“Fai ma Vaisu se Ata Faasolo i le Televise: O Le Auala Ou Te Faamuamua ai le Atua,” Liahona, Mat. 2024.
Fai ma Vaisu se Ata Faasolo i le Televise: O Le Auala Ou Te Faamuamua ai le Atua
Ina ua ou lafoaia le matamata i lenei ata faasolo i le televise, sa ou lagonaina le maoae o le faateleina o le uunaiga a le Agaga Paia i lo’u olaga.
Ata na tusia e Benedetta Vialli / Salzman International
O le filifilia o Iesu Keriso e aumaia ai le mana tele, “ma ioe, oka so tatou manaomiaina o Lona mana i aso o i luma atu.”1 Ua matua vāvao lo tatou lalolagi. E foliga mai ua tele atu faatosinaga a le fili i le toatele o fanau a le Atua. O le lē paia ua faamamaluina, ma o faaosoosoga ua faalavelaveina ai i tatou ma aveesea ai i tatou mai mea o le a tatou latalata atili atu ai i le Alii.
Ina ia faatoilaloina lenei mea, e tatau ona tatou filifili ma le mataalia ia Iesu Keriso i o tatou olaga ma lafoai mea e faatiga ai i le Agaga. Na apoapoai mai Moronae ia i tatou, “Ia outou popoto i aso o loo outou nofo vaavaaia ai; tafi ese mai ia te outou mea le mama uma” (Mamona 9:28) ma valaaulia i tatou, “O mai ia Keriso, ma faaatoatoaina ia te ia, ma faafiti outou lava mai mea uma e le faaleatua; … ma alolofa i le Atua ma o outou manatu atoa, mafaufau ma le malosi atoa” (Moronae 10:32).
E mafai faapefea ona tatou lafoai mea faalelalolagi ae omai ma le naunautai tele ia Keriso? Ua tofu i tatou ma se tulaga ese i lenei faagasologa. E mafai e i tatou uma ona lafoai se mea o loo taofia i tatou mai le lagonaina atoatoa o le uunaiga a le Agaga Paia. Tatou te manaomia le mana o le Togiola a le Faaola e faia ai, ma e amata i le faaaogaina o lo tatou faitalia e filifili ai o Ia.
O Le Manao ia Avea ma Ni Ō
A o ou tausaga faaiu i le aoga maualuga, sa ou i ai i le au lape mo taaloga. O aso uma lava i faataitaiga, e talanoa ai teineiti o la’u ’au lape e uiga i mea sa tutupu i le ata faasolo i le televise. Ou te lei matamata lava i ai ma iloa o se polokalama e maualalo ni ona aafiaga mamā. Peitai, sa ou lagona le tuuatoatasi i aso uma i faataitaiga a o talanoa fiafia teineiti e uiga i le polokalama. Sa musumusu mai le Agaga ia te au e aua le matamata i ai, ae sa ou matuai manao lava ina ia faaaofia ai i a latou talanoaga, o lea sa amata ai ona ou matamata.
Sa lei foliga leaga tele ia te au. Sa ou manatu o le a le aafia ai au. Sa ou iloa o le a ou le faia mea leaga na ou vaaia o faia e ia tagata. Sa maileia a’u ma matamata i le polokalama i aso uma. Ina ua ou alu i le Iunivesite o Polika Iaga, sa ou faia taimi faatulagaina o au vasega ina ia mafai ona ou matamata i ai i aso uma. Ou te lei misia lava se vaega.
Sa ou faaipoipo ma maua la’u pepe muamua. Ou te tuuina o ia i lalo mo se malologa i aso uma i le taimi o le polokalama ina ia mafai ona ou matamata i ai.
A o mavae atu tausaga, sa musumusu mai le Agaga ia te au i le tele o taimi e tatau ona ou le toe matamata i lena polokalama. Ae sa ou musu. Sa ou matua aafia lava i tagata o le ata ma o latou olaga. O la’u auala lea e faatoafimalie ai, o lea sa faaauau ai pea ona ou matamata ai. Sa ou talitonu e le o se mea e faatiga ai ia te au.
O Le Valaaulia
I le sefuluiva tausaga talu ona uma le aoga maualuga, sa ou matamata pea i le polokalama i aso uma. I le konafesi aoao, sa saunoa ai Sister Sheri L. Dew, o le sa fesoasoani Lua i le Au Peresitene Aoao o le Aualofa, e uiga i le savali ese mai le lalolagi ma mea e le paia. Ona ia fai mai lea, “Ou te valaaulia i tatou taitoatasi e faailoa mai ia le itiiti ifo ma le tasi se mea e mafai ona tatou faia e o ese ai mai le lalolagi ma faalatalata atili atu ai ia Keriso.”2
Ina ua ia tuuina mai lena valaaulia, sa ou lagonaina le maoae o le sasaa mai o le Agaga, ma sa ou faalogoina upu i lo’u mafaufau, “Ua tatau ona taofi lou matamata i lena polokalama i le taimi nei!” Sa matuai mamana lava; sa pei na taia ai o’u foliga. Sa ou iloa i lena lava taimi e faapea e le mafai ona ou toe lē amanaiaina lenei uunaiga. Sa ou lagonaina se uunaiga e aua nei toe matamata i le polokalama. Sa ou iloaina e leai se tagata se tasi o faia soo se mea e mama pe faamamaluina. Sa ou faatagaina lapisi i lo’u olaga i aso uma. Sa ou tuuto atu i le Alii, i le taimi lava lena ma iina, o le a ou le toe matamata lava i ai.
Sa le’i faigofie! O mausa ma vaisu o tausaga e sefuluiva tausaga sa faigata ona lafoaia. Na oo mai le Aso Gafua ma ua oo i le taimi e amata ai le polokalama. Sa ou savali atu i le faatonutonu o le TV. Sa ou matuai manao lava e ki. Sa ou manatuaina la’u tautinoga i le Alii o le a ou le toe matamata lava i ai. Sa ou savali ese.
Ona ou mafaufau lea i le tagata e sili ona ou fiafia i ai ma tau mafaufau po o le a se mea e ono tupu ia te ia ma toe savali atu i le faatonutonu. Sa ou iloa na ou manaomia le fesoasoani a le Atua, o lea sa ou tootuli ifo ai i ou tulivae ma tatalo mo le malosi e tetee ai le matamataina. Sa ou mafaufau i la’u folafolaga i le Tama Faalelagi, ma sa ou savali atu i fafo o le potu. Sa ou filifili e mulimuli i uunaiga na ou maua mai le Agaga Paia ma faamamaluina la’u tautinoga.
O lena tulaga na tupu faafia i aso uma o lena vaiaso ma i le isi vaiaso. O aso uma lava, ou te tootuli ai ma tatalo ma aioi atu mo le malosi ia aua nei matamata ai, ma o aso uma lava ou te filifilia ai Iesu Keriso ma savali ese mai se polokalama o le televise sa lē mama. Sa ou maua le malosi e faatoilalo ai mai le mana ua ofoina mai e le Faaola e ala i Lana Togiola.
Ina ua mavae sina taimi o le faia o lenei mea, sa tupu se vavega. Sa aveesea atoa lo’u manao e matamata i le polokalama, ina ua mavae le 19 tausaga o matamata i ai i aso taitasi. Sa ofoofogia lava! Sa aveesea foi lo’u manao e matamata i polokalama uma e fesiligia sa ou matamata ai, o lea sa ou lafoaia atoa ai.
Sa oo ina mataalia lo’u mafaufau, ma sa ou iloa le leaga. Sa ou manao ma le faamaoni e aloese mai soo se mea leaga (tagai i le 1 Tesalonia 5:22). Ou te lei toe mafaufau i ai.
O Le Faamanuiaga Aupito Sili Ona Ofoofogia
Ae o le mea e sili ona ofoofogia na tupu e faapea, sa ou lagonaina le uunaiga a le Agaga Paia na faalauteleina i lo’u olaga e sili atu i lo se isi lava mea na ou oo i ai muamua. Sa matuai televave lava lo’u alualu i luma faaleagaga! O na tausaga uma sa ou mafaufau ai sa ou fiafia i le mafutaga a le Agaga Paia, ae sa na o sina vaega na ou lagonaina nai lo le mea semanu ou te lagonaina. Sa ou iloa o le matamata i na polokalama i lena taimi atoa na aafia ai au. Sa ou misia le tele o tausaga o le i ai o se mafutaga malosi atu ma le Atua. Ina ua ou faaaogaina lo’u faitalia e lafoai ai mea e le paia, ma faalelalolagi, sa saoloto le Agaga e sau ia te a’u i se fuataga sili atu, ma o se eseesega maoae na faia i lo’u olaga e faamalosia, faamafanafana, ma taialaina a’u.
E matele ina tatou pipiimau i mea e leai se aoga—o mea e tapunia moni ai le faitotoa i faamanuiaga e finagalo le Atua e aumaia i o tatou olaga. Aisea tatou te faafesuiaia ai faatosinaga mamana ma gafatia o le Agaga mo le faafiafiaina po o le ta’uta’ua? Atonu o le matamata i se plokalama i le televise e le o afaina tele po o se agasala matuia, ae na taofia ai a’u mai le mauaina o le Agaga Paia e matua tele i lo’u olaga ma faagesegese ai lo’u alualu i luma faaleagaga.
Ou te matua faafetai ona e lei fiu le Alii ia te au ae sa talosaga mai pea ma le onosai ia te au e lafoai se mea e le paia ia mafai ai ona Ia faatumuina lo’u olaga i le taumasuasua o Lana uunaiga.
E alala le tusitala i Iuta, ISA.