30
O Iesu Keriso o le Alo o le Tama Faalelagi (Kerisimasi)
Folasaga mo le Faiaoga
Ina ia e saunia faaleagaga e aoao atu lenei lesona, faamolemole ia faitau ma mafaufau loloto i mea nei:
Na fanau mai Iesu Keriso i se tina faalelalolagi, o Maria, ma se tama e faalelagi, o le Tama Faalelagi. O Ia moni lava o le Alo o le Atua. Ona o Lona alofa tele mo i tatou, na auina mai ai e le Tama Faalelagi ia Iesu Keriso i le lalolagi e avea ma Faaola ma o tatou Faataitai. “Aua ua faapea lava ona alofa mai o le Atua i le lalolagi, ua ia aumai ai Lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau.” (Ioane 3:16).
Sauniuniga
Faailoga le itulau 106 i le tusi lesona lenei e faafaigofie ai ona e susue i ai.
Gaoioiga e Aoao Ai
Amata i se gaoioiga faapotopoto. Mo manatu, tagai i le itulau 3.
Tatalo
Valaaulia se tamaitiiti e faia le tatalo amata.
Ata
Faaali atu le ata o i le itulau 126. Valaaulia tamaiti e vaai i le pepe i le ata. Ta’u i ai o Lona igoa o Iesu, ma valaaulia i latou e fai mai “Iesu.” Fai i tamaiti e faafoliga o loo luelue se pepe i o latou lima.
Faasino ia Maria i le ata ma ta’u i tamaiti, “O le tina lea o Iesu. O lona igoa o Maria.”
Ta’u i tamaiti o Iesu o le Atalii o le Tama Faalelagi. Valaaulia tamaiti e faataitai mai o “O Iesu o le Atalii o le Tama Faalelagi,” fai auauai ni nai upu i le taimi. Fai i ai na auina mai e le Tama Faalelagi Lona Alo, o Iesu Keriso, i le lalolagi aua e alofa o Ia ia i tatou.
Pese
Toe faasino i le pepe o Iesu i le ata. Fai i tamaiti o le a e usuina se pese. Valaaulia i latou e fai mai, “Na Ia Auina Mai Lona Alo” pe a e tusi i le pepe o Iesu. Ia latou faataitaia mo ni nai taimi, ona usu lea pe fai upu o le “Na Ia Auina Mai Lona Alo” (Tusipese a Tamaiti, 20–21):
Na faapefea ona faaali mai e le Tama le alofa?
Na Ia auina mai Lona Alo, (faasino i le ata o le pepe o Iesu) ma le filemu.
Faaali atu le ata o Iesu Keriso i le itulau 106. Fai i tamaiti na soifua ae le pepe o Iesu e avea ma Faaola, o Iesu Keriso. Valaaulia i latou e fai mai, “Na ia auina mai Lona Alo” pe a e faasino i le ata o le Faaola. Usu pe fai atu upu o le “Na Ia auina mai Lona Alo”:
Na faapefea ona faaali mai e le Tama le ala?
Na Ia auina mai Lona Alo (faasino i le ata o le Faaola) ia tatou iloa.
Faaiuga
Faaali atu lou agaga faafetai ona o le auina mai e le Tama Faalelagi o Iesu Keriso. Faasoa atu lau molimau o Iesu Keriso o le Alo o le Tama Faalelagi.
Tatalo
Valaaulia se tamaitiiti e faia le tatalo faaiu.
Gaoioiga e Filifili Ai
Sauniuniga
-
Mo papeti laau: Kopi ma oti ese ia ata tusi o i le itulau 127 mo tamaiti taitoatasi. Faapipii pe kelu se fasilaau i le pito i tua o ata taitasi e faia ai se papeti laau mo tamaiti.
Atacoloring page, Nativity picturesO Iesu Keriso o le Alo o le Tama Faalelagi
-
Mo le gaoioiga i mau: Aumai se kopi o le Tusi a Mamona. Faailoga le 3 Nifae 9:15 e faafaigofie ai ona e susue i ai.
Papeti Laau
Ave i tamaiti papeti laau na e faia mo i latou. Toe faamatala otooto le tala o le soifua mai o Iesu Keriso i au lava upu (tagai Luka 2:4–16). Valaaulia tamaiti e uu i luga a latou papeti laau i le taimi talafeagai a o faagasolo le tala. O lenei gaoioiga e fetaui lelei mo tamaiti matutua.
Pese
Usu pe fai atu upu o le pese “I Se Fale o Manu” (Tusipese a Tamaiti, 26–27) ma fai lava soo se faatinoga o fautua mai i upu. Valaaulia tamaiti tou te faia faatasi
I se fale o manu, leai se moega,
Alii o Iesu taoto filemu;
Fetu o le lagi susulu ia te ia,
Le Alii o Iesu ua moe filemu.
Fuaiupu o Gaoioiga
Tauloto le fuaiupu o gaoioiga lea, ma valaaulia tamaiti tou te faia faatasi:
O se pepe i le fale povi, (luelue lima pei o se pepe)
Latalata i ai se tina alofa,
Susulu se fetu i le lagi, (faasino i le lagi)
Ua iinei le Alo o le Atua! (piilima lima)
Mau
Ta’u i tamaiti na tau mai e Iesu ia i tatou i tusitusiga paia o Ia o le Alo o le Atua, lo tatou Tama Faalelagi. Susu’e le Tusi a Mamona i le 3 Nifae 9:15 ma faitau, “Faauta, o a’u o Iesu Keriso, o le Atalii o le Atua.” Valaaulia tamaiti tou te fai faatasi “o le Alo o le Atua.”