“O Mataupu Faavae Taiala e 3 mo le Faaaogaina o Tekinolosi ma Ala o Faasalalauga,” Liahona, Mat. 2024.
O Mataupu Faavae Taiala e 3 mo le Faaaogaina o Tekinolosi ma Ala o Faasalalauga
A o faaauau pea le faatupulaia o tekinolosi, o nei faiga ma manatu i ala o faasalalauga o le a fesoasoani ia i tatou e agai ai i luma i le poto.
E fesuisuiai pea tekinolosi. Ma o vaega uma i le tulaga alualu i luma o tekinolosi e aumaia ai ni auala fou e faaaoga ai ala o faasalalauga. O ala faasalalau lolomi (lomitusi) ua matua suia lava ē e mafai ona mauaina upu tusitusia. O leitio ma le televise ua suia tele ai le ala tatou te fesootai ma faailoa ai talafou, faamatalaga, ma faafiafiaga. Ua suia e le initoneti le tele o anotusi e mafai ona matou mauaina ma ē na mafai ona fatuina. Ua suia e ala o faasalalauga faaagafesootai lo tatou tomai e saili, talanoa ai, ma fesootai ai ma tagata. A o aliae mai le atamai faafoliga, ua tatou feagai ma ni fesili fou.
O tekinolosi fou e le lelei uma pe leaga uma foi. Nai lo lena, e masani lava ona pei o se tioata faalapopoa lea e mafai ona faalautetele ai avanoa fou ma atugaluga fou. A o tatou taumafai ia avea atili e faapei o Keriso, o la tatou tali atu i tekinolosi fou ma ala o faasalalauga e mafai ona aumaia ai i o tatou olaga, o mea ia e taua.
O Se Fautuaga Faalemataupu Faavae
Ioe, e leai se lisi o tulafono e taiala ai faaiuga uma tatou te faia e uiga i tekinolosi ma ala o faasalalauga. Nai lo lena, e mafai ona tatou aoaoina mataupu faavae e fesoasoani e taiala i tatou a o tatou faia filifiliga. Na aoao mai Elder Dieter F. Uchtdorf o le Korama a Aposetolo e Toasefululua: “O mataupu faavae e faavavau ma e mo tagata uma. O tulafono patino po o le faaaogaaga o na mataupu faavae e talafeagai lelei i nisi o nofoaga ae lē talafeagai i isi nofoaga. O Iesu Keriso e tuufaatasia i tatou faatasi ai ma upumoni e faavavau na Ia aoao mai, e tusa lava pe eseese le faaaogaaga patino i le aluga o taimi ma le tele o aganuu.”1
O le mulimuli i mataupu faavae e faavae i upumoni o le talalelei o le a fesoasoani ia i tatou e tumau ai i luga o le ala o feagaiga. O le a taialaina i tatou e le Agaga a o tatou taumafai e faia filifiliga e faavae i na mataupu faavae. O a la mataupu faavae e mafai ona fesoasoani e taiala ai a tatou filifiliga e uiga i tekinolosi ma ala o faasalalauga?
1. E mafai ona ou faaaogaina lo’u faitalia tonu e fai ai filifiliga e pulea ai tekinolosi. E le puleaina a’u e tekinolosi.
Atonu o nisi taimi e lagona ai e pei o tekinolosi ua puleaina lo’u olaga. E taua le manatua e mafai ona e faia filifiliga e pulea ai tekinolosi. Na te le puleaina oe. E mafai ona e filifili ma le loto i ai e faaaoga tekinolosi ma ala o faasalalauga e faataunuu ai mea lelei ma saili ai i mea e “mama, matagofie, pe logoleleia, pe tauleleia” (Mataupu Faavae o le Faatuatua 1:13).
Na fetalai mai le Alii, “Ua i ai ia te A’u, o le Alii, se galuega tele mo oe e te faia” (Mataupu Faavae ma Feagaiga 112:6). Mafaufau pe mafai faapefea ona e faaaogaina tekinolosi e faataunuu ai lena galuega tele ma tumau ai i le “auai ma le naunautai i se faamoemoega lelei” (Mataupu Faavae ma Feagaiga 58:27). Atonu e manaomia lou faaaogaina o tekinolosi i lau galuega. Atonu e te faaaogaina e saili ai ituaiga o faafiafiaga lelei. E mafai ona fesoasoani ia te oe e fesootai ai ma isi. Ma e mafai ona fesoasoani ia te oe e aoao ai, tuputupu ae, ma faataunuu ai le galuega a le Alii. Peitai, o isi faaaogaaga e mafai ona faalavelave, lē talafeagai, pe leaga. Nai lo le faatagaina o tekinolosi e pulea oe, faaaoga le poto ma le taitaiga a le Agaga e fai ai filifiliga ia e puleaina ai e oe.
2. Pe a ou faaaogaina la’u filifiliga tonu e fuafua mamao ai, ou te maua se lagona lelei atu ma faia ni filifiliga lelei atu.
Atonu na i ai sou aafiaga ina ua e faia se filifiliga e faatatau i tekinolosi sa le’i lagonaina le sa’o. Atonu na aofia ai ala o faasalalauga na e faaaogaina po o le taimi na faaaluina i se gaoioiga patino. Nai lo le popole i mea sese na e faia, e sili atu le maloloina o le taulai atu i le tuputupu a’e faifai pea. Afai e te fuafua mamao, o le a e faia ni filifiliga sili atu nai lo le mea atonu e te faia pe afai e te faia uma au faaiuga i lena taimi. E mafai ona e faatulagaina taiala patino ia ogatusa ma tulaga faatonuina o le talalelei e fesoasoani ia te oe e faia filifiliga lelei.
Afai e te iloa ua e faaaoga sese pe soona faaaoga ala o faasalalauga, ia maua le lototele e taumafai ai mo se suiga. Mo se faataitaiga, afai e i ai ni ituaiga o ala o faasalalauga patino e le musuia pe aumaia se lagona lelei, ia fetuunai au mausa. Afai o loo e faaaogaina tekinolosi e faaaoga ai ala o faasalalauga pe auai i amioga e te iloa e le sa’o, ia maua le lototele e sui—ma ia e onosai ia te oe lava a o e taumafai e faia na suiga. Mafaufau i ni mea aoga e mafai ona e faia e fesoasoani ai. Mo se faataitaiga, afai e te iloa e sili atu ona faigata le faia o faaiuga lelei i ni taimi patino o le aso, atonu e te fuafuaina taimi o le a e faaaogaina ai tekinolosi ma taimi e te le faaaogaina ai.
E faapena foi, afai o loo e faaaogaina tekinolosi e faamalosia ai oe lava, fesootai ma isi, ma faataunuu le galuega a le Alii, ma e te lagonaina le Agaga, ia faia pea na mea. A o e faamaoni moni ia te oe lava e uiga i au filifiliga, e mafai e lou faatuatua i le Alii ona fesoasoani ia te oe e faaaoga lou faitalia i auala e taitai atu ai oe ia maua se lagona lelei atu, ma faaauau ai pea ona faia filifiliga sili atu.
3. E mafai ona ou faaaogaina lo’u faitalia tonu e taofi ai ma fai se malologa.
Atonu e te lagonaina o fesili e uiga i tekinolosi ma ala o faasalalauga e faifai pea. O le a le tele o le tele naua? Pe tatau ea ona ou faateleina pe faaitiitia lo’u faaaogaina o ala o faasalalauga ma tekinolosi? Pe o o’u faaaogaina ma le atamai lo’u taimi? Taumafai e aua nei faatagaina manatu faapea e lofituina oe. Manatua e le afaina le taofi ma malolo mai ala o faasalalauga. O se malologa e mafai ona filifili e faia isi gaoioiga nai lo le sioa i se lau mo ni nai itula pe le faaaogaina foi ni tekinolosi patino, e pei o ala o faasalalauga faaagafesootai, mo se vaitaimi umi.
Ua tuuina mai e tekinolosi ni faamanuiaga maoae e fesoasoani ia i tatou e tumau ai le fesootaiga ma isi; peitai, e le faapea ona e mafai ona tatou fesootai i soo se taimi e le faapea ai e tatau ona tatou fesootai i soo se taimi. Ua faamanatu mai e le Alii ia i tatou, “Ia filemu ma iloa o au o le Atua” (Mataupu Faavae ma Feagaiga 101:16). Ia mautinoa o loo e faaaluina se taimi e fesootai ai ma Ia.
Ia Atamai
A o faaauau pea ona faatupulaia tekinolosi, o le a tatou feagai uma lava ma le tele o faaiuga. Nai lo le vaavaai atu i le Ekalesia mo tulafono ma lisi patino, e mafai ona tatou liliu atu i le Tama Faalelagi, le Faaola, tusitusiga paia, ma upu a perofeta o aso nei mo mataupu faavae e fesoasoani e taiala ai a tatou filifiliga. O le a fesoasoani le Agaga ia i tatou ia iloa pe o sa’o a tatou filifiliga. Ua aoga upu a Iakopo i aso nei e pei ona sa i ai i le taimi muamua na ia aoao atu ai i latou: “E, ia outou atamamai! O le a se isi mea e mafai ona ou fai atu ai?” (Iakopo 6:12).