“Dagiti Anti-Nephi-Lehi,” Dagiti Estoria iti Libro ni Mormon (2023)
Dagiti Anti-Nephi-Lehi
Tattao a mangpili nga ayaten dagiti kabusorda
Nasursuro ti adu a Lamanite maipapan iti Dios manipud ken ni Ammon ken dagiti kakabsatna. Napigsa ti pammati dagitoy a Lamanite iti Apo ken sinurotda dagiti bilin ti Dios. Kayatda ti baro a nagan, isu nga inawaganda ti bagbagida iti Anti-Nephi-Lehi imbes a Lamanite.
Nagbalbaliw dagiti Anti-Nephi-Lehi gapu iti pammatida iti Dios. Nagbabawida kadagiti dakes a banag nga inar-amidda. Ammoda nga ay-ayaten ida ti Dios ken pinakawanna ida.
Nagpungtot dagiti Lamanite ket agsagsaganadan a mangdarup kadagiti Anti-Nephi-Lehi. Imbes a makirangetda, nagkari dagiti Anti-Nephi-Lehi iti Dios. Kinunada a didanton pulos dangran manen dagiti tao. Tapno maipakitada daytoy, inkalida dagiti armasda. Pinilida nga ayaten dagiti kabusorda imbes a dangran wenno patayen ida.
Dinarup dagiti Lamanite a saan a namati iti Dios dagiti Anti-Nephi-Lehi.
Adda pammati dagiti Anti-Nephi-Lehi a no mapapatayda, agbiagda a kadua ti Dios. Tinungpalda ti karida iti Dios ket saanda a nakiranget kadagiti Lamanite.
Imbes a makirangetda, nagkararag dagiti Anti-Nephi-Lehi. Idi nakita dagiti Lamanite daytoy, adu kadakuada ti nagsardeng iti panangdarup. Madi ti riknada a pumatay kadagiti tao. Pinili dagita a Lamanite a dida iti kaano man mangdangran manen kadagiti tao. Kimmappengda kadagiti Anti-Nephi-Lehi.
Iti panaglabas ti panawen, ad-adu pay a tattao ti nadarup. Nagliday ni Ammon ken dagiti kakabsatna iti panagsagaba dagiti Anti-Nephi-Lehi. Kiniddawda iti ari nga ipanna dagiti taona a makipagnaed kadagiti Nephite. Kinuna ti ari a mapanda no tarigagayan ti Apo a papanen ida. Nagkararag ni Ammon. Kinuna ti Apo a nasken a mapanda ken pagtalinaedenna ida a natalged.
Nangted dagiti Nephite kadagiti Anti-Nephi-Lehi iti daga a pagnaedanda ken sinalaknibanda ida. Kas pangsubad, nangted dagiti Anti-Nephi-Lehi iti taraon kadagiti Nephite. Addaan iti dakkel a pammati dagiti Anti-Nephi-Lehi ken inayatda ti Dios. Napudnoda iti tunggal maysa ken tinungpalda ti karida a dida pulos makiranget. Napudnoda iti unos ti panagbiagda.