong pangisip, ug sa mga gilalang sa Dios.”4
Karla Duare, usa ka inahan gikan sa Nicaragua, mipakigbahin niining ehemplo: “Pipila ka mga bata nagtakda og usa ka tumong sa pagkigkolaborasyon sa kalihokan sa pagpanglimpyo sa panimalay, sa pagkat-on sa pagluto og putahe, ug sa paghimo og gamay nga mga tanaman uban sa tabang sa laing mga sakop sa pamilya.”
Kon kita magpakabana sa atong mga lawas sama sa usa ka templo, atong gitugotan ang Espiritu Santo nga mopuyo kanato. Nagkalain-lain ang kahimsog sa mga panginahanglan ug mga abilidad, apan ang mga batan-on makatakda og talagsaon nga mga tumong aron mapauswag ang ilang kaugalingon nga kahimsog.
Mga ideya sa pisikal nga kalihokan: Pagplano og usa ka makalingaw nga tulumanon sa ehersisyo; maglakaw; mangguna sa nataran sa silingan; magputos og 72-hour kit; makig-istorya uban sa magtatambag mahitungod sa depresyon; magpraktis sa pagginhawa og lawom ug sa pagrelaks sa imong lawas; magluto og himsog nga pagkaon; magkat-on mahitungod sa Pulong sa Kaalam; magpraktis og first aid.
Intelektwal
“Si Jesus miuswag sa ‘kaalam.’ Mahimo ka nga moeskwela, magkat-on og bag-o nga mga kahanas, ug mopalambo sa imong mga talento.”5
Si Avigail Rodriguez gikan sa Bolivia nagbantay sa iyang sais anyos nga anak nga lalaki, si Bruno, nagtakda ug mikompleto sa iyang tumong sa pagkat-on sa Artikulo sa Hugot nga Pagtuo. Bisan og si Bruno naglisod sa pagbasa, si Avigail miingon nga ang pagkab-ot niining tumong nakatabang ni Bruno nga mamahimong “usa ka maayo kaayo nga tigbasa. Ang iyang sunod nga tumong mao ang pagkompleto og basa sa Basahon ni Mormon sa dili pa ang iyang bunyag, ug iya kining nakab-ot.”
Ang kabataan makapausbaw sa ilang kahibalo sa mga dapit nga nakapadasig kanila sa pagkat-on. Gikan sa astronomiya hangtod sa zoology, sa kanunay adunay butang nga madiskobrihan.
Mga ideya sa Intiliktuwal nga kalihokan: Mopahigayon og gabii sa talento; mosulat og usa ka journal; mobasa og usa ka libro; motan-aw sa mga bitoon; magkat-on sa pagtukar og instrumento sa musika; maghimo og origami; magtuon sa trabaho sa kamera; magpahigayon og mga eksperimento sa siyensya, magpraktis og spelling sa tag-as nga mga pulong.
Ang Tahas sa mga Ginikanan
Samtang ang kabataan giawhag sa pag-apil sa mga kalihokan ug mga proyekto sa pagserbisyo isip usa ka ward o branch, ang makapadasig nga paglambo magsugod sa panimalay. Ang Ginoo nagsulti sa mga ginikanan, “Ako nagsugo kaninyo sa pag-amuma sa inyong mga anak diha sa kahayag ug kamatuoran” (Doktrina ug mga Pakigsaad 93:40). Ang mga lider sa kabatan-onan makatanyag og suporta, apan ang mga ginikanan ang labing nakaila sa ilang mga anak. Sila mahimong makigtambayayong sa ilang mga anak sa tinagsa-tagsa diha sa ilang personal nga paglambo, tungod kay “ang atong mga talento ug mga tumong ingon ka lahi sama kanato.”6
Si Presidente Russell M. Nelson miawhag sa mga ginikanan nga ihatag sa mga bata ang “gugma, pag-awhag, ug tambag. Apan batuki ang tintasyon nga ikaw ang magbuot niini. Mobuhat sila sa labing maayo kon sila mogamit sa ilang kaugalingon nga kabubot-on.”7
Si Anahi Hernández, usa ka inahan gikan sa Mexico, miingon, “Sa sinugdanan ako misugyot sa akong mga anak kon unsa ang tumong nga itakda, sama sa pagtugtog sa piano. Apan akong naamgohan nga ang programa nakatutok sa unsa ang gusto sa kabataan nga makat-onan ug mapalambo.”
Gitugotan ni Anahi ang iyang mga anak sa pagpili sa mga kalihokan nga ilang gusto nga sulayan: “Sa matag higayon nga akong dapiton ang akong mga anak sa pagbuhat sa ilang mga tumong, ako mangutana kanila, ‘Unsa ang gusto ninyong makat-onan?’ “Unsa ang gusto ninyo nga sulayan?” Ug dayon sila mopadayag sa ilang mga tinguha, ug mas makaila ko nila og maayo.”
Diyes anyos nga si Karla gikan sa Managua, Nicaragua, nagtakda og usa ka tumong nga makat-on sa pagpintal.
Litrato pinaagi ni Karla Valeria Duarte Manzanares
Ang Kabataan ug Kabatan-onan Gusto nga Molambo
Dinasig pinaagi sa Kahayag ni Kristo, ang atong kabataan matinguhaon sa pagkat-on, motubo, ug moserbisyo. Sila gusto nga mamahimong sama sa ilang Manluluwas pinaagi sa personal nga pag-uswag.
Si Shelem Castañeda, usa ka presidente sa Primary gikan sa usa ka branch didto sa Mexico, miingon, “Akong hatagan ang mga nag-edad og 11 anyos sa tahas sa lider, ug sila moorganisar ug adunay inisyatibo sa pagpatuman sa uban nga kalihokan. Ako nahingangha sa ilang kahingkod, sa ilang kaandam sa pagtabang ug sa pagkat-on.”
Ang kabataan adunay katungod nga makadawat og personal nga pagpadayag pinaagi sa mainampuon nga pagdeskobre ug pagbuhat sa usa ka makahuluganon nga katuyoan. Ang atong tumong mao nga “tugotan ang mga batan-on nga mangulo,”8 moila nga sila makahimo ug tinuoray nga gustong mouswag.
Mao nga asa man kamo magsugod? Si Cole Rosenberg, usa ka tigtambag sa kabatan-onan sa ward gikan sa Estados Unidos, miingon, “Kami mitrabaho aron imodelo kon unsa ang malamposon nga pagplano, dayon dili na manghilabot ug tugotan ang kabatan-onan nga mag-organisar sa mga sesyon sa pagplano ug sa pagpatuman sa kalihokan.”
Tabangi ang inyong kabataan nga (1) makaila sa mga pag-aghat sa Espiritu Santo, (2) makadiskobre og mga tumong, (3) makaplano kon unsaon sa pagkab-ot niini, (4) makabuhat niana nga plano, ug (5) makapamalandong sa ilang kasinatian. Sa kinatibuk-an, kon magkadako ang kabataan, mas daghan ang ilang mabuhat niini nga mga lakang sa ilang kaugalingon.
Ang pagsunod niining lima ka lakang makatugot sa kabataan nga mahimong tinugyanan sa ilang paglambo pinaagi sa mga pagplano, inisyatibo, ug Kristohanon nga tinguha sa pag-uswag.
Ang misyon sa programa sa Kabataan ug Kabatan-onan mao ang “[pag]tabang sa kabataan, kabatan-onan, ug ang ilang mga pamilya nga mouswag diha sa dalan sa pakigsaad samtang ilang atubangon ang mga hagit sa kinabuhi.”9 Samtang mogiya kita sa kabataan ug kabatan-onan sa Simbahan ngadto sa ilang Manluluwas, atong hinumdoman kon sa unsang paagi Siya milambo. Atong dungog nga makita ang paglambo mismo.