Digital Lamang: Mga Young Adult
Pagkontrolar sa Kaugalingon: Balikbalik nga Proseso sa Pagsulay ug Pagkapakyas
Naglisod ka ba sa pagsugod—o paghunong—sa pagbuhat sa butang, bisan kon ikaw gusto gayod kaayo? Ania ang lima ka lakang sa pagpalambo og dugang nga pagkontrolar sa kaugalingon.
“Opps, gibuhat na usab nako!”
Nakasulti ka na ba niana sa imong kaugalingon human og kaon sa cake ug gisaaran ang imong kaugalingon nga dili na nimo buhaton? O human sa pag-scroll sa pipila ka post nga lapas na sa imong tingkatulog, o masuko dihang miingon ka nga dili na ka masuko? Tingali kitang tanan naglisod sa paghunong sa pagbuhat sa butang bisan kon kita sa tinuoray nagtinguha sa paghunong.
Ang pagpraktis og kontrol sa kaugalingon usa lamang ka aspeto sa pagkadisipulo. Diha sa Basahon ni Mormon, si Alma miawhag sa iyang anak nga lalaki nga si Shiblon sa “pagpugong sa tanan nimo nga mainit nga mga pagbati, nga ikaw mapuno [sa gugma]” (Alma 38:12). Ingon nga ang usa ka rinda makapugong sa kaisog sa hayop, ang pagpalambo usab sa pagkontrolar sa kaugalingon nga maoy mopatigbabaw sa atong mga emosyon ug mainit nga mga pagbati makatabang kanato nga makabaton og mas abunda nga Espiritu.
Apan ang pag-angkon og kontrol sa kaugalingon dili sayon. Kasagaran usa kini ka balikbalik nga proseso sa pagsulay ug pagkapakyas hangtod nga makab-ot nato kini. Apan aniay pipila ka sugyot aron matabangan kamo sa inyong mga paningkamot nga mapasiugdahan ang mas maayo nga pagkontrolar sa kaugalingon.
Motutok diha sa Manluluwas
Bisan kon naningkamot kita sa pagbuhat sa atong labing maayo, kita makahimo og mga sayop. Ang tanan gayod. Kon kana mahitabo, bation dayon ang pagkawalay paglaom o maghunahuna kon mahimo pa ba kita nga mas maayo. Sa mga pulong ni Elder Michael A. Dunn sa Seventy, ang kinabuhi “usahay mabati nga daw 1 ka porsento nga pag-uswag ug 2 ka porsento nga pag-atras.”1
Apan ang Manluluwas mahigugmaong nagdapit kanato nga magpadayon sa pagpaningkamot. Siya molig-on ug motabang kanato. Siya mousab sa atong mga kasingkasing ug kinabuhi. Ang atong koneksiyon sa pakigsaad uban Kaniya magdala nato og mas dakong kasayon sa pagkab-ot sa Iyang gahom. Kon kita “magpabilin nga dili matarog sa atong determinasyon nga makanunayong maningkamot sa pagbuhat niadtong 1 ka porsento nga mga pag-uswag, Siya kinsa ‘[mi]pas-an [sa] atong mga alantuson’ [Isaias 53:4] seguradong motabang kanato.”2
Ayaw Pagpakawala sa Paglaom
Tugoti ko nga ihulagway kining punto pinaagi sa usa ka istorya. Usa ka pamilya nagplano nga mobiyahe aron sa paglingawlingaw. Naghinamhinam sila nga mobisita sa usa ka bag-ong dapit ug maghimo og nindot nga mga panimpalad.
Mga tungatunga sa ilang biyahe, ang ilang sakyanan naguba. Nangaguol sila ug nawad-an og paglaom. Gibati nila nga ang ilang tanang paningkamot nakawang lamang, busa nakahukom sila nga mopauli ug mobalik sa sinugdanan sa ilang pagbiyahe.
Karon, makaingon ka sa imong kaugalingon, pagkakataw-anan niana—nganong mobalik man sila sa sinugdanan? Apan dili ba mao man kana ang atong gibuhat usahay? Usahay mawad-an kita og paglaom o sayop nga maghunahuna nga ang usa ka gamayng sayop mopapas sa tanang kalamboan nga atong nahimo. Apan ang mga sayop dili mopapas sa kalamboan nga atong nahimo samtang naningkamot kita nga mas mahisama kang Jesukristo. Sama sa gipasabot ni Elder Dieter F. Uchtdorf sa Korum sa Napulog Duha ka Apostoles: “Si Jesukristo, ang Anak sa Dios, namatay aron nga ang atong mga sayop dili mokondenar nato ug sa kahangtoran mahunong ang atong kauswagan. Tungod Kaniya, kita makahinulsol, ug ang atong mga sayop mahimong makatabang ngadto sa mas dakong kalipay.”3 Kita kinahanglan nga magmapailobon sa atong kaugalingon ug magpabiling malaomon.
Paghimo og Gagmay nga mga Tumong
Adunay mga panahon nga ang atong mahunahunaan lamang mao ang atong pagsige og kapakyas. Maghunahuna kita kon makab-ot ba kaha nato ang kahimtang sa pagkontrolar sa kaugalingon nga atong gusto. Apan niining mga higayona, tingali hilabihan ra gayod ang atong pagdahom sa atong kaugalingon (tan-awa sa Mosiah 4:27).
Wala kini magpasabot nga mohunong kita sa atong paningkamot aron makabaton og kontrol sa kaugalingon. Kondili, kinahanglan kita nga motutok sa unsay makab-ot nato sa pagkakaron. Si Presidente M. Russell Ballard, Akting nga Presidente sa Korum sa Napulog Duha ka Apostoles mitambag nga kita kinahanglang “[mag]takda og mga tumong nga maayong pagkabalanse—dili labihan kadaghan dili sab labihan ka diyotay, ug dili labihan ka taas o labihan ka ubos. Pag-ampo alang sa balaanong giya sa imong paghimo og tumong.”4
Kon atong makab-ot ang matag gagmay nga tumong, sa kadugayan atong makita kon unsa na kadaghan ang atong nakab-ot kon kita nagtutok lamang sa mga butang sa sunod nga lakang imbes sa kataposang linya.
Pagpalambo og Himsog nga mga Mekanismo sa Pagsagubang
Kita usahay mosagubang sa mga emosyon pinaagi sa pagbuhat og butang nga mopabati nato og lahi. Pananglitan, kon gikapoy kaayo ko, ganahan kong mokaon og makahupay nga pagkaon. Apan usahay kini nga mga kinaiya mahimong bati nga batasan nga lisod nang undangon.
Makatabang ang pagpamalandong ug pagsabot sa bisan unsa nga mga timailhan nga anaa kanato. Kon ako dunay batasan nga mogamit sa akong selpon kon gilaay ko, niana makapokus ko kon nganong gibati kog kalaay. Kon makahimo ko og mabungahon nga mga kalihokan aron masagubang ang akong kalaay, mas sayon ang pagpalambo og kontrol sa kaugalingon kalabot sa paggamit sa akong selpon.
Ang Manluluwas misaaad nga ang “mahuyang nga mga butang” mahimo nga malig-on kon kita moduol ngadto Kaniya ug mangayo sa Iyang balaanong tabang (Ether 12:27).
Pagpraktis og Kalooy sa Kaugalingon
Sa atong mga paningkamot nga mas mahimong sama sa Manluluwas, tingali mobati kita og dili maayo sa atong kaugalingon kon kita dili makasunod sa Iyang ehemplo. Kita usahay mosulti sa atong kaugalingon og negatibong mga butang sama sa, “Dili gyod ko maayo,” o, “Buangbuang ko!” Tingali naghunahuna kita nga kini nga mga mensahe mao ang tukmang silot o kinahanglanon aron mas madasig ang atong kaugalingon. Apan, kana nga mga mensahe makadaot kanato ug mas makapalisod sa mga butang—ug dili gayod kini gikan sa Dios.
Kon ang buotang higala miduol nato ug mipakigbahin sa ilang tinguha ug mga paningkamot nga mahimong mas maayo apan mipakigbahin usab sa ilang mga kapakyasan ug kasaypanan, unsay inyong isulti nila? Dili ba kita modasig kanila, mosulti nila kon unsa kita ka mapagarbohon nila, ug malipay sa ilang ginagmay nga kalamposan?
Buhaton usab nato kana sa atong kaugalingon. Imbes silotan ang atong kaugalingon, atong dayegon ang maayo nga atong nahimo ug tan-awon ang atong mga sayop isip oportunidad nga mahimong mas maayo.
Kita mga anak sa Dios. Ug kita makatutok sa atong balaanong pagkatawo imbes sa paghingalan sa atong kaugalingon base sa bisan unsa sa atong nabatasan o mga problema. Ang Langitnong Amahan naghatag nato og daghang ikaduhang mga higayon kutob sa atong gikinahanglan (tan-awa sa Isaias 55:7). Makapaninguha kita nga ihatag usab kini sa atong kaugalingon.
Ang Manluluwas Mao ang Atong Kalig-on
Tingali mobati kita nga kini imposible karon, apan sa kadugayan kita mahimo nga mas maayo. Ang Manluluwas misaad nato nga kon kita mobuhat sa atong bahin, magpabilin diha sa dalan sa pakigsaad, ug molahutay hangtod sa kataposan, ang Iyang grasya igo alang kanato (tan-awa sa Ether 12:27). Kinahanglan lang kita nga mopadayon sa pagsulay; mopadayon sa pagtuo; ug mapailobon nga “maghulat sa Ginoo” (Isaias 40:31). Alang nako, makahatag gayod kini og kasegurohan. Samtang maningkamot kita sa pagpalambo sa atong kaugalingon, ang Ginoo molig-on ug mogiya gayod kanato.