Rod blong Wan Yang Gel i go long Tempol

Sam yia i pas, wan yang gel we i stap long Vanuatu we nem blong hem Marsela Tokalolo, i tekem kaonsel blong papa blong hem: “Stap kolosap long Gospel blong Jisas Kraes mo mekem edukesen i kam valiu.”

Edukesen i impoten tumas long papa blong hem mekem se i sendem hem taem hem i gat 12 yia blong go skul long Fiji, i sakrifaesem mane mo i stap longwe long gel blong hem. Afta we hem i graduet long hae skul mo komplitim yia 13 long Fiji, Marsela i gobak hom long Vanuatu.

Long Fiji, Marsela i luk laet long saed blong Spirit long ol tija blong hem, plante long olgeta oli graduet long BYY-Hawae.

Afta we hem i sevem misin olsem wan misinari blong Jos long Philippines, tingting blong hem blong go long BYY-Hawae i mekem hem blong i wok mo sakrifaesem hemwan from edukesen blong hemwan olsem we papa blong hem i givim kaonsel long hem.

Mariella Kaun, wan memba blong Jos long Vanuatu i helpem Marsela blong hem i resemap vatu blong edukesen blong hem. Marsela i bekem mo salem banana pae, kasted pae, mo laplap wan nasonal kakae blong Vanuatu.

Marsela i talem, “Ol memba (blong Jos Ia blong Jisas Kraes blong Ol Lata Dei Sent) mo ol fren oli wantem blong sapotem mi taem oli save se bae mane i helpem mi blong go long skul.”

Marsela i bin winim ol gol blong hem. Hem i graduet long BYY-Hawae, mitim hasban blong hem, mo i mared long Lae Hawae Tempol.

“Haos blong Lod i [wan] tabu haos,” hem i talem. “God i wokbaot wetem yumi long rod blong laef blong yumi.”

Oli stap bildim wan tempol long Port Vila Vanuatu.

Niufala tempol long Vanuatu, Marsela i talem se, “I wan ansa long ol prea blong mi. Hemia i wan witnes se God i tingbaot ol pikinini blong Hem. Tempol bae hem i wan laet long nesen blong mifala.”