“Dagiti Pagilasinan ti Pannakayanak ni Jesus,” Dagiti Estoria iti Libro ni Mormon (2023)
Dagiti Pagilasinan ti Pannakayanak ni Jesus
Pammati kadagiti pannursuro ti maysa a propeta
Agarup lima a tawenen manipud idi insuro ni Samuel a propeta maipapan kadagiti pagilasinan ti pannakayanak ni Jesucristo. Adu a tattao ti namati ken nangbuybuya kadagiti pagilasinan. Kinuna dagiti dadduma a tattao a nagbiddut ni Samuel ket napalabasen ti tiempo para kadagiti pagilasinan. Inuyawda dagiti namati ket kinunada a saan nga umay ni Jesus.
Madanagan dagiti namati, ngem adda pammatida. Intuloyda a binuybuya dagiti pagilasinan. Maysa a pagilasinan ket maysa a rabii a saan a sumipnget. Naraniag a kas iti aldaw uray kalpasan ti ilelennek ti init. Ti rabii nga awan ti sipnget ket maysa a pagilasinan a mayanak ni Jesus iti sumaruno nga aldaw iti sabali a daga.
Nagaramid iti plano dagiti tao a saan a namati. Nangpilida iti aldaw ket kinunada a no saan a mapasamak ti pagilasinan iti dayta nga aldaw, mapapatay dagiti mamati.
Maysa a lalaki nga agnagan iti Nephi ti maysa a propeta iti daytoy a panawen. Naladingitan unay ta kayat ti sumagmamano a tao a patayen dagiti namati.
Nagtamed ni Nephi iti daga ket nagkararag iti Dios para kadagiti mamati a dandanin matay gapu iti pammatida. Nagkararag iti agmalmalem.
Kas sungbat iti kararagna, nangngeg ni Nephi ti timek ni Jesus. Kinuna ni Jesus a mapasamak ti pagilasinan iti dayta a rabii ket kalpasanna mayanak Isuna iti kabigatanna.
Iti dayta a rabii awan ti sipnget uray limneken ti init. Nasdaaw dagiti tao a saan a namati kadagiti balikas ni Samuel ta nadalupoda iti daga. Nagbutengda gapu ta saanda a namati. Saan a napapatay dagiti tao a namati.
Kabigatanna, nagsingising manen ti init ket nagtalinaed a nalawag ti tangatang Ammo ti amin a tattao a daytoy ti aldaw a mayanak ni Jesus.
Nakita dagiti tao ti sabali pay a pagilasinan. Nagparang ti baro a bituen iti tangatang. Pimmudno ti amin a pagilasinan nga insao ni Samuel. Ad-adu pay ti namati a tao ken ni Jesus ken nabuniaganda.