“Maipapan iti Libro ni Mormon,” Dagiti Estoria iti Libro ni Mormon (2023)
Maipapan iti Libro ni Mormon
Ni Jesucristo ken dagiti taona kadagiti kontinente ti America
Nasantuan a kasuratan ti Libro ni Mormon. Isuronatayo maipapan ken ni Apo Jesucristo ken ti isasarungkarna kadagiti kontinente ti America iti nabayagen a panawen. Manipud iti Libro ni Mormon, masursurotayo ti maipapan iti ebanghelio ni Jesus. Isuronatayo no kasano ti maaddaan iti talna ita ken no kasano a makapagnaedtayo manen iti Dios ken ni Jesus iti maysa nga aldaw.
Panid ti paulo ti Libro ni Mormon; pakauna iti Libro ni Mormon; 3 Nephi 11
Ti Libro ni Mormon ket insurat dagiti propeta ti Dios. Nagsuratda kadagiti metal a panid a maawagan kadagiti pinanid. Dagiti estoria ken pammaneknekda ket tumulong kadatayo a maaddaan iti pammati ken ni Jesus. Nagsuratda maipapan iti adu a grupo dagiti tao a nagnaed kadagiti kontinente ti America iti nabayagen a panawen.
Panid ti paulo ti Libro ni Mormon; pakauna iti Libro ni Mormon
Immay ti maysa a grupo manipud Jerusalem kadagiti kontinente ti America agarup 600 a tawen sakbay ti pannakayanak ni Jesus. Nagbalinda a dua a nasion a maawagan iti Lamanite ken Nephite.
Pakauna iti Libro ni Mormon; 1 Nephi 1:4
Nasapsapa nga amang, sabali pay a grupo ti immay manipud Torre ti Babel nga agturong kadagiti kontinente ti America. Naawaganda iti Jaredite.
Pakauna iti Libro ni Mormon,; Ether 1:33–43
Sinuruan dagiti propeta ti Dios dagiti tao. Idi dimngeg ken tinungpal dagiti tao dagiti bilin ti Dios, tinulonganna ida. Nangisuro dagiti propeta maipapan ken ni Jesus ket kinunada mayanakto Isuna idiay Jerusalem. Naammuan dagiti Nephite ken Lamanite a sarungkaranto ida ni Jesus kalpasan ti ipapatayna.
2 Nephi 1:20; 25:12–14; 26:1, 3, 9; Mosiah 3:5–11; Alma 7:9–13; Helaman 3
Immay ni Jesus a kas met laeng iti kinuna dagiti propeta. Kalpasan ti ipapatay ken panagungar ni Jesus, sinarungkaranna dagiti tao. Impariknana iti tunggal tao dagiti lamma ti lansa kadagiti ima ken sakana. Ammoda a ni Jesus ti Anak ti Dios. Insurona ti ebangheliona, ket insurat dagiti tao daytoy. Nagsasaritaanda maipapan iti isasarungkar ni Jesus iti uneg ti adu a tawen.
3 Nephi 11:7–15, 31–41; 16:4; 4 Nephi 1:1–6, 13–22
Ni Mormon ti maysa a propeta a nagbiag iti sumagmamano a gasut a tawen kalpasan ti isasarungkar ni Jesus. Kabayatan ti panagbiag ni Mormon, insardeng dagiti tao ti panagsurot iti Apo. Addaan ni Mormon kadagiti sinurat dagiti propeta a nagbiag sakbay kenkuana. Inkabilna ti adu a sinuratda iti maysa nga asmang dagiti pinanid. Nagbalin dagitoy a pinanid iti Libro ni Mormon.
Pakauna iti Libro ni Mormon; Dagiti Balikas ni Mormon 1:2–9; Mormon 1:2–4, 13–17
Sakbay a natay ni Mormon, intedna dagiti pinanid iti anakna a ni Moroni. Kabayatan ti panagbiag ni Moroni, nagar-aramid dagiti tao kadagiti dakes unay a banag. Kayatda a patayen ti siasino man a mamati ken ni Jesus. Kayat ni Moroni a tulongan dagiti tao iti masakbayan, isu a nagsurat iti ad-adu pay kadagiti pinanid ket inkalina ida tapno agtalinaedda a natalged.
Pakauna iti Libro ni Mormon; Dagiti Balikas ni Mormon 1:1–2; Mormon 8:1–4, 14–16; Moroni 1
Adu a tawen kalpasanna, idi 1823, immay ni Moroni kas maysa nga anghel ken ni Propeta Joseph Smith. Imbaga ni Moroni ken ni Joseph no sadino ti pakasarakan kadagiti pinanid. Babaen ti tulong ti Dios, impatarus ni Joseph no ania ti naisurat kadagiti pinanid.
Pakauna iti Libro ni Mormon; Joseph Smith—Pakasaritaan 1
Ibaon ti Dios ti Espiritu Santo a mangtulong kenka a mangammo no pudno ti maysa a banag. No basaem ti Libro ni Mormon, mabalinmo ti agkararag ken agsaludsod iti Dios no pudno daytoy. Iti isu met laeng a wagas, mabalinmo nga ammuen a ni Jesus ti Mangisalakanmo ken ay-ayatennaka.