Wan Merikel blong Tedei i faenem wan Misinari

Eli las yia, Elda Allistair B. Odgers i askem ol stek presiden blong putum wan gol blong namba blong ol ful taem tijing misinari we bae mifala i gat blong givim seves long Disemba 2022.

Afta plante prea mo fasin blong lego kakae, mi putum wan gol we bae i mekem mifala i kam olsem wan stek, wan gol we bae i nidim bigfala fet mo karem i kam ol eksperiens mo ol merikel long saed blong spirit i kam long ol laef blong ol memba. Mi bin save namba blong ol misinari we oli stap givim seves naoia, mo blong olgeta fiuja misinari we mifala i stap wok wetem olgeta, we bae i mekem se bae i gat 10–12 misinari we bae i givim seves long Disemba. Mi kasem insperesen blong putum 25 olsem gol blong stek blong mifala.

Stret taem ia nomo mi stat blong mit wetem ol bisop, ol branj presiden, ol hae kaonsel mo stek kaonsel memba. Mifala i invaetem evriwan blong kam wan mo faenem ol narafala 10–15 misinari ia we oli no stap wok wetem olgeta. Sot taem afta, long taem blong Epril Jeneral Konfrens, Presiden Russell M. Nelson bakegen i invaetem evri yang man, mo yang woman we i gat strong tingting ia blong wantaem givim seves, blong go mo givim seves long wan ful-taem misin. Presiden Nelson i leftemap tingting blong evriwan blong, ‘lukaotem mo faenem ol merikel’ taem yumi leftemap paoa blong faea blong spirit blong yumi.

Elda Odgers i askem ol stek presiden long wan kodineting miting kaonsel blong mifala, i blong invaetem ol bisop mo ol branj presiden blong invaetem tu yang man blong givim wan seves misin evri wik. Blong bilivim ol merikel, mi leftemap tingting blong ol lida blong mifala bakegen blong mekem bak ol efot ia blong faenem ol misinari, tokbaot strong long ol lida ia se bae mifala i gat ol eksperiens mo ol merikel long saed blong spirit taem mifala i stap lukaotem insperesen mo gaed abaot huia blong invaetem.

Long nekis stek hae kaonsel miting blong mifala, wan brata i talem long mifala se hem i gat tu pikinini boe we tufala i save givim seves long wan misin. Wan i gat strong tingting ia blong givim seves long Lod, narawan hem i nogat strong tingting ia. Pikinini boe ia, Sione, i stap long Amerika, i gat wan gelfren mo i talem se hem i no kasem wan ansa yet long ol prea blong hem, se sapos bae hem i givim seves long misin.

Long semmak spirit olsem Alma, mo wetem wota blong ae blong hem i fulap, papa ia i askem sapos bae mifala i save prea from Sione blong hem i kasem wan ansa long Lod.

Olsem evriwan, mi gohed blong prea, mo blong fast from yang man ia.

Mi wekap wan Satedei moning mo stap ledaon mo stap tingting long naesfala mo eksperiens wetem tingting i stap daon. Wan visen blong Sione i kam long maen blong mi. Oli givim instraksen long mi blong visitim hem nekis dei, afta long ol wok blong mi blong evri dei i finis. Visen ia i soemaot mo i givim mi sam spesifik kwestin blong askem Sione. Mo mi harem wanem bae i ansa blong hem, mo olsem wanem bae mi ansa long hem. Mesej i klia mo i spesifik.

Long naet ia, mi openem fast blong mi mo prea se bae evri samting long visen blong mi bae i klia nomo i stap blong mi save komplitim asaenmen ia we oli givim.

Mi go long wan wod konfrens long nekis dei, mekem sam intaviu afta mi go long trak blong mi. Taem mi stap draev aot long japel, Spirit i rimaenem mi long asaenmen blong mi ia. Long wan strenj be long saed blong wei blong spirit, mi luk visen ia we mi bin luk long dei bifo.

Taem mi kasem haos blong famli ia, mi noknok long doa mo oli talem se papa blong olgeta i travel i go ovasi, be mama blong olgeta i stap long haos. Taem mama blong olgeta i kam long doa, mi askem sapos mi save mitim hem mo Sione. Hem i stap bisi blong kukum kaekae blong aftenun. Mama blong olgeta i invaetem mi I go insaed mo mifala tri i sidaon long siting rum mo storian.

Mi askem Sione blong mekem wan prea mo stret long taem ia nomo visen ia i kamaot klia olsem long dei bifo.

Mi askem Sione ?wanem tingting blong hem abaot blong stap givim seves long wan misin? Toktok folem toktok, hem i ansa olsem we mi bin luk long visen. Hem i eksplenem se hem i no save gud sapos bae hem i go givim seves long wan misin, se hem i bin tingting hevi mo prea be hem i ting se hem i no kasem wan ansa. Mi askem sapos hem i kasem wan petriakel blesing blong hem. Hem i se, “yes”. Mi askem, “?Petriakel blesing blong yu i talem wanem?” Hem i ansa, “Bae mi go long wan misin.”

Olsem we oli givim instraksen long mi, mi askem, “?Olsem wanem nao Lod i ansa long ol prea?” Sione i traehad . . . be afta hem i serem ol tingting blong hem. Spirit i mekem i kam moa strong mo wetem wan filing mo fasin blong tingting i stap daon, mi talem, “mi bin kasem instraksen tru long Lod Jisas Kraes, tru long revelesen , blong kam mo visitim yu tedei. Mi testifae long yufala se ol prea oli ansa tru long ol filing, tingting, stap ridim olgeta skripja mo plante nara wei. Tedei mi stap long ples ia long bihaf blong Sevya, Jisas Kraes blong ansa long prea blong yu mo blong karemaot ol samting we yu konfius long hem mo ol tu tingting blong yu. Sione, Sevya i invaetem yu blong go givim seves long wan misin. Hem i gat wan wok blong yu mekem mo hem i wok we Elda Hala nomo i save mekem blong wan man we i spesel i stap wet long yu blong yu invaetem olgeta i go long wota blong baptaes.” Ples ia nao visen ia i stop.

Mi askem hem se hem i filim olsem wanem. Hem i benem hed blong hem mo i krae, “Prea blong mi i ansa mo mi wantem blong givim seves long wan misin.”

Kolosap brata Hala bae i flatem ol medikol mo jekap blong tut blong hem afta i sendem misin fom blong hem. Ol merikel blong tedei oli stap hapen tru, taem yumi putum tras blong yumi long Lod Jisas Kraes.