Toe Totōina o le Fatu o le Faatuatua

Ata

Alba Fonseca

O Alba Lucia Fonseca, o se tagata o le Ekalesia mai le Iunaite Setete, na vaai i anomea i luga o le initoneti na tulai mai ai ni atugaluga e uiga i ona talitonuga faalelotu, ma sa ia oo ai i le vave o le leai o se faatuatua. I le taimi muamua, sa ia tia’ia i fafo le fatu o le faatuatua i lona masalosalo, ae na toe amata ona ia talanoa ma se tagata agalelei ma le atamai o le ekalesia ma iloa ai o lona le talitonu na tulai mai ai foi ni fesili.

“O lo’u malamalama i mataupu o le talalelei ma le talafaasolopito o le Ekalesia sa lei toetoe lava a atoatoa e pei ona sa ou manatu i ai,” sa ia faamatala mai ai. “O lena mea na faalotomaualaloina ai au ma fesoasoani ia te au e iloa ai sa tele pea mea sa tatau ona ou aoaoina ma o le faatuatua e le o i se taunuuga o le taliina o fesili uma.” Na iloa e Alba o isi “mea taua i le olaga—e pei o le aiga, a’oga, galuega—o loo i ai le lamatia, ositaulaga, le mautonu, ma taumafaiga i le olaga atoa. Sa ou toe foi mai i le Ekalesia ma e mafai ona faamautu atu o le faatumauina o le faatuatua e matua taua tele foi ai lenei ituaiga o taumafaiga.”

Sa aoao mai foi Peresitene Russell M. Nelson e faapea: “E lē manaomia e le Alii se faatuatua atoatoa mo i tatou e maua ai Lona mana atoatoa .” Ae o lo tatou faatuatua, sa ia faailoa mai foi, e manaomia ai taumafaiga faifai pea e faaauau ai le tuputupu ae.¹ E ui o le uluai faavae o le Malumalu o Sate Leki na malosi mo le silia ma le seneturi, ae ua manaomia nei se faafouga tele, sa faamalamalama mai e Peresitene Nelson. E tatau foi ia i tatou i nisi taimi ona faamalosia o tatou lava faavae faaleagaga e “tetee atu i mea lamatia ma faatosinaga o loo agai mai.”² Ao tatou fetaiai i nisi taimi ma mea faigata e pei ona sa i ai Alba, o lo tatou manao mo le mautinoa e mafai ona taitai atu ai i tatou mai se talitonuga faatauvaa i le le talitonu faigofie, ma faamisi ai taumafaiga e manaomia e faamalosia ai ma uunaia ai lo tatou faavae faaleagaga.

O i latou o e suesue i tala o le toefoi-i-le-faatuatua ua iloa le aoga o le vaai atu i le faatuatua o se faigamalaga i le olaga, ma le tele o laasaga.³ Atonu tatou te amata i se talitonuga faigofie o se tamaitiiti, ae o nisi taimi e feagai ai lena faatuatua faatamaitiiti ma fesili ma atugaluga. E ui o lo tatou faatuatua e lei tofotofoina atonu na avea lelei o se faavae faaleagaga, ae ua tatau nei ona tatou see ese mai le faatuatua faatauvaa, e ala atu i ni tulaga lavelave agai atu i se faatuatua ua matua a’ia’i lea e mafai ona tātālia luitau o le lumanai.⁴ O le lafoaia o le faatuatua atonu e foliga faigofie, e toetoe lava pei o se toomaga, ae o taui faatamaoaigaina e o faatasi ma malaga a i latou o e liliu atu i le Atua ma faaauau pea ona faafaileleina a latou fatu o le faatuatua.

O tofotofoga o le faatuatua na amata mo Samuel Hoglund o Suetena ina ua tulai mai ni fesili a tagata o le aiga. Sa ia oo i se vaega o le “taliina o se fesili se tasi i le fetaia’i ma se isi fesili,” na ia faamatala mai ai. “Na fememea’i lo’u faatuatua mai le tasi afa itula i le isi, seia oo ina ou iloaina o lenei faagasologa ma lo’u manaoga mo le mautinoa sa le mafai ona faatumauina.” Nai lo le taumafai e foia fesili laiti uma, sa tonu ia Samuelu e suesue i fesili taua—o na fesili e taua tele i se faavae mautu ia Iesu Keriso. Faatasi ai ma le tatalo ma le suesueina o tusitusiga paia, o le sailiga a Samuelu, e pei o Alba, na aoaoina ai o ia i le tele o mea sa tatau ona ia aoaoina ma aumaia o ia i ni talitonuga e sili atu ona faatagata matua. O le aafiaga na matuai faamalosia ai lou faatuatua,” ua ia fai mai ai, “’ma sa aoao mai foi ia te a’u e faapea o mea e te sailia moni lava o le a e mauaina.”“

“O le faatinoina o le faatuatua e mafai ona ono lofituina,” na faailoa mai e Peresitene Nelson. “E i ai taimi tatou te ono tuufesili ai pe mata e mafai ona tatou aofa’ia ia lava le faatuatua e maua ai faamanuiaga ia tatou te matuā manaomiaina lava.”⁵ Ae e oo lava i nai laasaga laiti o le faatuatua, e amata i “sina vaega itiiti o le faatuatua,” e mafai ona “galue ia te oe” ma amata ai se toefanauina faaleagaga.

Ina ua mavae le fesēa’i faaleagaga i ona tausaga i le kolisi, sa faia e Amanda Freebairn o le Iunaite Setete se laasaga itiiti o le tatalo, lea na taitai atu ai o ia e mulimuli i se uunaiga e asiasi atu i ona lotoa o le malumalu i le lotoifale. “O le lagonaina o le Agaga iina na toe faaolaina ai lo’u faatuatua,” o lana tala lea. O le toe foi atu i le lotu ma le taliaina o se valaauga e faiaoga i le Peraimeri na faalolotoina ai lona faatuatua, ma sa ia faia pea laasaga na aumaia ai o ia e talia atoatoa le talalelei. I le aluga o le ala, na maitauina ai e Amanda, “Sa ou maua tali i fesili sa ou matuai manaomia lava.”

Ata

Dan Ellsworth

I se tasi taimi, o Dan Ellsworth mai le Iunaite Setete foi, na le mautonu foi o ia sa i ai sana vaega itiiti o le faatuatua na totoe e faaaoga. O lona uluai faailoaina atu i auala faaleaoaoga ma talafaasolopito i le Feagaiga Tuai na faavaivaia ai lona faatuatua i le Tusi Paia ma aafia ai lona talitonuga i tusitusiga paia uma. Ae sa faaauau pea ona alu Dan i le lotu ma filifili ai e faataitai mo le ono masina i se fuafuaga e tatalo, anapogi, ma auauna atu i le Ekalesia. E i ai taimi, sa ia talosagaina ai ona afafine talavou e tatalo foi mo le faatuatua o lo latou tama.

Ina ua mavae sina taimi, sa amata ona maua e Dan ni aafiaga faaleagaga ma maua ai tali i nisi o fesili na sili ona faalavelave ia te ia. I se tasi aso, a o i ai i se faletusi, sa ia lagonaina le uunaiga e alu i lalo i se atulaina o tusi ma aumai i fafo se tusi. I lea tusi, sa ia maua ai ni feteenaiga manino i le tusi lea na muai luluina ai lona talitonuga i le Tusi Paia. E ui e lei foia e lenei aafiaga fesili uma, ae sa aoaoina ai Dan i nisi o lesona taua: “Muamua, sa manaomia ona ou lotomaualalo i le tele o mea e mafai ona ou iloa e au lava ia. Ma le lona lua, o loo i ai isi auala o le sailia o le upumoni, faatasi ai ma le mafuaaga: uunaiga faaleagaga, taunuuga lelei mai fua o le Agaga, ma manatu e uunaia ai le alualu i luma faalemafaufau, o ia mea uma na taitai atu ai i ni talitonuga maumaututu ma le faatuatua sili atu nai lo le mea sa ou i ai muamua.”

Ata

Zac Marshall ma le aiga

Mo Zac Marshall mai Egelani, o le laasaga faigofie o le matamata i se vitio faaleaoaoga e uiga i le Tusi a Mamona na tatalaina lona mafaufau i le avanoa e ono mafai ai ona manino le tusi. “Sa ou faitauina muamua i suesuega faaleaiga o tusitusiga paia, ma faitauga na o au lava e aunoa ma se manatu moni i ai,” na ia faamalamalama mai ai. “Ae sa ou le toe toaga i le Lotu a o talavou, o le faamaoniga la na ou vaaia i le vitio na mafua ai ona ou faitauina ma le loto i ai le Tusi a Mamona mo le uluai taimi.” Ina ua uma ona faataitai le afioga a le Atua, sa amata ona sui e Zac le masalosalo i le talitonu. Ua ia faapea mai nei, “O le Ekalesia sa ou vaai i ai i se tasi taimi o se faasāsā ua ou vaai nei i ai o se saolotoga i le ala lava lea e tasi na fetalai ai Iesu, ‘E tuu saoloto foi outou e le upu moni’” [Ioane 8:32].

A o faia ni laa laiti e faafailele ai le faatuatua, e manaomia foi ona tatou nofouta i o tatou ala o mafaufauga e punitia ai ma faavaivaia le faatuatua. I le suesueina o tala o le toe foi-i-le-faatuatua o tagata o le Ekalesia i atunuu eseese, o Eric ma Sarah d’Evegnée, o polofesa i le Iunivesite o Polika Iaga–Idaho, na matauina e faapea “o le auala tatou te mafaufau ai e mafai ona taua e pei o mea tatou te mafaufau i ai.” Mo se faataitaiga, o le faamoemoe o le tuuto faalelotu o le a faasaoina ai i tatou mai luitau lē mautonu ma faamomoiloto o le olaga e le moni ma e fatuina ai ni manatu lē talafeagai. Na folafola mai e Iesu Keriso e le tuulafoaiina lava i tatou ae sa lapatai mai “e maua foi outou o le puapuaga i le lalolagi” (Ioane 16:33). Ae, e mafai e luitau o le olaga, e pei ona faimai ai Sara, “ona taitai atu ai i tatou ia vaai atu ma le lē lelei i le talalelei. O nisi taimi tatou te lafoai ese ai le tulaga lelei pe a tatou feagai ma soo se mea e itiiti ifo nai lo le lelei.”

O le tusitala ma le tusitalafaasolopito tutoatasi o Don Bradley o le Iunaite Setete, sa feagai ma fesili e uiga i le talafaasolopito o le Ekalesia i se taimi na ia faamatala mai ai, “Sa na ona ou le fiafia ma sa i ai se vaaiga masalosalo. O le masalosalo i soo se tasi o le a le lelei ai se mafutaga, ma sa aveesea ai lo’u faatuatua ma le sootaga ma le Atua.” I ni tausaga mulimuli ane, sa amata ona galue Don agai i le faamoemoe ma le lotofaafetai i lona olaga patino.

Sa amata foi ona ia iloiloina suesuega e uiga i aogā o le soifua mālōlōina o le mafaufau ma le tino o tapuaiga faatulagaina. “Sa le mafai ona ou faafitia na suesuega,” o le tala lea a Don. “Na faasolosolo lava, ina ou iloaina sa ou suitulagaina le masalosalo i mafaufauga taua, ma faatasi ai ma se uiga faaalia o le faamoemoe i le olaga, sa ou toe maua ai lo’u faatuatua i le Atua ma Iesu Keriso.” Sa toe foi Don i le faamatalaga faasolopito lea sa ia taulimaina, ae o le taimi nei o lenei lava anomea na taitai atu ai i se talitonuga o Iosefa Samita o se perofeta a le Atua.

E oo lava i se naunautaiga e faataitai le afioga a le Atua ma ia i ai se mafaufau faamoemoeina, o le toe foi atu i le faatuatua ma le auai i le lotu e mafai ona avea ma se faagasologa taufaafefe, ma toetoe lava a lofituina. O le taumafaiga e manaomia ai e le gata o le onosai, lototele, ma le lotomaualalo ae faapea foi le alofa i uo ma tagata o le aiga. O le taliaina o le fesoasoani a uo faamaoni e tausia ai le fatu ma mafai ai ona mauaa nai lo le mamae.

Ata

Leo Winegar

Ina ua faatoa fetaiai Leo Winegar o le Iunaite Setete ma fesili e uiga i le talafaasolopito o le Ekalesia, sa ia aoaoina le taua o uo agaalofa. “Sa mamae la’u molimau,” na ia faimai ai, a o ia uia se vaitau o le “tuuatoatasi ma le faanoanoa pogisa ina ua ou tauivi e tatalo.” I se tasi aso na lagona ai e Leo le uunaiga e faafesootai se polofesa o talafaasolopito o le Ekalesia. Sa le gata ina ia fautuaina Leo e toe mafaufau i lona ala o le masalosalo ae na avea foi ma se uo mamae. Na faasolosolo malie ona toe foi mai le molimau a Leo faatasi ai ma le fesoasoani a le faufautua a Leo ma tausaga o suesuega o le faamoemoe. I se taimi, sa ia maua ai tali i le tele o fesili. “Ou te lagona le faafetai e faavavau i lo’u Faaola o Iesu Keriso mo le toe taialaina mai o au,” na ia faimai ai, “ma mo uo o e na avea ma Ona sui.”

“Afai o uo ma aiga … e o ese mai le Ekalesia, ia faaauau pea ona alolofa ia i latou,” o le fautuaga lea a Peresitene Nelson. E le mo oe le faamasino atu i filifiliga a se isi e pei lava foi ona le tatau ai ona faitioina oe mo le tumau ai faamaoni.”⁶

Ata

Letitia Rule

O le fefe i na ituaiga o faitioga na taofia ai Letitia Rule, o se tagata o le ekalesia i Egelani, mai le talalelei mo le 20 tausaga. Sa masani ona ia manao e toe foi mai, ae sa “fefe o ia i le na o le savali atu i le faitotoa, ma le lagonaina o le faamasinoina ma e pei ou te lei ola sa’o.” Na o se suesuega e lamatia ai lona ola na maua ai e ia le lototele e faia ai lena laasaga faigata. Sa feiloai tagata o le ekalesia ia te ia ma le mafanafana ma le alofa, ma fesoasoani ia te ia ia toe auai i le talalelei.

A o faaiuina e Alema lana lauga, ua ia faamanino mai e ui o taumafaiga e tausia le fatu e taua tele, ae e le o le fatu lava ia. Nai lo lena, tatou te totoina le fatu moni pe a tatou “amata ona talitonu i le Alo o le Atua, o le a afio mai o ia e togiola ona tagata, ma o le a mafatia ma maliu o ia e togiola mo a latou agasala” (Alema 33:22).

Sa aoaoina e Michael Auras mai Siamani ni lesona taua e uiga i mea e faamuamua i le talalelei ina ua ia se ese a o talavou. “E tele naua mea lelei ma sootaga o loo i ai i le talalelei, ae ua na o le faatuatua ia Iesu Keriso o le a lagolagoina ai a tatou molimau,” na ia faamalamalama mai ai. “Sa ma faavaivai uma ma lo’u tama i lo ma faatuatua mo se vaitau faatasi ma ni fesili eseese ae na toe foi mai ina ua ma faavaeina lo ma faatuatua ia Iesu Keriso e sili atu i lo isi mea uma.”

Na faamautinoa mai e Peresitene Nelson ia i tatou, “E le latalata atili atu le Faaola ia te oe nai lo le taimi ua e feagai ai pe ā’ea ai se mauga i le faatuatua.”⁷ Ua folafola mai e Iesu Lava Ia, “Ou te ia te outou i aso uma lava, e oo lava i le gataaga o le lalolagi” (Mataio 28:20). O le a Ia savali faatasi ma i tatou, alofa ia i tatou “o le alofa e faavavau” (Ieremia 31:3), ma tuuina mai ia i tatou le ola e sili atu (tagai i le Ioane 10:10). O i latou e naunau e toto lenei fatu o le a iloa e oo lava i lo latou faatuatua itiiti e mafai, e ala i le Faaola, ona avea “ma laau, e totogo a’e i totonu o outou i le ola tumau e faavavau” (Alema 33:23).