O Se Foliga i le Faamalama

Ata

ata o Maija-Kaarina Mäkinen

Ata pu’e mai faaaloaloga a le tusitala

Sa masani ona ou vaai i foliga lava e tasi o sioa mai se faamalama o le fale mautotogi. Sa ou mafaufau ifo ia te au lava, Pe le o se tulaga faanoanoa ea le tilotilo atu pea o se tasi i fafo o lo latou faamalama, ma faamasinoina gaoioiga a o latou tuaoi?”“

Ona oo lea i se tasi aso sa ou manatu atonu e tatau ona ou alu e fesili e vaai pe mafai ona ou fesoasoani atu. Sa ou filifili ou te alu ma ave ni falaoa tao felesi.

O le falaoa mafanafana na liu suavaia ai le aisa i le loto o lo’u tuaoi matua. Sa ia ta’u mai ma loimata ia te au lona lagona tuuatoatasi. Sa leai se tasi na asia o ia ma sa leai se tasi na valaau atu ia te ia, e oo lava i lana lava fanau. Faatasi ai ma se lima gatete, sa ia solo ese loimata mai ona alafau.

Sa mapuea o ia ona fai mai lea, “E maeu le manaia o le tuua o lenei lalolagi. Ou te le faamasinoina se tasi a o ou tilotilo atu i fafo o lou faamalama. Na o lo’u matamata lava i tamaiti o taaalo ma isi mea o loo tutupu i le fanua.”

Ata

tamaitai o loo tilotilo i fafo o se faamalama

Ata na tusia e Alex Nabaum

I le aluga o taimi sa ma talanoa ai e uiga i le talalelei. I le taimi muamua sa musu o ia ona sa auauna atu lona toalua o se taitai i se isi lotu. Ae o le tele o lo ma talanoa, o le tele foi lea o lona faagaeetia i upumoni sa ou faasoa atu e uiga ia Iesu Keriso ma Lana talalelei toefuataiina.

“E ese le matagofie lo tatou maua ai o le Iesu lava e tasi!” o lana tala lea. “Tatou te vaai ea i le tasi ma le isi i le lagi?”

““Ioe,” sa ou tali atu ai, “o le a tatou i ai faatasi iina—uu lima faatasi.”

Mai lava i lena taimi, sa avea i maua ma ni uo lelei mo le tele o tausaga, seia iu lava ina maliu o ia mai lenei lalolagi.

O le taimi nei ou te fiafia e mafaufau o loo tilotilo mai lo’u tuaoi na i ai muamua mai le faamalama o lona aiga faalelagi, e tilotilo mai i a tatou gaoioiga ma faamoemoe ua lava lo tatou lotogatasi ma le alofa o le tasi i le isi.