Helamana 1–4

O loo tolaulau mai i le tusi a Helamana se taimi o le amioleaga tele i tagata sa Nifae. Ua faatupulaia tagata faomea o Katianetona ma sa tumau tagata i ni faataamilosaga o le amioleaga ma le faatafunaga lea e mulimuli mai ai le salamo ona toe foi foi lea i le amioleaga. O le tele o nei faafitauli e ono mafai ona taulai atu i finauga ia na amata mai i le mataupu muamua o le Helamana. Atonu o nisi tagata e manatu o finauga ua na o sina agasala itiiti, ae ua saunoa mai le Au Pulega Aoao i le matautia o finauga.

Sa tau mai e Peresitene James E. Faust (1920–2007) i se auala tuusao e faapea e le taliaina e le Agaga o le Alii ia finauga: “Afai e i ai le tauaimisa, o le a alu ese le Agaga o le Alii, e tusa lava pe o ai e sese” (i le Conference Report, Ape. 1996, 57; po o le Liahona, Iulai 1996, 48).

Sa faamalamalma mai e Elder Joseph B. Wirthlin (1917–2008) o le Korama a Aposetolo e Toasefululua e faapea o finauga e faamatua’ia lava e Satani e tautua ai ana ia lava faamoemoega leaga: “O le agasala o le gaoi, lē faamaoni, feupuai, fefinauai, ma isi mealeaga ua i ai i le lalolagi lenei, e le o ni mea e tutupu fua mai. O ni faamaoniga o le galuega faia pea a Satani ma i latou o e ua mulimuli ia te ia. Ua ia faaaoga mea faigaluega ma auala uma e mafai ona ia maua e faasese, ma faafenumiai, ma taitai sese ai tagata” (i le Conference Report, Oke. 1994, 100; po o le Liahona, Ian. 1995, 90).

I le faatusatusaga i le aafiaga faatafuna o finauga, sa faamamafa mai ai e Peresitene Henry B. Eyring o le Au Peresitene Sili le lotogatasi o le agaga o le filemu: “O le mea e i ai tagata ua mauaina lena Agaga, e mafai ona tatou maua a le sologa lelei. E tuu e le Agaga le molimau o le moni i o tatou loto lea e tuufaatasia ai i latou o e maua lena molimau. O le Agaga o le Atua e le mafai ona faatupuina se finauga (tagai 3 Nifae 11:29). E le mafai lava ona faatupuina ni lagona o le eseesega i le va ma tagata lea e taitaiina atu ai i le faatuiese (tagai Joseph F. Smith, Gospel Doctrine, 5th ed. [1939], 131). E taitai atu ai i le filemu patino ma se lagona o le tasi ma isi. O lea Agaga e faalotogatasia ai tagata. O se aiga lotogatasi ma se lalolagi filemu e faalagolago lena i tagata ua lotogatasi” (i le Conference Report, Ape. 1998, 86; po o le Liahona, Iul. 1998, 77).

Sa faamatala mai e Elder M. Russell Ballard o le Korama a Aposetolo e Toasefululua e faapea o le taufaamatau o pulega faalilolilo o loo i ai pea i o tatou aso:

“Ua aoao mai e le Tusi a Mamona o pulega faalilolilo o faiga faasolitulafono e tulai mai ai se luitau matautia, e le gata i tagata taitoatasi ma aiga ae faapea i le lalolagi atoa. O loo i ai i pulega faalilolilo o nei aso ni kegi, o faalapotopotoga ua gaosia fualaau faasaina, ma vaega toatele o tagata latou te faia faiga faasolitulafono. O pulega faalilolilo i o tatou vaitaimi, e faagaoioia e pei lava o le au faomea a Katianetona i le taimi o le Tusi a Mamona. E i ai a latou faailoga ma upu faalilolilo. Latou te auai i sauniga ma faiga faalilolilo. O o latou faamoemoega e aofia ai le ‘fasioti tagata, ma le vete, ma le gaoi, ma le faitaaga, ma fai amioleaga eseese uma ua le tusa ai ma tulafono a lo latou nuu, atoa ma tulafono a lo latou Atua’[Helamana 6:23].

“Afai tatou te le faaeteete, o pulega faalilolilo o ona po nei e mafai ona mauaina le mana e faaaafia ai e pei lava o le vave ma le mae’ae’a na faia i le taimi o le Tusi a Mamona. Tou te manatuaina le faatulagaga? O pulega faalilolilo e amata i ‘e aupito amioleaga’ o tagata, peitai e iu ina ‘faaseseina ai le toatele o e amiotonu’ seia oo lava ina faaleagaina uma le nuu [Helamana 6:38]. …

Ua aoao mai le Tusi a Mamona o le tiapolo o le ‘pogai o agasala uma’ ma le faavae o nei pulega faalilolilo[ Helamana 6:30; tagai2 Nifae 26:22]. Na te faaaogaina pulega faalilolilo, e aofia ai kegi, ‘mai lea tupulaga i lea tupulaga, e pei ona mafai ai o ia ona maua le pule i loto o le fanauga a tagata’[Helamana 6:30]. O lona faamoemoega o le faatamaiaina lea o tagata taitoatasi, o aiga, o nuu, ma atunuu [tagai 2 Nifae 9:9]. Sa i ai se taimi, sa faamanuiaina ana taumafaiga i le taimi o le Tusi a Mamona. Ma o loo tele foi ona manumalo i ona po nei. O le ala lea e matua taua ai lava mo i tatou o e umiaina le perisitua ona tutu ai ma le mausali mo le upumoni ma le amiotonu e ala i le faia o mea tatou te mafai e fesoasoani ai e tausia le saogalemu o o tatou nuu” (i le Conference Report, Oke. 1997, 51–52; po o le Liahona, Nov. 1997, 38).

I le taimi o le konafesi aoao ina ua maea ai le osofaiga a tagata faatupu faalavelave i le Nofoaga Autu o Fefaatauaiga a le Lalolagi ma le Penetakone sa ta’ua ai e Peresitene Gordon B. Hinckley (1910–2008) i faalapotopotoga o tagata faatupu faalavelave o loo naunau e faatupu le fasioti tagata, o pulega saua, taufaamatau, ma pulega amioleaga:

“O faalapotopotoga a tagata faatupu faalavelave … e tatau ona matuai sailia ma faaumatiaina.

“O i tatou o lenei Ekalesia ua iloa se mea i ia ituaiga vaega. O loo tautala le Tusi a Mamona i au faomea a Katianetona, o se faalapotopotoga faalilolilo ma le lotoleaga, e fusia i latou i ni feagaiga, ma e naunau i le amioleaga ma le faatafunaga. I o latou aso sa latou faia mea uma i lo latou malosi, po o a lava mea latou te maua, ina ia faaumatia ai le Ekalesia, ina ia taitaiese tagata i a latou upu pepelo, ma ia pule i le lalolagi. O le mea foi lena ua tatou vaai i ai i le taimi nei.

“O i tatou o tagata o le filemu. O i tatou o soo o Keriso o le sa avea ma o loo avea pea ma Alii o le Filemu. Ae e i ai taimi e tatau ai ona tatou tutu atu mo le mea tonu ma le migao, mo le saolotoga ma le tagata, e pei ona faapotopotoina e Moronae ona tagata i ona aso ina ia puipuia a latou ava, o a latou fanau ma le saolotoga (see Alma 48:10)” (i le Conference Report, Oke. 2001, 88; po o le Liahona, Ian. 2002, 84).

E ui lava sa faigata taimi ma taufaamatauina ia nuu e malosiaga o le amioleaga, o faataitaiga a Helamana o le tumau ma le le mafaagaeetia i le faia o le finagalo o le Alii o se faataitaiga lea mo i tatou e mulimuli ai i luitau o aso e gata ai. E pei lava o Helamana, e mafai ona tatou taumafai e le aunoa e “fai le mea tonu; ma ia le popole” (“Fai Mea Tonu,” Viiga, nu. 148). O le upu autu o le e le aunoa.

Sa faamamafa mai e Elder Spencer J. Condie o le Fitugafulu le taua o le tausia o a tatou feagaiga o se ala o le atiina ae o le tumau pea i le faia o le lelei:

“Atonu e ui lava i faamaoniga uma o le liua moni ma le faamagaloina o agasala, o le mea lenei ua aupito tulaga ese:o le manatu e le toe faia le amioleaga ae fai pea le amio lelei. …

“Tatou te faamalolosia o tatou manatu e faia mea lelei i taimi taitasi tatou te osia ai ma tausia feagaiga. O taimi taitasi tatou te faatinoina ai sauniga faaleperisitua, e oo mai ai mana mai luga ma tatou latalata atu ai i le lagi. O i latou e aai ma feinu i le faamanatuga ma maua sauniga o le malumalu ma loto mama, ma latou tausia ma le faamaoni a latou feagaiga, e le manaomia ni aoaoga tele e faatatau i laei e tatau ai, o le totogiina ma le limafoai o taulaga anapogi ma sefuluai, o le tausia o le Upu o le Poto, po o le tausia ma faapaia le Aso Sapati. Latou te le tau manaomia le saga faamanatu atu o le faasoa atu o le talalelei i isi, o le ulufale soo atu i le malumalu, o le sailia o gafa po o talafaasolopito o aiga, po o le faia o aoaoga po o asiasiga faaleaiga. Latou te le manaomia foi le tau fai atu e asiasi i e mamai ma fesoasoani i e o manaomia le fesoasoani.

“O i latou nei o Au Paia faamaoni a le Atua Silisili o e tausia feagaiga paia na latou osia i le maota o le Alii, ‘ua naunautai e auauna atu ia te ia e oo i le iuga, ma ua latou faaali mai ma le faamaoni i a latou galuega ua latou maua le Agaga o Keriso i le faamagaloina o a latou agasala”(MFF 20:37). O i latou e tausia feagaiga … ua latou ola i le tulafono o le faapaiaga. O o latou taimi, ma taleni, ma tupe e ā le Alii ia.

“O le tausia o a latou feagaiga ua mafua ai ona latou atiina ae se manatu e fai pea le lelei” (“O Se Manatu e Fai Pea Mea Lelei,”Liahona, Iuni 2001, 15, 21).

A o avea o se tasi o Fitugafulu, sa matauina ai e Elder Dean L. Larsen se sootaga i le va o le faamaoni i le Alii ma le manuia:

“Pe a ola tagata e tusa ai ma le finagalo o le Alii, o mea uma lava e aoga e maua ai faamanuiaga e finagalo le Atua e tuuina atu i lana fanau, e faigofie lava ona maua. Ona maua ai lea o le alofa ma le nofolelei. E oo lava i le tau, o le a tali mai le tau ma elemene mo le manuia o tagata. Ona faatumauina lea o le filemu ma le fealofani. O le a vaaia foi le toaaga ma le alualu i luma i olaga o tagata. …

“… Ua tatou maua le faamaoniga a le Alii o le a ia faamanuia ma faauluola lona nuu pe afai o le a latou tausia ana poloaiga ma manatua e taulai atu ia te ia o le pogai o o latou faamanuiaga” (i le Conference Report, Oke. 1992, 58–59; po o le Liahona, Ian. 1993, 52 – 53 ).

Sa aoao mai Peresitene Ezra Taft Benson (1899–1994) e faapea ua na o le pau le auala e oo mai ai faamanuiaga patino o le suesue ma le filiga i tusitusiga paia: “O le manuia i le amiotonu, o le mana e aloese ai mai le faaseseina ma teena ai faaosoosoga, o le taitaiga i o tatou olaga i aso uma, o le faamaloloina o le agaga—o nisi nei o folafolaga ua tuuina mai e le Alii ia i latou o e o atu i Lana afioga. Pe folafola mai ea e le Alii ae le faataunuuina? E moni lava afai e fetalai mai o Ia o le a tatou maua nei mea pe afai tatou te tago atu i Lana afioga, ona mafai lea ona tatou maua faamanuiaga. Ae afai tatou te le faia, ona tatou le maua ai lea o faamanuiaga. Ae ui i lea, pe o le a lava lo tatou filiga i nisi itu, e i ai faamanuiaga patino ua na o tusitusiga paia lava e maua ai, ua na o le o mai i le afioga a le Alii ma uumau i ai ao tatou savavali atu i le puao o le pogisa i le laau o le ola” (“O Le Mana o le Afioga,” Liahona, Iul. 1986, 71).

O le fuaitau “o le nonofo faatasi ma Aperaamo, ma Isaako, ma Iakopo” o lona uiga o ē faamaoni o le a faapaleina i sootaga o nei peteriaka maoae e toatolu ma le taliaina i taui faaselesitila. E tusa ai ma le Mataupu Faavae ma Feagaiga 132:37, “o Aperaamo … e pei o Isaako foi ma Iakopo … ua latou ulufale atu i lo latou faaeaga, e tusa ai ma folafolaga, ma nonofo ai i nofoalii, ma e le o ni agelu ae o atua.”

Sa faamalamalama mai e Elder Russell M. Nelson o le Korama a Aposetolo e Toasefululua o tagata o le Ekalesia e mafai ona avea ma suli o faamanuiaga o Aperaamo, Isaako, ma Iakopo:

“Ole feagaiga na muai osia e le Alii ma Aperaamo ma toe faamautuina ma Isaako ma Iakopo e faasilisilia le taua tele. …

“O i tatou foi o le fanau o le feagaiga. Ua tatou mauaina, e pei foi o i latou anamua, le perisitua ma le talalelei faavavau. O Aperaamo, Isaako, ma Iakopo o o tatou tupuaga. O i tatou o Isaraelu. E i ai la tatou aia tatau tatou te mauaina ai le talalelei, o faamanuiaga o le perisitua, ma le ola e faavavau. O le a faamanuiaina atunuu o le lalolagi ona o a tatou taumafaiga ma galuega a a tatou fanau. O le fanau a Aperaamo ma i latou ua faapotopotoina mai i lona aiga i le avea ma tama fai, latou te mauaina nei faamanuiaga ua folafolaina—e faalagolago i lo latou taliaina o le Alii ma usitai i ana poloaiga” (i le Conference Report, Ape. 1995, 42–43; po o leLiahona,Iul.1995, 39).

Sa faailoa mai ma le faaeteete e Mamona o le faamaualuga e le o se vaega o le Ekalesia a le Alii, ae ona o le tamaoaiga tele, na amata ai ona ulufale i loto o nisi o tagata o le Ekalesia (tagai Helamana 3:36), lea e i ai se aafiaga ta’uvalea i le Ekalesia aoao. Sa faailoa mai manatu o Peresitene Ezra Taft Benson i se autu tali tutusa:

Ata

Peresitene Ezra Taft Benson

© Busath.com

“Mafaufau i mea sa tutupu mai i o tatou olaga, ma o tatou aiga, ma le ekalesia, i taimi ua mavae ma le taimi nei, ona o le faamaualuga.

“Mafaufau i le salamo e mafai ona vaaia i olaga ua suia, faasaoina o faaipoipoga, ma aiga ua faamalolosia, pe ana le taofia i tatou e le faamaualuga mai le tautau atu o a tatou agasala ma lafoaiina (tagai MFF 58:43).

“Mafaufau i le toatele o tagata o le Ekalesia ua le toaaga mai ona ua faatausuaiina i latou ma ua le mafai ona tuua i latou e lo latou faamaualuluga ia latou faamagalo atu pe o mai e taumamafa atoatoa i le laoai a le Alii.

“Mafaufau i le fiasefulu afe o alii talavou ma ulugalii e mafai ona fai misiona nei pe ana leai lo latou faamaualuluga ua taofia ai i latou mai le tuuina atu o o latou loto i le Atua (tagai Alema 10:6; Helamana 3:34–35).

“Mafaufau foi i le faateleina o galuega faalemalumalu pe afai e sili atu le taua o le taimi e faaaoga mo lenei galuega sili ona taua nai lo le tele o mea faamaualuluga o loo faaaluina ai lo tatou taimi” (i le Conference Report, Ape. 1989, 6; po o leLiahona, Iul. 1989, 7).

Mo nisi faamatalaga ma se ata o loo faaalia ai le taamilosaga o le faamaualuga, tagai i le“O Le Taamilosaga o le Amiotonu ma le Amioleaga” i le faamatalaga faaopoopo (itulau 438).

Sa aoao mai Elder D. Todd Christofferson o le Korama a Aposetolo e Toasefululua o se laasaga silisili e oo ai ina faamaoni atoatoa i le talalelei o le aloese mai po o le aveesea o le faamaualuga:

“E mafai faapefea ona e avea le talalelei a Iesu Keriso ia le na o se faatosinaga i lou olaga ae ia avea ma faatosinaga e faafoe ai, ma mea e aupito sili ona taua o lou tagata? …

“Ia avea o se laasaga muamua, e tatau ona e faataatia ese soo se lagona o le faamaualuga lea ua matua taatele i le lalolagi i aso nei. O lona uiga o uiga ia e teena ai le pule a le Atua e pulea ai o tatou olaga. … ua outou faalogo i ai o faaleo i fasi fuaitau e pei o le, ‘Fai le mea e te loto oe i ai,’ po o le ‘O le sao po o le sese e faalagolago i le mea ou te manatu ua sao mo au, o le mea lava lena e sao.’ O lena uiga faaalia, o se fouvale lea i le Atua” (i le Conference Report, Ape. 2004, 9; po o le Liahona, Me 2004, 11).

O le faapaiaina ua faauigaina e faapea “o le faagasologa o le tuusaolotoina mai le agasala, faasinasinaina, mama, ma le paia e ala i le togiola a Iesu Keriso (Mose 6:59–60 )” (Guide to the Scriptures).

O tagata faamaoni o le Ekalesia i taimi o Helamana sa faaauau pea lo latou tuputupu ae faaleagaga, lea na oo atu ai “i le faapaiaina o o latou loto”(Helamana 3:35).

Sa aoao mai James E. Faust o ia ituaiga tuputupu ae e sau mai le fesoasoaniga a le Agaga Paia e faatupuina le manao mai totonu e faafoeina ai o tatou olaga e pei ona finagalo le Faaola tatou te ola ai. I le taimi o lenei faagasologa, e faapaiaina ai i tatou: “O uiga faaKeriso e tafe mai i vaipuna sili ona loloto o le loto ma le agaga o le tagata. E taitaia e le Agaga Paia o le Alii, lea e folafola mai i sauniga o le talalelei. O lo tatou faamoemoega sili lava e tatau ai, o le olioli i le faamalieina lena e sau mai lenei taitaiga paia; o lo tatou mata’u sili lava o le le maua o nei faamanuiaga” (i le Conference Report, Ape. 1998, 23; po o le Liahona, Iulai 1998, 23).

O le Au Paia i le taimi o Helamana sa faaauau pea i galuega lelei ma oo ai ina malolosi atili ai i uiga lelei faaleagaga, ia sa oo ai ina tauia i le faapaiaina. Sa faamalamalama mai e Elder D. Todd Christofferson o le faapaiaina o se laasaga i le ala o le taumafai e agai atu i le atoatoa: O le tumau ai o le tagata lava ia i le ala o le usiusitai o se mea e ese mai i le ausiaina o le tulaga atoatoa i le faaletino. O le atoatoa e le o se mea, e pei ona mafaufau i ai nisi, o se mea e muamua maua mo le faamaoniga ma le faapaiaina. O le faafeagai lava: o le faamaoniga (ua faatagaina) ma le faapaiaina (ua faamamaina) o mea ia e muamua maua mo le atoatoa. E faato’a faaatoatoaina lava tatou ‘ia Kersio’ (tagaiMoro. 10:32), e le tutoatasi mai ia te Ia. O lea la, o le mea e manaomia mai ia i tatou ina ia maua ai le alofa mutimutivale i le aso o le faamasinoga o le filiga lea”(“Justification and Sanctification,” Ensign, June 2001, 24–25).

O le atinaega o le lotomaualalo o se lagolago faamalosiau lea e taitai atu i le faatuatua ma le olioli sili atu i olaga o tagata faamaoni o le Ekalesia i taimi ua tea ma le taimi nei.

“O le lotomaualalo o le iloa lea ma le agaga faafetai o lou faalagolago i le Alii—o le malamalama lea o loo i ai ia te oe se tulaga manaomia faifai pea o Lana fesoasoani. O le lotomaualalo o le iloa lea o au taleni ma tomai o ni meaalofa mai le Atua. E le o se faailoga o le vaivai, palaai, po o le fefe; o se faailoga o lou iloa o le mea o loo i ai lou malosiaga moni. E mafai ona e lotomaualalo ma lē fefe. E mafai ona e lotomaualalo ma lototele. …

“O le a faamalosia oe e le Alii pe a e faamaualaloina oe lava i ona luma” (Faamaoni i le Faatuatua: O Se Tusitaiala o le Talalelei [2004], 100).

O le malosiaga o le Ekalesia o loo taoto i talitonuga mausali o tagata taitoatasi. O loo faamatala mai i le Helamana 3:35 ia olaga o tagata o le Ekalesia o e na mausali i lo latou faatuatua ma galuega.

Sa faailoa mai e Elder Russell M. Nelson o lena mausali i amioga ma uiga e maua e tagata taitoatasi lava ia: “E na o lou lava tagata patino e mafai ai ona e atiina ae se faatuatua mausali i le Atua. E na o lou lava tagata patino e mafai ai ona e salamo. E na o lou lava tagata patino e mafai ai ona e agavaa mo sauniga o le faaolataga ma le faaeaga” (i le Conference Report, Oke. 2003, 47; po o leLiahona,Nov. 2003, 44).

O le fuaitau “tuuina atu o tatou loto” o lona uiga o le lafoai po o le avatu o tatou loto i le Atua. Pe a tuuina e se tasi lona loto i le Atua, ua ia lafoaia ona manaoga patino e faafesuiai mo le finagalo o le Alii. Sa aoao mai e Elder Neal A. Maxwell (1926–2004) o le Korama a Aposetolo e Toasefululua o le tuuina atu o o tatou loto ma agaga i le Atua o le ituaiga o faapaiaga maualuga silisili lea i le Alii:

Ae o le faapaiaina moni lava ia, o le faamatuuina atu lea o oe lava i le Atua. O le loto, agaga, ma le mafaufau o upu autu ia a Keriso i le faamalamalamaina o le uluai poloaiga, lea tatou te taumafai e usitaia i taimi uma, ae le na o le aso ma i e lua (tagai Mataio 22:37). Afai tatou te tausia, ona faapaiaina ai lea atoatoa o a tatou galuega e faamanuiaina ai o tatou agaga (tagai 2 Nifae 32:9).

“O lea atoatoa e aofia ai le gauai atu faatasi o lagona, mafaufauga, o upu, ma amioga” (i le Conference Report, Ape. 2002, 41; po o leLiahona,Iul. 2002, 39).

Sa tuuina mai e Elder M. Russell Ballard le lapataiga lenei: “E ao ona e faamaoni ia te oe lava ma tumau i le faamaoni i feagaiga sa e osia faatasi ma le Atua. Aua e te pau atu i mailei o le mafaufau e mafai ona e agasala laitiiti ma faapea o le a le afaina. Ia manatua, ‘o le Alii e le mafai ona vaai atu i le agasala ma faatagaina ai sina mea itiiti lava’ (MFF 1:31). …O nisi talavou ua mafaufau faavalevalea e le o se ‘mea tele’ le agasala nei aua e mafai lava e i latou e le aunoa ona salamo mulimuli ane pe a mananao i latou e o i le malumalu po o se misiona. Soo se tasi na te faia lena mea o le solia lava lea o folafolaga sa ia faia i le Atua i le muai olaga faapea ma le vai o le papatisoga. O le manatu lea e na ona agasala laitiiti lava, o se tau faasese lena e se tasi o ia lava, o le agasala o se agasala! O le agasala e faavaivaia oe faaleagaga, ma tuu ai le tagata agasala i se tulaga matautia e faavavau. O le filifili e agasala, faatasi ma le faamoemoe e salamo, o le liliuese lava lena mai le Atua ma le solia o feagaiga” (i le Conference Report, Ape. 1993, 6; po o le Liahona, Iul. 1993, 7).