Ua Na’o Tusiga Faatekinolosi: Talavou Matutua
E Mafai Ona Ou Auai i le Aiga Pe Afai e Le Taliaina e Lo’u Aiga le Talalelei?
E mafai faapefea ona ou auai i se aiga e faasagatau i le Ekalesia?
Ou te iloa le tulaga e i ai le i ai o tagata o le aiga e i ai ni manatu le lelei e uiga i le talalelei a Iesu Keriso. E lagona le tuuatoatasi. Lē mautonu. Mafatia. E mafai ona e tau manatunatu ai pe e alofagia oe.
O le toatele o lo’u aiga e le talitonu i le talalelei, ma e talanoa faaaliali mai se tasi o uso e faasagatau i ai. E ui lava ina sa ou taumafai ia lagona e pei ou te auai i lo’u lava aiga, ua ou maua pea le olioli i le fuafuaga a le Tama Faalelagi mo le aiga.
O nisi nei o mea ua ou aoaoina.
Aua: Le Tulei Ese
I le taimi muamua, sa ou mafaufau na o le pau lea o le auala e aloese ai mai lagona faigata o le le auai o le motusia lea o sootaga ma le aiga ou te alofa i ai.
E LE SA’O.
Sa faamanatu mai e le Tama Faalelagi ia te au e taua le aiga i Lana fuafuaga. Sa finagalo o Ia ia ou alofa pea ia i latou. I le tā’ua o lena mea, e le finagalo o Ia ia tatou nonofo ai pea pe afai e sauaina o tatou tulaga.
Ae o le tumau i le vavalalata e mafai ona faigata faatasi ma le tele o lagona e aafia ai.
Nai lo lena: Alofa
O nisi taimi tatou te lagona ai le pei o se tagata ua faate’aeseina i totonu o i latou o e tete’e i mea tatou te talitonu i ai.
O le aso na ta’u mai ai e lo’u uso sa ita o ia ia te a’u ona sa ou talitonu i le talalelei o se tasi lea o o’u aso na sili ona faigata. Atonu e i ai tagata o o tatou aiga e le mafai ona alolofa ia i tatou. Ae e mafai ona tatou maua le mafanafana i upu a Peteru e faapea “afai e upuleagaina outou ona o le suafa o Keriso, amuia outou; aua o loo tumau ia te outou le agaga mamalu o le Atua” (1 Peteru 4:14).
Ua fetalai mai le Faaola ia i tatou e filifili le alofa (tagai i le Ioane 15:17), e tusa lava pe “ino’ino mai le lalolagi ia te outou … a e le ni o le lalolagi outou” (Ioane 15:18–19). O le taulai atu i le alofa i nei tagata o le aiga e mafai ona faaitiitia ai lagona o le tuuatoatasi.
Atonu e faaosoosoina le fiu gofie, ae ia manatua o le onosai ma le faalagolago i le Atua e mafai ona suia ai sootaga. E mafai ona Ia faia vavega e ala atu ia te oe.
Sa umi se taimi, ae a o ou faalagolago i le Atua ma faaali atu ma le onosai le alofa i lo’u uso, sa amata ona alu ese atu lona ita e faasaga i le Ekalesia. E le o atoatoa le ma mafutaga, ae o a’u tatalo ua taliina i le laa e tasi i le taimi a o ou faamuamuaina le alofa.
Nai lo o lenā: Ia Avea ma Sē e Faatupuina le Filemu
E ui tatou te le mananao e tulei ese o tatou aiga, ae e tatau ona tatou o ese mai faailoga o finauga. A uma le finauga, e mafai ona tatou toe taumafai. E masani ona tali atu Keriso i finauga ma le filemu (tagai Mosaea 14:7). Ae, e pei ona aoao mai Elder Robert D. Hales (1932–2017) o le Korama a Aposetolo e Toasefululua, “O le tali atu i se ala faaKeriso e le mafai ona tusitusia pe faavae i se mamanu. Sa eseese lava tali a le Faaola i tulaga uma.”1 O lea, mulimuli i le taitaiga a le Agaga.
O le filemu e pei o le Faaola e faaalia ai lou naunau e faalogo. E mafai ona e taumafai e malamalama i manatu o isi a o e tumau faamaoni i ou tulaga faatonuina.
A uma ona faalogologo, taumafai e faamatala nisi o ou lagona. Ina ua ou ta’u atu i lo’u aiga mea latou te fai mai ai ou te lē fiafia ai, sa latou tali mai ma le alofa. Sa matou talanoaina le auala e faaaloalo atili ai le tasi i le isi ma aloese ai mai finauga i le lumanai.
E pei ona saunoa Elder Walter F. González a o avea o ia ma se tasi o Fitugafulu, “O fesootaiga alofa ma le manino e mafai ona faia le tele o mea e faafaigofie ai soo se vevesi e ono tulai mai.”2
Aua le: Pa’ῡ Ese
Atonu e te lagonaina ua na o le pau lea o le auala e auai ai i lou aiga o le tuua lea o le Ekalesia.
E LE SA’O.
Nai lo o lenā: Faatino le Faatuatua
O nisi tagata e le taliaina le talalelei e ono taumafai ia e lagona le tausalaina ona o lou talitonu. Ina ua tuua e lo’u uso le Ekalesia, sa lagona e lo matou aiga e pei ua ia talosagaina i matou e filifili i le va o ia ma le Ekalesia. O le toatele o lo’u aiga na filifilia o ia ma faapena foi ona o ese.
E ui lava i lenei uunaiga, sa ou aoao e faapea atu, “a ou te le mā lava, auā ua ou iloa o ia ua ou faatuatua i ai” (2 Timoteo 1:12).
Ua ou iloa o ai le Atua, ma ou te filifili e faalagolago ia te Ia. O lena faatuatua na fesoasoani e faamalosia ai a’u.
Nai lo o lenā: Saili ni Uso ma ni Tuafafine ia Keriso
E pei ona saunoa Elder Dieter F. Uchtdorf o le Korama a Aposetolo e Toasefululua, “I le Ekalesia a Iesu Keriso, o le a e maua ai se aiga o tagata e le ese tele mai ia te outou.”3
Ua malamalama ou uso ma tuafafine ia Keriso i lo outou alolofa i le talalelei ma e mafai ona latou uunaia outou ia faalatalata atili atu ia te Ia. E mafai ona latou avatu ia te oe le auai o loo e sailia.
Ia Fai: Faalagolago atu i le Tama Faalelagi ma Iesu Keriso.
Na aoao mai foi Elder González: “E oo lava i le Faaola sa i ai tagata o [Lona] aiga sa lei faasoaina atu Ona talitonuga. I le Tusi Paia tatou te faitau ai, ‘Auā o ona uso foi, latou te lei talitonu ia te ia” (Ioane 7:5).”4
E malamalama Iesu Keriso i ou tauiviga. Liliu atu ia te Ia mo le faamalologa. I le Tala”i La”u Talalelei, na folafola mai ai e Elder Dale G. Renlund o le Korama a Aposetolo e Toasefululua e faapea “o mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.”5 E ui i o tatou manaoga ia auai, ae o le mea moni e masani lava ona tatou le auai faatasi ma isi pe a avea i tatou ma soo o le Atua. Ua Ia valaauina i tatou o Ona tagata tulaga ese mo se mafuaaga (tagai 1 Peteru 2:9; Teuteronome 14:2). Ae ona o la tatou sootaga faalefeagaiga ma Ia, o le a tatou auai pea ia te Ia. Ma o le mea lena e sili ona taua.