Helamana 13–16

O Samuelu, o le perofeta, na te lei filifili pe o le a le mea e talai atu i sa Nifae. Ua tatou faitau i leHelamana 13:3 sa ia aoao atu “mea uma na oo ane i lona loto.” E faatatau i lenei faagasologa faa-faaaliga, sa faamatalaina ai e Peresitene Boyd K. Packer, o le Peresitene o le Korama a Aposetolo e Toasefululua le auala e masani ona oo mai ai le siufofoga o le Alii:

“E oo mai faaaliga e pei o ni upu tatou te lagona e sili atu nai lo le faalogoina. Sa tau atu e Nifae i ona uso faalogogata, o e sa asiasi i ai se agelu, ‘A ua le toelagona, e outou, ua le mafafai outou ona lagona ana fetalaiga’[1 Nifae 17:45; faaopoopo le faatusilima].

“Ua tumu tusitusiga paia i faaupuga faapea e pei o le ‘Na aveeseina le ie puipui mai o maua mafaufau, ma vaaiga o o maua malamalama ua faaavanoaina’[MFF 110:1], po o le ‘o le a ou faaali atu ia te oe i lou mafaufau ma lou loto[MFF 8:2], po o le ‘Na ou faapupulaina lou loto’ [MFF 6:15], po o le Ia tautala atu i mafaufauga o le a ou tuu i totonu o o oulua loto’ [MFF 100:5]. E fiaselau fuaiupu o loo aoao mai e uiga i faaaliga” (i le Conference Report, Oke. 1994, 77; po o le Liahona, Ian. 1995, 72).

Sa i ai taimi na faasaoina ai e amioleaga mai faafanoga matautia ona sa i ai tagata amiotonu na nonofo ai. Sa i ai i tagata amioleaga o Saraemila ni tagata amiotonu e faafetai i ai mo lo latou laveaiina mai faafanoga, e ui, e moni, latou te lei iloaina lena mea. I nai tausaga sa le toe maua ai e Saraemila lenei puipuiga ua le talisapaiaina ma le le leoa, ma na faataunuuina lava upu a Samuelu (tagai 3 Nifae 9:3). E oo foi ia Sotoma ma Komoro semanu e faasaoina pe ana i ai lava ni tagata amiotonu se toasefulu na nonofo ai iina (tagai Kenese 18:23– 33).

O le auala o loo tatou ola ai e moni lava e faia ai se eseesega. O le amiotonu patino o ni nai tagata e mafai ona avea ma faamanuiaga tele i isi, aemaise ia i latou i o tatou lava aiga ma nuu i le lotoifale.

Sa faamatala e Elder Dallin H. Oaks o le Korama a Aposetolo e Toasefululua le sootaga i le va o mea faaletino ma mea faaleagaga:

“O le faaletino, lea na te tuuina atu le faamuamua i manaoga faaletino ma mea faitino, o le faafeagai tonu lena o le faaleagaga. Na aoao mai le Faaola ia aua tatou te tolo’a’i ‘oa i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai’(Mataio 6:19). E tatau ona tatou tolo’a’i oa i le lagi: ‘Aua o le mea ua i ai lo outou oa, e i ai atoa foi ma o outou loto’(Mataio 6:21). …

“E leai se mea e leaga ai tupe. Sa faaaogaina e le Samaria Agalelei le ituaiga tupe lava lea e tasi e tausi ai lona uso a tagata, lea sa faaaoga foi e Iuta e faalata ai le Matai. ‘O le manao i tupe o le pogai lea o mea leaga uma lava’(1 Timoteo 6:10; faaopoopo le faatusilima). O le eseesega matautia, o le vaega faaleagaga tatou te faaaogaina i le vaai, iloiloina, ma le pulea o mea o lenei lalolagi, ma mea tatou te oo i ai.

“Afai e tuuina atu e fai ma mea faitino e tapuai i ai pe faamuamua, e mafai e le tupe ona fai i tatou e avea ma tagata manatu faapito ma faamaualuga, ‘ua faafefeteina i mea le aoga o le lalolagi.’ (Alema 5:37). O le eseesega la, afai e faaaogaina e faataunuuina ai matafaioi faaletulafono, ma mo le totogiina o a tatou sefuluai ma taulaga, o le a mafai e tupe ona faailoa tino atu le faamaoni, ma faatupuina ai le le manatu faapito. O le faaaogaina malamalama faaleagaga o meatotino e mafai ona fesoasoani e saunia ai i tatou mo le tulafono maualuga atu o se mamalu selesitila” (i le Conference Report, Oke. 1985, 78; po o le Liahona, Ian. 1986, 48–49 ).

Sa aoao mai e Elder M. Russell Ballard o le Korama a Aposetolo e Toasefululua le taua o le mulimuli i perofeta ma aposetolo soifua: “O lenei ou uso e ma tuafafine, faamolemole, ia gauai atu i mea na sa aoao mai e taitai o le Ekalesia . … Ia faaaoga aoaoga na o le a fesoasoani ai ia te oe ma lou aiga. Ia aumaia e i tatou uma lava e tusa lava po o a tulaga o o tatou aiga, ia aoaoga a perofeta ma aposetolo ina ia faamalosia ai a tatou sootaga ma isi faapea ma lo tatou Tama oi le Lagi ma le Alii o Iesu Keriso. Ou te folafola atu ia te outou i le suafa o le Alii afai tou te faalogo e le gata i o outou taliga, ae ia faapea foi i o outou loto, o le a faailoa atu e le Agaga Paia ia te oe le moni o savali na fofogaina atu e [le Peresitene o le Ekalesia], o ona fesoasoani, o Aposetolo, ma isi taitai o le Ekalesia. O le a uunaia oe e le Agaga ina ia e iloa le mea e tatau ona e faia e le gata i tagata taitoatasi ae o aiga ina ia mulimuli ai i a matou fautuaga ina ia mafai ai ona faamalosia a outou molimau ma ia outou maua ai le filemu ma le olioli” (i le Conference Report, Ape. 2001, 86; po o leLiahona, Iul. 2001, 82).

Sa lapataiina e Samuelu ia sa Nifae ua latou sailia le fiafia i le faia o le amioletonu, lea e le tusa ai ma le njatura o le fiafia. A o saunoa ai e uiga i lenei faafitauli ma le auala e oo mai ai le fiafia moni, sa faailoa mai ai e Elder Richard G. Scott o le Korama a Aposetolo e Toasefululua e faapea o le fiafia e faato’a oo mai faatasi ma le amiotonu:

“Pe ua outou matauina le auala o loo galue ai Satani e tapu’e mafaufau ma lagona i ni ata faaemoemo, o musika leoleoā, ma soo se ituaiga o lagona malolosi faaosofia? Ua taumafai ma le filiga [Satani] e faatumulia le olaga i faatinoga, o faafiafiaga, ma lagona faaosofia, ina ia le mafai ai e se tagata ona mafaufau loloto i taunuuga o ana faatosinaga taufaaosooso. Mafaufau i ai. Ua faaosoosoina nisi e soli poloaiga ona o ala o faasalalauga, lea ua foliga mai e le afaina le solia o poloaiga aupito taua a le Atua. Ua faia nei mea ina ia foliga mananaia, ma manaomia. E foliga mai e leai se taunuuga matuia e i ai, a o se olioli ma le fiafia e tumau. Peitai, ia iloa, o na faatinoga e faafoe i upu tusitusia ma tagata e faatinoina. O le taunuuga o faaiuga e faia, e faapena foi ona faatino i soo se mea e manao i ai le e faafoeina.

“E le faapena le olaga. Ioe, o le saolotoga e filifili ai, e faataga ai lou filifilia pe o le a le ituaiga o tagata e avea ai oe, ae e le mafai ona e pulea le taunuuga o na filifiliga. E le tutusa ma foafoaga taufaasese a tagata, o lo tatou Tama Faalelagi na te fuafuaina taunuuga o au filifiliga. O le usiusitai e maua ai le fiafia, a o le solia o Ana poloaiga e le maua ai” (i le Conference Report, Ape. 2004, 105; po o le Liahona, Me 2004, 102).

O se tasi o valoaga e sili ona patino i tusitusiga paia o le valoaga a Samuelu i le soifua mai ma le maliu o Iesu Keriso. O le siata lea ua otooto atu ai aoaoga a Samuelu, e aofia ai le soifua mai ma le maliu o Keriso ma faataunuuga tusitusia ma aoaoga a Samuelu e taitai ai le nuu:

Sa aoao mai Elder Richard G. Scott e uiga i ala o le salamo:

“I le tusi O Le Vavega o le Faamagalo Atu, ua tuuina mai ai e Spencer W. Kimball se taiala lelei i le faamagaloina e ala i le salamo. Ua fesoasoani lenei taiala i le toatele i le sailia o le ala e toe foi mai ai. Ua ia tau mai ni vaega taua se lima o le salamo:

“Faanoanoa mo le agasala. Suesue ma manatunatu loloto ia e iloa le mamafa o lau solitulafono i le silafaga a le Alii. O lena mea o le a aumaia ai le faanoanoa ma le salamo. O le a aumai ai foi se naunau faamaoni mo se suiga ma se naunautaiga e usiusitai i taulaga manaomia uma mo le faamagaloina. …

Lafoaia o le agasala. O se tautinoga mausali lea ma tumau o le a le toe faia le solitulafono. O le tausia o lenei tautinoga, e le manaomia ai ona toe lagonaina le oona o le agasala. …

“O le ta’u atu o le agasala. Ua manaomia lava ona e tau atu o au agasala i le Alii. Afai o ni agasala mamafa, pei o le faitaaga, e tatau ona ta’u i le epikopo po o le peresitene o le siteki. Ae ia e malamalama o le ta’u atu o le agasala e le o le salamo lena. O se laasaga taua peitai ua le lava na o lena. O le ta’u atu na o se vaega [o le agasala] i lou faamatala atu lea o sese laiti, o le a le fesoasoani ai ia te oe e foia solitulafono mamafa tele atu ua e le ta’u atua. …

“Faaleleia mo le agasala. E tatau ona e toe faafoi atu e tusa ma le mea e mafai ona e faia, mea uma na e gaoia, na faaleagaina, pe na faaeleeleaina. O le naunau e toe faaleleia o se faamaoniga moni lea i le Alii, ua e tautino e faia mea uma e mafai ona e faia, e te salamo ai.

“Usiusitai i poloaiga uma. O le usiusitai atoatoa e te maua ai le mana atoa o le talalelei i lou olaga faatasi ma le malosi e taulai atu ai e lafoai agasala patino. E aofia ai mea atonu e te le i mafaufau ai muamua o se vaega o le salamo, pei o le auai i sauniga, totogi o le sefuluai, auauna atu ma le faamagalo atu i isi. …

Ata

Ua puipuia e Iesu Keriso le fafine talitane

Paul Gustave Dore

“Ou te faaopoopo atu le laasaga lona ono: Iloaina o le Faaola. I laasaga uma e manaomia i le salamo, ou te molimau atu o le laasaga silisili ona taua e mo oe ina ia i ai se tautinoga e oo mai le faamagaloga ona o le Togiola. E taua le iloa ua na o Ana tuutuuga lava e mafai ai ona faamagaloina oe” (i le Conference Report, Ape. 1995, 102; po o le Liahona, Iul. 1995, 85 86).

E le gata i mea taua o loo i luga sa aoaoina e Peresitene Kimball ma Elder Scott, o le salamo e tatau ona aofia ai le suia. Sa faamalamalama mai e Elder Jeffrey R. Holland o le Korama a Aposetolo e Toasefululua e faapea: “E tatau ona tatou suia soo se mea e mafai ona tatou suia lea e mafai ona avea ma se vaega o le faafitauli. Tatou te faafetai i lo tatou Tama oi le Lagi ona ua faatagaina i tatou ina ia suia. Tatou te faafetai ia Iesu ua mafai ona suia i tatou, ma e faatoa mafai lava ona tatou faia i le na o le La fesoasoani mai le lagi. E mautinoa lava ae e le o mea uma tatou te tauivi ai o se taunuuga lea o mea tatou te faia. E masani lava o le taunuuga o mea e faia e isi po o mea lava e tutupu i le olaga. Ae o soo se mea e mafai ona tatou suia e tatau ona tatou suia, ma e tatau ona tatou faamagaloina le isi toatele. O le auala lenei o le a le mataofia ai lo tatou sao atu i le Togiola a le Faaola, a o faapea ona mafai ona tatou faia faatasi ai ma o tatou le atoatoa. O le a Ia faaauau atu mai iina” (i le Conference Report, Ape. 2006, 70–71; po o le Liahona, Me 2006, 70).

I le Helamana 14:11–12 sa lisi ai e le perofeta o Samuelu ni upumoni se fa sa ia manao ina ia iloa e le nuu mai ana aoaoga:

Ia iloa faamasinoga a le Atua

Ia iloa tulaga o le salamo

Ia iloa le afio mai o Iesu Keriso

Ia iloa faailoga o Lona afio mai

Sa faamatalaina e Samuelu le sa Lamana le eseesega i le va o le oti faaletino, o le oti muamua faaleagaga, ma le oti lona lua faaleagaga— ma le auala na fesoasoani mai ai ia i tatou le Togiola a le Faaola e faatoilaloina nei oti.

O le oti faaletino.Sa faauigaina e Elder Earl C. Tingey o le Au Peresitene o Fitugafulu le oti faaletino ma po o ai foi o le a oo i ai: “O le oti faaletino o le tuueseeseina lea o le agaga mai le tino faaletino. Ona o le Pau o Atamu, o le a mafatia ai tagata uma i le oti faaletino” (i le Conference Report, Ape. 2006, 74; po o leLiahona,Me 2006, 73).

O le oti muamua faaleagaga. E oti faaleagaga se tasi pe a “vavaeeseina mai luma o le Atua” (Alema 42:9).

Sa faamalamalama mai e Peresitene Spencer W. Kimball (1895–1985) ia oti uma nei e lua o le taunuuga o le Pau o Atamu ma Eva: “O o tatou uluai matua, o Atamu ma Eva, sa le usiusitai i le Atua. E ala i le ‘aia o le fua faasaina, sa avea ai i laua ma tagata faaletino. E tusa ai ma lea mea, o i laua ma i latou uma o e tupuga mai ia i laua ua noatia i oti uma e lua o le faaletino ma le faaleagaga (o le oti faaletino, o le tuueseeseina o le tino ma le agaga; ma le oti faaleagaga, o le vavaeeseina o le agaga mai le afioaga o le Atua ma o le oti e faatatau i mea a le agaga)” (i le Conference Report, Ape. 1978, 7; po o le Liahona, Me 1978, 6).

Mo tatou, o lenei oti faaleagaga sa tupu ina ua tatou tuua le afioaga o le Atua ma fananau mai i le olaga faaletino. Sa ta’ua e Samuelu le sa Lamana le vavaeeseina mai i Ona luma “o le oti muamua lea” (Helamana 14:16).

Sa aoao mai Samuelu le sa Lamana o fanau uma a le Tama Faalelagi o e na ola i le olaga faaletino o le a faataoilaloina le oti faaletino ma le oti faaleagaga e ala i mana o le Togiola a Iesu Keriso (tagai Helamana 14:17). O le tele o isi tusitusiga paia o loo molimau mai foi i lenei mea moni (tagai 2 Nifae 2:9–10; 9:15, 22, 38; Alema 11:43–44; 12:12–15, 24; 42:23; 3 Nifae 26:4).

O le oti lona lua faaleagaga. O le oti lona lua o se oti faaleagaga sili mulimuli lea e le oo mai ona o le tuua o le afioaga o le Atua ina ia fanau mai i le olaga faaletino, ae e oo mai ona o le le salamo i agasala patino.

Ua tuuina mai foi e le Faaola le fesoasoani e faatoilalo ai lenei oti faaleagaga lona lua. E ala i le puapuagatia ai mo a tatou agasala, sa ia ofoina mai ia i tatou le avanoa e salamo ai. A e o i latou e le salamo, e “toe oo foi ia te i latou le oti faaleagaga, ioe, o le oti faalua, aua e toe vavaeeseina i latou ai mea uma tau le amiotonu” (Helamana 14:18). O lona uiga o se tagata e i ai agasala e le i faaleleia e le mafai ona tumau i luma o le Atua pe a uma ona aumai o ia ia te Ia mo le faamasinoina.

Sa faamatalaina e Elder Russell M. Nelson o le Korama a Aposetolo e Toasefululua lenei tulaga:

Afai e tatau ona oo mai le oti faaletino a o lei faasa’oina amioga sese, o le a le maua le avanoa e salamo ai. O le mea lea, ‘o le tui [moni] o le oti o le agasala lea’(1 Korinito 15:56).

“E oo lava i le Faaola e le mafai ona Ia laveaiina i tatou mai a tatou agasala. O le a Ia togiolaina i tatou mai a tatou agasala, ae faalagolago i le ala o lo tatou salamo. O lo tatou ola po o le oti faaleagaga e faalagolago lea ia i tatou lava (tagai Roma 8:13–14; Helamana 14:18; MFF 29:41–45)” (i le Conference Report, Ape. 1992, 102; po o le Liahona, Iul. 1992, 91).

E alofa le Alii i tagata uma ae le mafai ona faatagaina le agasala. E ui sa ta’u mai i le Helamana 15:4 sa toasa le Alii ia sa Lamana “aua sa leaga pea a latou amio,” a o Samuelu o se faataitaiga o le tele o sa Lamana o e na aoaoina i le savali o le talalelei ma fiafia i ai le Atua i le taimi lava na liua ai i latou.

Sa talanoaina e Elder Russell M. Nelson le mataupu o le alofa o le Atua mo i latou o e agasala: “Pe o le uiga ea la o lenei mea e le alofa le Alii i le tagata agasala? E leai. O le alofa faalelagi e le iu ma e laugatasia ai tagata uma. E alofa le Faaola i le au paia ma tagata agasala. Na faamautinoa mai e le Aposetolo o Ioane, ‘O i tatou ua tatou alolofa ia te ia, aua na ia muai alofa mai ia te i tatou’ [1 Ioane 4:19]. Na tautino mai foi e Nifae, ina ua ia vaaia i se faaaliga le misiona a le Alii i la le tino: ‘… Ioe, latou te feanu ia te ia, e onosai ai foi o ia ona o lona alofa mutimutivale tele ma lona onosai i le fanauga a tagata’[1 Nifae 19:9; faaopoopo le faatusilima]. Ua tatou iloaina le tele o le alofa o le Togiola aua sa maliu o Ia ina ia mafai ai e tagata uma e oti ona toe ola mai” (“Alofa Faalelagi,” Liahona, Fep. 2003, 16).

Sa malamalama Peresitene Ezra Taft Benson (1899–1994) i le mana o tusitusiga paia, aemaise lava le Tusi a Mamona, e suia ai o tatou olaga. Sa ia faamamafa mai le taua o le i ai o aoaoga faavae o loo aoao mai i a tatou tusitusiga paia o aso e gata ai ia loloto i o tatou loto pe afai e tatau ona tatou tumau “ma le mausali ma le le mafaagaeetia i le faatuatua” (Helamana 15:8 ). Sa aoao mai Peresitene Benson, “E le mafai ona tumau tagata e liliu mai i le Ekalesia e ala mai i agafesootai, onomea, tu ma aganuu, po o aoaoga, i tosinaga o lenei vaitau, sei vagana ua maua’a i latou i le atoaga o le talalelei o loo i le Tusi a Mamona” (i le Conference Report, Ape. 1975, 96; po o le Liahona, Me 1988, 6).

O le puipuiga na maua e Samuelu a o ia folafolaina atu lana savali o le salamo e le o se mea e e le tupu soo. O loo aofia ai i tusitusiga paia le tele o faataitaiga o perofeta sa faamata’uina ae sa puipuia i vavega o latou ola ina ia mafai ai ona faamaeaina a latou misiona. Ia mafaufau i faataitaiga nei ma manatua le auala na latou mafai ai ona tuuina atu afioga a le Alii a o faamata’uina i manuaga po o le oti: Noa (tagai Mose 8:18), Aperaamo (tagai Aperaamo1:5, 12, 15–19), Liae (tagai 1 Nifae 1:19–20; 2:1–4), Nifae (tagai 1 Nifae 17:48–55), ma Apinati (tagai Mosaea 13:1–5). O nisi taimi e mulimuli ane lava maimau ola o auauna a le Alii, ae e le mafai sei iloga lava, e pei ona folafola atu e Apinati, latou te “fai atu le feau na auina mai ai i [latou] e le Atua” (Mosaea 13:3).

Sa faamanatu mai e Elder Robert D. Hales o le Korama a Aposetolo e Toasefululua:

“O perofeta o tisipenisione uma ua tuuina atu ma le naunautai o latou soifua e lutia i puava ma le lototele, ua latou faia le finagalo ma folafola atu le afioga a le Atua. …

“… Ia tatou mulimuli i faataitaiga a lo tatou Alii o Iesu Keriso ma perofeta o aso ua mavae ma aso nei. Atonu e le o manaomia lo tatou tuuina atu o o tatou ola e faamaturo e pei o le tele o perofeta. O le mea o loo manaomia o lo tatou usiusitai lea i poloaiga a le Atua ma lo tatou faatuatua i feagaiga ua tatou osia ma Ia” (i le Conference Report, Ape. 1996, 49; po o le Liahona, Iul. 1996, 42).

O loo faamaumauina i le Helamana 16 ia auala na tali atu ai e amioleaga i le perofeta o Samuelu ma ana savali. Sa saunoa mai Peresitene Ezra Taft Benson i le auala o loo tali atu ai e amioleaga i perofeta i o tatou aso:

“E le tau manaomia ia lauiloa le perofeta i le lalolagi po o mea faalelalolagi.

“E vaeluaina tagata a o faailoa mai e se perofeta le upumoni. O e faamaoni i le loto e faalogo atu i ana upu, ae o e amioletonu, a lē amanaiaina le perofeta o le finau ma ia. Pe a faailoa mai e le perofeta agasala a le lalolagi, e mananao tagata o le lalolagi a le o le tapuni o le fofoga o le perofeta po o le fai lava o latou e pei e le o i ai se perofeta, nai lo le salamo i a latou agasala. O le lauiloa e le o se tofotofoga o le upumoni. E toatele lava perofeta na fasiotia pe tuliesea. A o tatou latalata atu i le afio mai faalua o le Alii, e mafai ona e faamoemoeina lena mea a o faasolo lava ina amioleaga tagata o le lalolagi, o le a tuuitiitia le lauiloa o le perofeta ia i latou” (“Fourteen Fundamentals in Following the Prophet,” in 1980 Devotional Speeches of the Year [1981], 29; tagai foi The Teachings of Ezra Taft Benson [1988], 133).

Ata

O Peresitene ma Tuafafine Ezra Taft Benson i le motu o tamaiti

O le lisi lenei o loo aofia ai nisi o mafuaaga i le pogai na ala ai ona teenaina e tagata i le Helamana 16:2–21 e faalogo i upu a le perofeta:

1. Ita faaletagata (tagai fuaiupu 2)

2. E faalagolago tele atu tagata i o latou lava malosi ma tomai (tagai fuaiupu 15)

3. E taumate lava ma le sao mai lea taimi i lea taimi ia perofeta i a latou valoaga (tagai fuaiupu 16)

4. O aoaoga e tele ina le tusa ai (tagai fuaiupu 18)

5. O aoaoga a perofeta o uputuu fenumiai ma e le mafai ona faamaoniaina (tagai fuaiupu 20)

6. O perofeta e faatogafiti ma faaseseina i tatou nai lo le faia o vavega moni (tagai fuaiupu 21)

Sa lapataiina i tatou e Elder Dallin H. Oaks ia aua le faalagolago atoa i suesuega faaletagata lava ia ma mafuaaga e iloa ai upumoni faaleagaga:

“O loo faamatala mai i le Tusi a Mamona [se] amioga i tagata e faalagolago atoa ai i ‘lo latou lava malosi ma lo latou lava poto’ ma mea e mafai ona latou ‘vaai i ai o [latou] mata.’ (Hel. 16:15, 20.) I le autu o mafuaaga, ua teena ai e nei tagata ia valoaga, ua faapea mai, ‘E le tusa lenei mea ma le mafaufau lelei, ia afio mai se tasi e pei o le Keriso.’ (F. 18.) I le faaaogaina o lena lava uiga e tasi, sa faaleaogaina ai e se polofesa lauiloa le Tusi a Mamona ma lana lava tautinoga malosi, ‘Tou te le maua ni tusi mai agelu. E faigofie lava faapena.’

“O i latou e saili le malamalama o le talalelei i le na o le suesue ma mafaufau ua faamatuu gofie i le manatu ua lava mea ua ia iloa ma lona taua faaletagata lava ia lea e faauigaina ai taumafaiga faaakatemia i nisi taimi. E pei ona matauina e le aposetolo o Paulo i ona aso, ‘E faafefete le poto.’ Na ia lapataia le au atamamai: ‘A ia outou faaeteete, ne’i avea la outou nei faitalia ma mea e tausuai ai e ua vaivai. … O lou poto foi e fano ai le uso vaivai, o le na maliu ai Keriso mo ia?’ (1 Kor. 8:1, 9, 11.)” ( The Lord’s Way [1991], 46–47).

Aisea e taua ai le aloese mai finauga ma isi? Sa faamalamalama mai e Elder Russell M. Nelson e faapea, o le tali e oo atu i tua i le muai olaga:

“Ina ia tatou malamalama i le pogai ua poloaiina ai i tatou e le Alii ia aua ne’i ‘finau le tasi ma le isi,’ e ao ona tatou iloa le puna moni o le finau. Sa faaali mai e se perofeta o le Tusi a Mamona lenei malamalama taua a o lei fanau mai Keriso. …[Tagai Helamana 16:22.] …

“Sa i ai le finau a o le i faia le lalolagi. Ina ua folafola mai le fuafuaga a le Atua mo le foafoaga o le lalolagi ma le soifuaga faaletino, sa alalaga i le fiafia atalii ma afafine o le Atua. Sa faavae le fuafuaga i le faitalia o le tagata, ma lona pau mai luma o le Atua, ma le fuafuaga alofa a le Faaola e togiola tagata. Ua ta’u mai e tusitusiga paia sa taumafai malosi Lusifelo e sui le fuafuaga i le aveesea o le faitalia mai le tagata. …

“O taumafaiga manatu faapito a Satani e sui le fuafuaga a le Atua na tupu ai se finauga tele i le lagi. …

“O lenei taua i le lagi e le o se taua faamaligi toto. O se taua o manatu feteenai—o le amataga o finauga.

“O loo lapatai soo mai pea tusitusiga paia o le tama o finauga sa tetee i le fuafuaga a lo tatou Tama Faalelagi. O metotia a Satani e faalagolago i le pipisi o papala o finauga. O le faamoemoega o Satani: ina ia maua le mamalu patino i luga atu o le Atua” (i le Conference Report, Ape. 1989, 85–86; po o le Liahona, Iul. 1989, 85–86).