“Abish,” Dagiti Estoria iti Libro ni Mormon (2023)
Abish
Mangtultulong kadagiti taona a mamati ken ni Jesus
Nagtrabaho ni Abish iti maysa a reyna a Lamanite. Naammuan ni Abish ti maipapan ken ni Jesucristo manipud iti parmata ni amana. Iti uneg ti adu a tawen, namati ken ni Jesus ken kayatna ti sumurot Kenkuana. Ngem saanna pay nga imbaga kadagiti dadduma a Lamanite.
Maysa nga aldaw, immay iti pagarian ti maysa a Nephite nga agnagan iti Ammon a mangisuro kadagiti Lamanite maipapan ken ni Jesus ken iti Dios. Namati ti reyna ken ari no ania ti insuro ni Ammon. Ammo ti reyna ken ari nga umayto ni Jesus ditoy daga ken aramidenna a mapakawan ti amin a mamati Kenkuana.
Alma 17:12–13; 18:33–36, 39–40; 19:9, 13
Narikna ti reyna ken ari ti Espiritu Santo ket naragsakda unay ta nadalupoda iti daga. Nadalupo met ni Ammon ken dagiti katulongan. Ni Abish laeng ti agmaymaysa a nakatakder.
Kayat ni Abish nga ibaga kadagiti tao ti maipapan iti daytoy a milagro. Ninamnamana a mamati dagiti tao iti bileg ti Dios no makitada no ania ti napasamak. Isu a nagtaray ni Abish a napan namalaybalay. Imbagana kadagiti tao a mapanda kitaen no ania ti inaramid ti Dios para iti reyna ken ari.
Adu a tattao ti immay iti balay ti reyna ken ari. Nasdaawda gapu ta kasla natayen ti reyna, ti ari, ken amin a katulonganda.
Natikaw dagiti tao. Nagsisinnupiatda maipapan iti napasamak iti reyna ken ari.
Idi nagsubli ni Abish, nakitana nga agsisinnupiat dagiti tao. Nagliday gapu ta saanda a nakita ti bileg ti Dios. Kalpasanna iniggamanna ti ima ti reyna, ket timmakder ti reyna ket nagdaydayaw ken ni Jesus.
Iniggaman ti reyna ti ima ni asawana, ket timmakder. Imbaga ti ari kadagiti tao maipapan ken ni Jesus. Kalpasanna timmakder ni Ammon ken dagiti dadduma a katulongan. Imbagada amin kadagiti tao a binalbaliwan ida ni Jesus. Kayatda itan nga agaramid laeng kadagiti nasayaat a banag. Adu a tattao ti namati kadakuada.
Kas iti ninamnama ni Abish, nakita dagiti tao ti bileg ti Dios. Adu a tao ti namati ken ni Jesus ket nabuniaganda. Adda ti Espiritu ti Dios kadakuada. Impasdekda pay ti Simbaan iti dagada. Nakitada a tulongan ni Jesus ti asino man nga agbabawi ken mamati Kenkuana.