E Sili atu i Lō Tatou Uma

O le mea muamua e faia e lo’u aiga pe ā matou saunia mo le Kerisimasi o le tuufaatasia lea o le ata o le fanau mai o Keriso. O lā matou seti o le fanau mai e i ai vāaiga e tolu—o le faletalimalo ma leoleo o le faletalimalo, o Makoi ma kamela ma faleie, ma le falepovi ma Maria, Iosefa, leoleo mamoe, ma se agelu. Matou te tuuina i le ogatotonu o lo matou fale, lea matou te vaai’a i taimi uma. Ua matou tausia lenei tu ma aga masani mo le sefulu lima nei tausaga, ma ona o le mea muamua lea matou te faia, e taula’i atu lava lo’u mafaufau ia Keriso mo le taimi o totoe o le Kerisimasi. O le matou laau Kerisimasi ua faafa ona suia i lo’u olaga, ae o le ata o le fanau mai e tumau pea. O Keriso e tatau ona faamuamua pe a tatou mafaufau i le Kerisimasi—ma i mea uma, o loo i ai o Ia i le igoa o le vaitau. O le ata o le fanau mai o la’u tu ma aga masani lea e sili ona fiafia i ai auā e faamamafaina ai le taua o Keriso mai isi, aganuu e sili atu le faalēlalolagi. E faafo’i atu ai lau taula’i i tua i le fanau mai mau’alalo o lo’u Faaola ma le faatuatua o Ona matua faalēlalolagi.

I le 2022, na faataunuu ai e le Siteki o Australia Southern River se Faigālotu Faamusika o le Kerisimasi. O le musika sa mai le tusi a Kenneth Cope o le Greater Than Us All, lea e auiliili ai le soifuaga o le Faaola mai le fanau mai i le maliu. Sa ou auai o se faamatala, e faaaoga ai mau e faaupu ai pese taitasi. Ou te lagonaina pea le Agaga Paia i musika, ma o se aafiaga e maoa’e le faagaeetia i le avea ai o se vaega o se faigaalotu matagofie, na faamamanaina e tagata talēnia o la’u siteki. O iina na faamaonia mai ai e le Agaga ia te a’u le mea moni o le soifuaga o le Faaola ma le tāua o Lona fanau mai ma le Togiola; na gaogao moni lava le tuugamau i le aso lona tolu. Ou te fiafia faapitoa lava i le pese o Ona Lima, lea e molimau mai i le taua o le galuega a Keriso ma Lona alofa mo a’u. O le faigālotu o se ala sili lea e amata ai le vaitau o le Kerisimasi; a’o tatou taulai atu i le soifuaga o lo tatou Faaola, na ou mauaina se faafetai sili atu mo Lana taulaga. Na ou valaaulia foi se uō—e auai i se isi lotu Kerisiano– na ia ta’u mai iā te a’u mulimuli ane o fati o pese na fesoasoani iā te ia e manatunatu ai i le lā faiā ma Iesu Keriso. Ou te faafetai lava mo le molimau ua ou atia’e ma tausia e ala i musika a le Ekalesia. I le agaga lava e tasi ma Alema, ma loimata i ona mata, na fai ai lenei tamā pe mafai ona matou tatalo mo Sione ia maua se tali mai le Alii.