Stap Sef long Han blong Hem

Hasban blong mi Eddie Uele mo mi i gat tri pikinini: Indie-Rose, Rollo, mo Kamaukiterangi (Kamau). Long 12 Jenuware 2022 mifala i lusum 2 yia boe blong mitufala Kamau.

Long aftenun ia, pleplei mo laflaf wetem ol pikinini blong mitufala insaed long bedrum blong mitufala. Mitufala i luksave se Kamau i lus. Samtaem afta oli faenem Kamau aotsaed long bak yad blong mifala be hem i hafded i stap. Eddie i mekem CPR kasem taem we paramedik i kam mo semmak taem mi mo famli blong mi i stap krae long Papa long Heven blong i help.

Kamau oli karem hem i go long hospital kwiktaem, we wan tim blong ol dokta i stap wet long hem. Taem mifala i kasem hospital, oli tekem mi mo Eddi i go long wan praevet rum we long sam minit mitufala I stap holem ol han blong mitufala, mo stap gohed blong prea. Wan dokta i kam insaed, i sidaon long fored blong mitufala mo stat blong toktok.

Mi no save harem wanem hem i stap talem from evri samting raon long mi i kam kwaet mo i gat pis—long ples ia nao mi luk i klia olsem se i dei, mi luk smol boe blong mi i pleplei long fored blong mi wetem smol pleplei trak blong hem, i stap laflaf mo i hapi. Long ples ia nao mi kasem se smol boe blong mi i ded. Mi save tu se hemia i rod we Papa long Heven i rere long mi blong wanem we bae i kam.

I no bin olsem kasem long naet ia we mi kam blong andastanem fulwan naes taem ia long heven.

Mama blong mi i holem mi taem mi stap krae long ol han blong hem, mi no save holemtaet mi from lus blong smol boe blong mi. Mama i askem mi, “?Yu yu kros long Papa long Heven?” Mi ansa, “No, mi no kros, be Hem i no wantem save long mi, mama. Mi askem strong long hem blong i no tekem aot smol boe blong mi. Mi askem Papa long Heven blong i letem hem i stap. Be Hem i no lisin long mi.”

Wetem lav mama blong mi i talem long mi, “I no se Papa long Heven i no wantem lisin long yu. Hem i harem yu. Hem i mekem wan merikel ia taem Hem i openem vel blong Heven mo i letem yu blong luk se Hem i stap wetem Kamau, mo Kamau bae hem i stap sef long han blong Hem.”

Samtaem long yia ia, long open haos blong Hamilton Niu Silan Tempol, mi filim se mi fraet mo seksek smol. Mi talem long hasban blong mi “Mi ting se Kamau i stap wet long mi insaed long tempol. Mi ting se bae hem i stap wetem mi.

Insaed long tempol, rum we mi wantem tumas blong luk hem i Selestial Rum. Taem mifala i stap wet blong go insaed, tua gaed blong mifala i talem long grup blong mifala se, “Mi sore tumas be bae yumi nogat tumas taem blong spendem insaed long Selestial Rum. Be mi save promesem yufala, Ol Brata mo Sista, se iven taem blong yufala bae i sot, be ol blesing we bae yufala i kasem bae i inaf blong save stap blong wan taem we i no save finis. Mo wanem we i moa impoten i we bae yufala i filim lav blong Sevya blong yumi Jisas Kraes.”

Taem we mifala i stap rere blong wokbaot i go insaed , gel blong blong mi Indie-Rose i holem han blong mi mo wetem glad i talem, “?Mama, spesel rum ia nao yu stap tokbaot long mi ia?” Mi ansa, “Yes, hemia nao.” Afta hem i askem mi se, ?Bae hem i olsem ia nao taem bae yumi luk Kamau?” Mi ansa, “Yes, i olsem se taem yumi wokbaot i go raon long kona ia afta hem hemia nao.”

Wota blong ae blong mi i ron taem promes blong tua gaed blong mifala i kamtru. Mi save filim klin lav blong Sevya blong yumi Jisas Kraes i givim kamfot long mi. Mi filim se ol toktok blong tua gaed blong mifala i mesej we Papa long Heven i givim long mi, i stap talem se, iven we taem blong mi wetem boe blong mi i sot, be ol blesing mo lav we mi gat long hem bae i inaf long mi blong wantaem we i no save finis.

Long evri rum insaed long tempol - evri pikja mo evri ditel—mi save filim spirit blong naesfala Kamau blong mi. Hemia i konfemesen long mi se mi nidim blong stap insaed long tempol. Papa long Heven mo Jisas Kraes i stap rimaenem mi long kamfot ia blong heven mo tabu hiling we mi save kasem insaed long ol wol blong tempol from paoa blong Atonmen blong Sevya blong yumi Jisas Kraes.

Neva tempol I bin moa impoten long laef blong mi bitim naoia.