Vai Sua Tetele

“Tina! E matuai malulū lava!”

O Iakopo, o se tasi o la’u masaga e taifitu tausaga le matutua, sa tu i le vaitafe na pau i ona tapuvae le sua.

Sa faapena foi le tulaga sa iai lesi a’u fanau e toatolu. I le alu ese ai o lo’u toalua i se malaga tulimanu, sa ou faatasi atu ai i lo’u aiga lautele mo le mea sa ou faamoemoe o le a avea ma se malaga malie i ni punavai vevela. O le taimi lea, o puna “vevela” sa le’i vevela e tusa ai ma o latou igoa.

Sa alu a’e se asu mai se tamai vaituloto i luga a’e o le vaitafe. Sa ou faalatalata atu ma lagonaina lona mafanafana. “Atonu o se vaipuna vevelalenei ,” sa ou mafaufau ai.

“E mafai ona tatou taeele ii?” Sa ou fesili i le uso o lo’u tina, o lana fanau foi sa i ai i totonu o le vaitafe.

“Ou te le iloa.”

Sa ma vaavaai mo se faailo e ono ta’u mai ai po o le a le mea e faaaoga ai le vaituloto, ae sa le mafai ona ma mauaina se mea. Sa taitoatasi ona o atu a matou fanau ua malilili mai le vaitafe malulu i le vaitaele. Sa ma tutu ma le uso o lo’u tina i le matafaga, ma matamata ma talanoa a o latou taaalo.

Sa tu se tamaitiiti matua atu i autafa o le faatausiusiuga o le vaitaele. “O lea ou te faaaluina i fafo le vaitaele!” o lana valaau mai lea. Sa ia viliina se uili lapoa, ma sa faaalu ai le vai mai le vaitaele i totonu o le vaipuna.

Sa alalaga tamaiti ma le fiafia a o alu atu le tafe o le vai i totonu o le vaipuna. Sa ou faafetai sa ou tauanau atu ia latou ofuina o latou taoofu faaola. Sa ou ataata a o avatu i latou e le āu agai i le itu tauagavale o le vaipuna.

Na tafea ese Iakopo mai ia i latou, ma tauivi ma le āu e aau atu i le itu taumatau o le vaipuna. Sa tu o ia, ma na iloa atu i ona foliga se vaaiga faate’ia matuia. “Tina, ua le mafai ona ou minoi!”

E aunoa ma se isi manatu, sa ou oso i totonu ma u’u mai lona lima e toso atu ai o ia i le saogalemu. Sa le minoi o ia. Pe sa i ai se mea sa mau ai? Sa ou tosoina pea, ae sa le mafai ona ou faasaolotoina o ia. Sa faaauau pea ona maualuga le suavai.

“Sole, ua mau o ia! “Fesoasoani mai sesi ia te au!” Ae sa ou iloaina ua mamao tele ese atu i latou.

Sa faalogoina le paō o le pisipisi, ma sa leiloa le oo mai o le uso o lo’u tama. Sa ia uuina Iakopo, fusi ma toso.

Sa toetoe lava a sili atu le vai ma le ulu o Iakopo. Pe sa i ai se mea na mau ai le taoofu faaola? Sa ou uu maia se nonoa ma ni lima gatete. E oo ane i le taimi na ou tatalaina ai le nonoa e tasi, ua ufitia le ulu o Iakopo i le vai. “Sei fesoasoani mai!” Sa ou tatalo ai.

Sa toso agai i tua e le uso o lo’u tamā ma lona malosi atoa. Sa mamulu mai Iakopo, ma sa sii atu o ia e le uso o lo’u tamā i le auvai.

Sa ou faatopetope i autafa o Iakopo ma opo mai o ia i o’u lima.

“E i ai se paipa alavai,” o le tala lea a le uso o lo’u tama, ma tusi atu i se paipa e 24-inisi ma te le’i iloaina. Sa tafe malosi atu ai le vai i totonu o le vaitafe. O le taoofu faaola o Iakopo sa foliga mai pau lea o le mea na taofia ai o ia mai le toso atu i ai.

Faatasi ai ma le popole, sa ma liliu atu ai ma le uso o lo’u tama i le isi vaega o lo matou aiga. “Tagata uma, o ese!”

A o feaei i fafo tamaiti, sa ou aveeseina le taoofu faaola o Iakopo ma tilotilo atu ia te ia. Na te lei foloina le tele o le vai ma e lei i ai ni maosiosia po o ni ono’oa.

“O oe o se tagata lototoa tele. Sa e fefe?”

“Leai, na ona faaauau lava ona taofi la’u manava,” o lana tala lea. Sa vave lava ona ou matuai faafetai mo taimi uma sa ia faaaluina e faataitai ai le taofi o lana manava i le vaitaele.

Na faapefea ona e iloa e tatau ona e sau?” Sa ou fesili atu i le uso o lo’u tamā a o faatasi mai o ia ma i matou i luga o maa.

“Sa ou lagonaina se uunaiga e sau e vaai po o a mea a tagata uma sa fai,” o le tala lea a le uso o lo’u tamā. “O lea na ou sau ai.”

Ina ua faatasi mai isi ia i matou, sa matou toe tilotilo atu i pito o le vaipuna, ma o le taimi lea, sa matou vaaia ai se faailo o le lapataiga ua paū i lalo lea na lanu faatasi ma maa ma palapala i autafa o le vaipuna.

Sa gatete tagata uma, o lea sa ou toe aveina ai tamaiti i le taavale toso o le tolauapiga. “Tatou faafetai i le Tama Faalelagi mo le fesoasoani mai ia i tatou,” sa ou fai atu ai. A o faatasi mai la’u fanau i le tatalo, o le moni o le mea na tupu na taia ai a’u.

Sa ou iloa sa i ai isi i tulaga talitutusa faapena o e na feagai ma se taunuuga e matua ese lava, ma faataumaoi. Ou te lei iloa pe aisea na faasaoina ai Iakopo, ae sa ou iloaina o se vavega. A o ou faalatalata mai la’u fanau, sa ou faafetai mo le taimi sa ou maua faatasi ai ma i latou ma faamanuiaga o lo matou aiga e faavavau. Sa ou iloa sa silafia i matou e le Tama Faalelagi ma Iesu Keriso ma sa La auina mai se vavega ina ua matou misia faailo lapatai o mea matautia.