“Ti Ari ti Amin a Lamanite,” Dagiti Estoria iti Libro ni Mormon (2023)
“Ti Ari ti Amin a Lamanite,” Dagiti Estoria iti Libro ni Mormon
Ti Ari ti Amin a Lamanite
Panagtarigagay a masursuruan maipapan iti Apo
Adda maysa nga ari dagiti Lamanite a nangituray iti amin a dadduma pay nga arida. Isu ti ama ni Ari Lamoni. Impagarupna a kabusor dagiti Nephite. Maysa nga aldaw, nakitana ni Lamoni a kaduana ni Ammon. Dinamag ti ari ken ni Lamoni no ania ti ar-aramidenna a kaduana ti maysa a Nephite. Imbaga ni Lamoni iti ari a mapanda wayawayaan dagiti kakabsat ni Ammon manipud iti pagbaludan.
Nagpungtot ti ari. Impagarupna nga agul-ulbod dagiti Nephite tapno padasenda ti agtakaw kadagiti Lamanite. Imbagana ken ni Lamoni a patayenna ni Ammon ken kumuyog kenkuana.
Saan a patayen ni Lamoni ni Ammon. Imbagana iti ari a propeta ti Dios ni Ammon ken dagiti kakabsatna a lallaki. Kinunana a tulonganna dagiti kakabsat a lallaki ni Ammon.
Inruar ti ari ti espadana a mangdangran ken ni Lamoni, ngem pinagsardeng ni Ammon. Dinarup ketdi ti ari ni Ammon. Indepensa ni Ammon ti bagina. Sinugatanna ti takiag ti ari isu a saan a makalaban ti ari. Nagbuteng ti ari gapu iti kinapigsa ni Ammon. Inkarina nga itedna ken Ammon ti kagudua ti pagarianna no bay-an ni Ammon nga agbiag isuna.
Saan a kayat ni Ammon ti pagarian. Imbes ketdi, kiniddawna iti ari a wayawayaanna dagiti kakabsatna a lallaki manipud iti pagbaludan. Kiniddawna pay iti ari nga isardengna ti agpungtot ken ni Lamoni. Kinuna ni Ammon a bay-an koma ti ari nga agturay ni Lamoni iti wagas nga impagarupna a kasayaatan.
Nasdaaw ti ari no kasano ti panangayat ni Ammon ken ni Lamoni. Immanamong nga aramidenna ti amin a kiniddaw ni Ammon.
Kayat ti ari a maammuan ti ad-adu pay maipapan iti imbaga kenkuana da Ammon ken Lamoni maipapan iti Dios. Indawatna nga umay ni Ammon ken dagiti kakabsatna a lallaki a mangisuro kenkuana.
Napan da Ammon ken Lamoni iti daga ti Middoni. Adda iti pagbaludan dagiti kakabsat a lallaki ni Ammon idiay. Napungoda iti tali ket saanda a naikkan iti taraon wenno danum. Kinumbinsi ni Lamoni ti agturay ti Middoni a palubosanna a mawayawayaan dagiti kakabsat a lallaki ni Ammon.
Apaman a nawayawayaanda, napan dagiti kakabsat a lallaki ni Ammon iti ama ni Lamoni. Nagtamedda iti ari ket kiniddawda nga agbalinda a katulonganna. Kinuna ti ari a saan. Imbes ketdi, kayatna ida a mangisuro kenkuana ti maipapan iti ebanghelio. Maysa kadagiti agkakabsat a lallaki ti agnagan iti Aaron. Imbasana dagiti nasantuan a kasuratan iti ari ken insurona kenkuana maipapan iti Dios ken ni Jesucristo.
Namati ti ari ken ni Aaron. Kinunana nga isukona ti sibubukel a pagarianna tapno maam-ammona ti Dios. Dinamagna ken ni Aaron no ania ti nasken nga aramidenna. Imbaga ni Aaron iti ari nga agbabawi ken agkararag iti Dios nga addaan iti pammati. Nagbabawi ti ari iti amin a basolna ken nagkararag.
Nadalupo ti ari iti daga. Nagtaray dagiti katulongan ti ari a mangibaga iti reyna.
Immay ti reyna ket nakitana ti ari iti daga. Impagarupna a ni Aaron ken dagiti kakabsatna a lallaki ti nangpapatay iti ari. Nagpungtot ti reyna.
Imbaga ti reyna kadagiti katulongan a patayenda ni Aaron ken dagiti kakabsatna a lallaki. Ngem nagbuteng dagiti katulongan. Kinunada a napigsa unay ni Aaron ken dagiti kakabsatna a lallaki. Ita nagbuteng ti reyna. Imbaonna dagiti adipen a mangibaga kadagiti tao iti siudad no ania ti napasamak. Ninamnamana a patayento dagiti tao ni Aaron ken dagiti kakabsatna a lallaki.
Ammo ni Aaron a makaguranto dagiti tao. Ammona pay a saan a natay ti ari. Tinulonganna ti ari a tumakder. Naisubli ti ari ti pigsana ket timmakder. Nasdaaw ti reyna ken dagiti katulongan.
Insuro ti ari ti reyna ken dagiti katulongan maipapan ken ni Jesus. Namatida amin ken ni Jesus. Kayat ti ari a masursuan ti amin a tattaona maipapan ken ni Jesus. Nagaramid iti linteg a mabalin nga isuro ni Aaron ken dagiti kakabsatna a lallaki ti ebanghelio iti sadino man iti pagarianna. Nangisuroda kadagiti tao ken nangawagda kadagiti saserdote ken mannursuro iti daga.