“Ti Kayo ti Biag,” Dagiti Estoria iti Libro ni Mormon (2023)
“Ti Kayo ti Biag,” Dagiti Estoria iti Libro ni Mormon
Ti Kayo ti Biag
Naparegta a tagtagainep ni Lehi
Maysa a rabii, naaddaan iti tagtagainep ni Lehi manipud iti Apo. Imbagana iti pamiliana maipapan iti tagtagainep.
Iti tagtagainepna, nakita ni Lehi ti maysa a tao a nagkawes iti puraw a roba. Imbaga ti tao ken ni Lehi a sumurot kenkuana.
Nakita ni Lehi nga adda isuna iti nasipnget ken awan matataona a lugar. Nagna iti uneg ti adu nga oras. Ngem nagtalinaed ti sipnget. Kamaudiananna, nagkararag ni Lehi para iti tulong.
Idi malpas ni Lehi ti nagkararag, nakitana ti dakkel a talon. Iti dayta a talon adda kayo nga addaan iti puraw a bunga. Impagarup ni Lehi a mangparagsak kenkuana ti bunga, isu a kinnanna daytoy. Napno ti kararuana iti rag-o.
Nasaysayaat ti ramanna ti bunga ngem iti ania man a sabali a bunga. Nasam-it ken naimas daytoy. Kayat ni Lehi nga ibinglay daytoy iti pamiliana. Ammona a mangparagsak met daytoy kadakuada. Nakita ni Lehi da Saria, Sam, ken Nephi a nakatakderda iti abay ti karayan. Langada ti napukaw. Inawagan ida ni Lehi iti napigsa a timek. Kiniddawna kadakuada nga umasideg ket manganda iti bunga.
Immasideg da Saria, Sam, ken Nephi iti kayo ket kinnanda ti bunga. Sinapul ni Lehi da Laman ken Lemuel. Kinayatna met ida a mangnanam met iti bunga. Ngem saanda nga umasideg a mangan iti bunga.
Kalpasanna, nakita ni Lehi ti dalan nga addaan iti landok a pagkaptan nga agturong iti kayo. Nakitana ti adu a tattao a magmagna nga agturong iti dana. Pagammuan, dimteng ti napuskol a sipnget. Ti sipnget ti namagbalin a narigat a makita daytoy. Ti laeng wagas tapno makapan iti kayo ket ti ikakapet a naimbag iti landok a pagkaptan.
Pimmanaw ti sumagmamano a tattao iti dana ket napukawda. Kimpet dagiti dadduma iti landok a pagkaptan ket nakapagpasangoda.
Iti nakadanonda iti kayo, nanganda iti bunga.
Timmangad ni Lehi ket nakitana ti maysa a dakkel a pasdek a napno iti adu a tattao. Inuyawda dagiti tattao a nangan iti bunga. Dakes ti rikna ti sumagmamano a nangan iti bunga idi kinatawaan ida dagiti dadduma, isu a pinanawanda ti kayo. Nagallaallada ket napukawda.
Iti tagtagainepna, nakita ni Lehi ti ad-adu pay a tao a kimmapet a siiirut iti landok a pagkaptan. Immaddangda nga immasideg agingga a dimtengda iti kayo. Kalpasanna, nagparintumengda iti kayo ket kinnanda ti bunga. Saanda a dimngeg kadagiti tao iti pasdek. Pinilida ti agtalinaed iti kayo.
Idi makariing ni Lehi, madanagan maipapan kada Laman ken Lemuel. Saanda a kinnan ti bunga iti tagtagainepna. Ay-ayaten ni Lehi da Laman ken Lemuel. Ninamnamana nga agtalinaedda nga asideg iti Apo. Inawisna ida nga agtungpal kadagiti bilin ti Dios.