Faamolemole Faasao le Ola o Tina

Ata

o se tina o loo fafagaina lana tama teine mai se ipu

Ata pu’e mai faaaloaloga a le tusitala

I le 10 o o’u tausaga, sa aafia ai lo’u tina i se ma’i fatu tuga. Sa ia faaaluina le tele o vaiaso i le falemai e tauivi ai mo lona ola.

I lea taimi, o lo’u faiaoga Peraimeri, o Sister Ellen Johnson, sa sau o ia i lo’u fale e faa tasi i le vaiaso e vaai a’u. Faatoa amata ona ou auai i le Peraimeri ma sa laitiiti lo’u malamalama e uiga i le talalelei. O vaiaso uma lava e faasoa mai ai e Sister Johnson lana molimau ia te au ma talanoa e uiga i le tatalo. Sa ia aoaoina au afai ou te tatalo, o le a tali mai le Tama Faalelagi.

Ina ua mavae ni nai vaiaso, sa atili lē lelei le soifua maloloina o Tina. Sa i ai se alatoto o lona fatu ua faaleagaina sa manaomia ona toe faaleleia. Sa fai mai lana fomai o le a oti o ia pe a aunoa ma se taotoga o le fatu. Peitai, o lona avanoa e toe malosi ai, sa na o le 50/50.

O le ituaiga taotoga tatala o le fatu sa i ai i se tulaga fou ma lamatia i le vaitau lea o le 1960. Sa fuafua fomai tipitipi e tipi le fatafata o Tina agai atu i lona tuasivi ma faavā ona ivi asoaso ina ia mafai ai ona oo atu i lona fatu. E toatele tagata mamai sa le’i faasaoina mai le taotoga. Sa ou le fiafia ma fefe nei oti lo’u tina.

Sa tele lava ina faigaluega Tama po o le i ai i le falemai faatasi ma Tina. O lo’u uso matua, o Pam, na tausia ma’ua ma lo’u uso. I le po, sa ou lagona le tuuatoatasi ma le fefe, ae sa ou mafaufau i le mea na aoaoina ai au e Sister Johnson e uiga i le tatalo. Sa masani ona ou tootuli i tafatafa o lo’u moega ma tagi, ma aioi atu i le Tama Faalelagi e faasaoina le ola o Tina.

I se tasi o na tatalo ma le tagi, sa oo mai ai se filemu tele ia te au ma sa ou le toe tagi. Sa ou lagonaina o le a manuia mea uma. Sa ou lagonaina le faamautinoaga o le a ola lo’u tina e vaai ia te au ua tuputupu ae ma e le tatau ona ou popole. Ou te lei faalogo i se leo pe vaai i se faaaliga vaaia, ae sa ou maua ni lagona filemu ma le toafilemu. Sa ou le masalosalo i ai. Sa tali mai le Tama Faalelagi i la’u tatalo, ma sa ou iloaina.

Ata

lima o loo piilima i tafatafa o se loka [locket]

Ata na tusia e Alex Nabaum

Sa faasaoina Tina mai le taotoga. Sa vaivai ma ma’i o ia i le tele o lona olaga, ae sa tali mai le Tama Faalelagi i a’u tatalo ma faasaoina lona ola. Sa ia ola e vaai ia te au o tuputupu ae, faaipoipo, ma maua ni fanau.

I ni tausaga mulimuli ane, ina ua avea Peresitene Russell M. Nelson o se Aposetolo, sa ta’u mai e Tina ia te au o ia o le fomai tipitipi o le fatu lea na faasaoina lona ola. Sa ou tusi atu ia te ia se tusi e faafetai atu ai ia te ia. Ina ua ia toe tusi mai, sa ia faafetai mai ia te au mo la’u tusi ma faailoa mai le fesoasoani a le Atua i lana galuega.