Sapos i nogat Buk blong Momon, Bae Mi Neva Save

Iven we mi no strong long Jos taem mi gat 14 yia oli bin invaetem mi blong go long seminari. Long tabu wei Lod i bin blesem mi wetem wan simpol be wan gud ansa long wan prea sam dei i pas mo mi rere blong akseptem invitesen ia. Long yia ia, mifala i bin stadi long Buk blong Momon. Tru long sapot blong wan naesfala tija blong mi mo ol klasmet blong mi, mi akseptem invitesen ia blong ridim Buk blong Momon long yia ia. Wanem we i moa impoten i we mi akseptem invitesen blong profet Moronae blong askem God sapos buk ia i tru (luk long Moronae 10:3–5).

Afta we mi stat blong go long seminari, mi prea long Papa blong mi long Heven bakegen, wetem wan tru hat mo wan tru tingting, blong wantem save miwan sapos we Buk blong Momon i tru, mo se i tru we Josef Smit i transletem buk ia tru long presen mo paoa blong God olsem we hem i bin talem. Semmak filing we mi bin eksperiensem fastaem i kavremap mi. Filing blong klin lav i fulumap mi, mo mi save—mi save gud—se Buk blong Momon i tok blong God.

Be long semmak taem mi save se Buk blong Momon i tru, Jisas Kraes i Sevya blong mi, Josef Smit i profet blong Hem, we oli odenem hem finis blong putumbak tru Jos blong Lod long wol ia, mo wan profet we i stap laef long wol ia i stap givim kaonsel mo gaed we mi nidim blong folem taem mi stap traehad blong laef folem ol komanmen mo ol standet blong Jos. Hemia i ol bigfala samting blong save olsem wan boe we i gat 14 yia i save.

Save ia i jenisim mi. Mi wantem blong kam gud. Mi wantem blong mekem ol gud samting, mo taem we mi mekem ol mistek mi sore long wanem mi mekem, mi sakem sin, mo dipen long Lod blong helpem mi kam moa gud. Fet blong mi long Jisas Kraes i stap gro evri dei tru long testemoni blong mi we i stap kam strong moa mo save blong mi long ol tijing insaed long Buk blong Momon.

Presiden Russell M. Nelson i askem ol memba blong Jos blong tingting long ol trifala kwestin ia: “Faswan, ?bae laef blong yu i olsem wanem sapos yu nogat Buk blong Momon? Nambatu, ?wanem nao bae yu no save? Mo nambatri, ?wanem nao bae yu nogat”?¹

Sapos yu no mekem yet, mi invaetem yu blong prea wetem strong tingting mo tingting hevi long ol kwestin ia mo ansa wetem trutok. Taem we mi ansarem olgeta, lav mo fasin blong talem tangkyu blong mi from Buk blong Momon, we i talem witnes abaot Jisas Kraes, i kam moa bigwan.

Bae mi neva save plan blong fasin blong pemaot man, sakrifaes blong Hem we i pemaot sin mo sore blong Jisas Kraes, o ol tijing blong ol profet we i stap laef. Laef blong i olsem ia from Buk blong Momon. Ol prinsipol we oli stap long hem i helpem mi blong mi stap long kavenan rod ia long wan wol we i stap kam nogud.

Presiden Marion G. Romney, foma Seken Kaonsela long Fas Presidensi i promes se:

“Mi filim se sapos, insaed long ol hom blong yumi, ol papa mo mama oli prea mo ridim Buk blong Momon evri taem, tugeta, wetem ol pikinini blong olgeta o olgetawan, spirit blong naesfala buk ia bae i stap insaed long hom blong yumi mo evriwan we i stap insaed. Spirit blong stap kwaet bae i kam moa bigwan, respek mo tingting blong tingbaot wanwan long yumi bae i gro. Spirit blong raorao bae i ronwe. Ol papa mo mama bae i givim kaonsel long ol pikinini blong olgeta wetem bigfala lav mo save. Ol pikinini bae oli ansa mo folem ol kaonsel blong ol papa mo mama blong olgeta. Fasin blong stap stret moa gud bae i gro. Fet, hop, mo jariti—bigfala klin lav blong Kraes—bae i stap insaed long ol hom blong yumi mo laef, bae i karem i kam pis mo glad.”²

Taem mitufala i gat faef yangfala pikinini, famli blong mifala I gat hadtaem blong folem kaonsel blong profet. I tekem 18 manis blong mifala i finisim blong ridim Buk blong Momon. Plante taem long ol dei mifala i ridim wan pej. Wanwan long mifala i ridim wan ves mo mifala i helpem lasbon gel blong mitufala we i gat 4 yia, blong i ripitim wan ves afta we wan long mifala i rid blong hem. Blong selebretem, mifala evriwan i go aot blong kakae, mo long tebol mi askem famli blong mi wanem nao i fevret stori blong olgeta long Buk blong Momon. Ol stori I gat, Alma I stap wetem ol Man blong Soram, Lihae mo ol famli blong hem long rod we i go long graon blong promes, Hileman wetem ol yangfala soldia, Momon mo Moronae, ol misinari wok blong Amon, mo Konvesen blong Yangfala Alma. Afta, smol gel blong mitufala we i gat fo yia i talem. “!Jisas Nomo!”, hem i talem. Hem i tijim mifala wan lesen we i gat paoa olsem wan pikinini we i gat fet long dei ia.

Presiden Nelson i tijim:

“Taem we mi tingbaot Buk blong Momon, mi tingbaot toktok ia paoa. Ol trutok blong Buk blong Momon i gat paoa blong hil, kamfot, putumbak, winim, mekem i kam strong, givim kamfot, mo mekem ol sol blong yumi i glad. . . . Mi promesem yufala se taem yufala i stap prea mo stadi long Buk blong Momon evri dei, bambae yufala i save mekem ol moa gud desisen- evri dei. Mi promes se taem yufala i stap tingting hevi long wanem we yufala i stadi abaot long Buk blong Momon, bambae ol windo blong heven bae oli open, mo bae yufala i kasem ol ansa blong ol kwestin blong yufalawan, mo bae Hem i soem rod blong laef long yufala.”³

Promes blong Moronae i blong evriwan we i ridim Buk blong Momon, i nomata se hem i fastaem o namba faef taem. Tingbaot fet mo prea, wetem wan hat we i tru, mo wan strong tingting. I joen wetem strong tingting blong yu blong wantem lan tugeta wetem strong tingting blong yu blong wantem stadi, tingting hevi, mo prea, yu tu yu save kasem wan testemoni blong kasem ol naesfala blesing we buk ia i karem i kam. Hemia bae i kam moa bigwan taem yu serem buk ia mo testemoni blong yu wetem ol narafalawan.

Mi invaetem yu blong mekem Buk blong Momon i pat blong evri dei laef blong yu. Lanem ol tijing blong hem, laekem ol stori blong hem, mo folem ol eksampol blong ol tru man blong folem Jisas Kraes. Mi promes se, taem yu mekem olsem fet blong yu long Jisas Kraes bae i kam moa strong, bae yu eksperiensem se hop i gro, mo tru long bigfala sore blong Lod, bae yu filim klin lav blong God i fulumap sol blong yu.