“Ti Pammati ti maysa a Reyna,” Dagiti Estoria iti Libro ni Mormon (2023)
“Ti Pammati ti maysa a Reyna,” Dagiti Estoria iti Libro ni Mormon
Ti Pammati ti maysa a Reyna
Panangsapul iti rag-o ken ni Jesucristo
Nagturay ti reyna a Lamanite a kaduana ti asawana, ni Ari Lamoni. Kiniddaw ti ari iti maysa a Nephite nga agnagan iti Ammon a mangisuro kenkuana maipapan iti Apo. Namati ti ari iti imbaga kenkuana ni Ammon. Nagparintumeng ti ari nga agkararag ket kiniddawna iti Apo a pakawanenna. Kabayatan ti panagkararagna, nadalupo ti ari iti daga. Kasla natayen ti ari.
Impan dagiti katulongan ti ari iti reyna. Inkabilda iti pagiddaanna. Nagidda sadiay ket saan a naggaraw iti dua nga aldaw ken dua a rabii.
Kabayatan dayta a kanito, nagliday unay ti reyna ken dagiti annakna. Nagtalinaedda iti ari ket nagsangitda gapu kenkuana. Kinuna ti sumagmamano a tao a nasken a maitabon ti ari. Ngem kayat ti reyna a kasaritana nga umuna ni Ammon. Nangngegna nga adda kenkuana ti bileg ti Dios. Kiniddaw dagiti katulongan ti reyna nga umasideg ni Ammon iti reyna.
Imbaga ti reyna ken ni Ammon a nangngegna nga isu ket maysa a propeta ti Dios. Kiniddawna ken ni Ammon a mapanna kitaen ti ari. Ammo ni Ammon a sibibiag ti ari. Daytoy ti bileg ti Dios a nakaigapu iti pannaturog ti ari. Imbaga ni Ammon iti reyna a makariingto ti asawana iti kabigatanna.
Nagtalek ti reyna ken ni Ammon ken dakkel ti pammatina iti Dios. Namati a makariingto ti asawana iti kabigatanna. Imbaga ni Ammom a naparaburan ti reyna gapu iti dakkel a pammatina. Imbagana iti reyna a dakdakkel ti pammatina ngem iti bukodna a tattao. Nagtalinaed nga asideg ti reyna ken nagbantay iti asawana iti agpatnag.
Kabigatanna, nakariing ti ari. Imbagana iti reyna a nakitana ni Jesucristo. Ammo ti reyna ken ari no kasano ti kadakkel ti panagayat ni Jesus kadakuada, ket napnoda iti rag-o.