“Da Mosiah ken Zeniff,” Dagiti Estoria iti Libro ni Mormon (2023)
Da Mosiah ken Zeniff
Sinaluadan ti Apo
Aduan iti gubgubat dagiti Nephite ken Lamanite. Maysa nga aldaw, imbaga ti Apo iti maysa a Nephite nga agnagan iti Mosiah a pumanaw iti daga ni Nephi a kakuyogna ti asino man a sumurot iti Apo.
Adu a Nephite ti nagtulnog iti Apo ken pimmanawda a kakuyog ni Mosiah. Inturong ida ti Apo iti maysa a daga nga adda dagiti tao nga agnanaed ditoy. Naawaganda iti tattao ti Zarahemla.
Dimteng met dagiti tao ti Zarahemla manipud iti Jerusalem iti nabayagen a panawen. Naragsakanda nga imbaon ti Apo dagiti Nephite nga addaan kadagiti pinanid a gambang. Timmipon dagiti tao ni Mosiah kadagiti tao ti Zarahemla. Pinili ti amin a tao ni Mosiah kas arida. Insurona kadakuada ti maipapan iti Apo.
Nabayagen nga agnanaed dagiti Nephite iti Zarahemla idi nagsubli ti dakkel a grupo iti daga ni Nephi. Indauluan ida ti maysa a Nephite nga agnagan iti Zeniff.
Agnaed itan dagiti Lamanite iti daga ni Nephi, isu a dinamag ni Zeniff iti arida no mabalin met nga agbiag idiay dagiti taona. Immanamong ti ari.
Inallilaw ti ari ni Zeniff ken dagiti taona. Pinalubosanna ida nga agnaed iti daga ni Nephi tapno maalana ti sumagmamano a taraon ken ayupda iti agangay. Nagnaed sadiay a sitatalna dagiti tao ni Zeniff iti uneg ti adu a tawen. Nagmulada iti adu a taraon ken adu ti ayupda. Kalpasanna, nangraut dagiti Lamanite ket pinadasda nga alaen ti taraon ken dagiti ayupda.
Insuro ni Zeniff dagiti taona nga agtalek iti Apo. Idi immay dagiti Lamanite a makiranget kadakuada, nagkararag da Zeniff ken dagiti taona iti Apo. Inikkan ida ti Apo iti pigsa ken timmulong a nangsalaknib kadakuada. Nabaelanda a pinapanaw dagiti Lamanite. Pinaraburan ti Apo ni Zeniff ken dagiti taona gapu iti pammatida.