Eteru 6–10

O le Alii o Iesu Keriso o le puna o le malamalama mo lo tatou lalolagi ma o tatou olaga (tagai MFF 88:5–13). Na pa’i atu le Alii i maa na tuuina atu e le uso o Iareto ia te Ia “ina ia pupula atu ai i tane, ma fafine, ma tamaiti” (Eteru 6:3) ao latou o atu i lena itu o le moana. E tuuina mai foi e le Alii le malamalama e taitaia i tatou i le pogisa o le lalolagi ma agai atu ai i le malamalama o le malo selesitila—lo tatou nuu folafolaina. Ua faapupulaina lo tatou ala e le malamalama o aposetolo ma perofeta, tusitusiga faavae, ma taitai ma faiaoga musuia. E mafai foi ona avea i tatou ma se malamalama—e mafai ona tatou faapupulaina le ala mo isi pe afai tatou te faalogo i fautuaga a le Alii ma tausia i tatou lava ia agavaa mo Lona Agaga.

Na fautua mai Sister Ardeth G. Kapp, le peresitene aoao ua mavae atu o Tamaitai Talavou: “O loo i totonu ia te outou le malamalama. E mafai ona outou pupula atu i le pogisa. E mafai ona outou faapupulaina le lalolagi. E mafai ona outou tafiesea le pogisa. E mafai ona outou faia se eseesega” (The Joy of the Journey [1992], 69).

Ata

Vaa o Sa Iareto

Robert Barrett, © 1986 IRI

I le mataupu o le Eteru 6:4–9 o le upu tuuina atu o lona uiga o le tuuina atu o lo latou saogalemu. I se isi faaupuga, na tuuina atu e sa Iareto lo latou saogalemu i le Atua. I le tuuina atu o i latou lava i le Alii, na latou faaalia lo latou faatuatua e mafai e Ia ma o le a Ia laveaiina i latou. “Ma ua oo ina agi e le aunoa le matagi e agai atu i le nuu ua folafolaina a o i le vasa i latou” (Eteru 6:8). Faatusatusa lenei uiga i uiga o uso o Nifae a o latou malaga atu i luga o le fogatai ma lo latou aiga. Ina ua saisai Nifae e Lamana ma Lemuelu, na le mafai ona toe galue le tapasa a le aiga, le Liahona, ma na “lelea i tua [lo latou vaa] i luga o le vasa mo aso e fa” (1 Nifae 18:15). Na taufai saili atu sa Iareto ma le aiga o Liae ina ia tuuina atu i latou lava i le puipuiga a le Alii; ae ui i lea, na le usitai nisi o le aiga o Liae. O le eseesega i le va o nei tala e lua e faaalia ai e tatau ona tatou faaaoga le faatuatua ma tausi poloaiga ina ia maua uma faamanuiaga o le a tuuina mai e le Alii ia i tatou e ala mai Lana puipuiga.

O a faamanuiaga o le faalogo ma usuina pese o viiga? I faaaliga o ona po nei na fetalai ai le Alii o le a Ia faamanuia i latou e olioli i pese a le amiotonu (tagai MFF 25:12). Na faamatalaina e le Au Peresitene Sili le mana o musika musuia:

“E aumai e viiga le Agaga o le Alii, faatupuina se lagona o le migao, faalotogatasi i tatou o ni tagata o le Ekalesia, ma tuuina mai ai se ala tatou te vivii atu ai i le Alii.

“… E uunaia i tatou e viiga ia tatou salamo ma faia galuega lelei, atiina ae le molimau ma le faatuatua, faamafanafana i e vaivai, faamafanafana i e faanoanoa, ma uunaia i tatou e tumau seia oo i le iuga. …

“… E mafai e viiga ona sii ae o tatou agaga, tuuina mai ia i tatou le lototele, ma uunaia i tatou e fai mea tonu. E mafai ona latou faatumuina o tatou agaga i mafaufauga faalelagi ma aumaia ia i tatou se agaga o le filemu” (Viiga, vii–viii).

Mo faamatalaga faaopoopo i le finagalo alofa o le Atua, tagai faamatalaga mo le 1 Nifae 1:20 (itulau 13) ma le Moronae 10:3 (itulau 401).

Ua tatou iloa na aoaoina sa Iareto i le taua o le lotomaualalo. Ua aoaoina foi i tatou e faaaliga o aso nei i le taua o le lotomaualalo: “Ia e loto maualalo; ona taitaiina lea o oe e le Alii lou Atua, ma tali atu i au talosaga” (MFF 112:10).

Na faamalamalama mai e Elder Joseph B. Wirthlin (1917–2008) o le Korama a Aposetolo e Toasefululua o le “lotomaualalo o le iloa lea ma uiga faaalia o se tasi e tatau ai ona faalagolago atu i le fesoasoani a le Alii, ina ia faamanuia ai i lenei olaga (i le Conference Report, Oke. 2004, 110; po o le Liahona, Nov. 2004, 103).

Na taua e Epikopo Richard C. Edgley o le Au Epikopo Pulefaamalumalu le lotomaualalo o se tasi o uiga autu o se tagata faatuatua o le Ekalesia:

“A o ou mafaufau loloto i nei tagata faamaoni, e taia lava au i ni uiga se lua e foliga mai e maua uma lava e i latou. Muamua, e tusa lava po o le a lo latou tulaga i le nuu po o le tamaoaiga, o lo latou lotomaualalo e taitaiina atu ai i le usiusitai i le finagalo o le Alii. Ma lona lua, e ui i fita ma faigata o le olaga, e mafai lava ona latou faatumauina se lagona o le faafetai mo faamanuiaga a le Atua ma le lelei o le olaga. O le lotomaualalo ma le lotofaafetai e moni lava o uiga masaga ia o le fiafia. …

“… I le malo o le Atua, o le lauiloa e amata i le lotomaualalo ma le usiusitai. O lenei soa o uiga o uluai laasaga taua ia e tatalaina ai le faitotoa i faamanuiaga a le Atua ma le mana o le perisitua. E le afaina po o ai i tatou ae po o le a foi le maualuluga o o tatou faailoga e i ai. O le lotomaualalo ma le usiusitai i le Alii, e o faatasi ma se lotofaafetai, o lo tatou malosi ma lo tatou faamoemoega lea” (i le Conference Report, Oke. 2003, 103–4; po o le Liahona, Nov. 2003, 98).

Ina ia “aoaoina mai luga” e tatau i le tagata ona tausia poloaiga ma ia agavaa mo le faaaumea ma musumusuga a le Agaga Paia. Na faamalamalama mai e Elder Richard G. Scott o le Korama a Aposetolo e Toasefululua faamanuiaga o le aoaoina e le Agaga: “Pe a liligi mai uma lui ia te oe, o le a e maua se lagona filemu e lagolagoina oe. O le a musuia oe ia e iloa le mea e ao ona fai. E mafai ona e ola i se lalolagi o le faanunununu ma lui maoae, ma e maua le filemu. O le a musuia oe ia iloa le mea e ao ona fai, ma e maua le mana po o le malosi e te faia ai. Ia manatua le folafolaga lenei a le Alii … : ‘E ao ona aoaoina outou mai luga. Ia faapaiaina outou lava [o lona uiga, ia tausia au poloaiga] ma o le a tuuina atu ia te outou le mana’ (MFF 43:16)” (i le Conference Report, Ape. 1991, 44; po o le Liahona, Iulai 1991, 38).

Na lapataia e le uso o Iareto lona nuu o le faia o se tupu o le a taitaia ai i latou i le nofopologa (tagai Eteru 6:22–23), ma na tupu lava. Na avea faatagataotaua e o latou fili le tupu o sa Iareto o Kipi ma lona atalii o Sule mulimuli ane. Matau le vave ona faataunuu valoaga a le uso o Iareto.

O le tele lava o le talafaasolopito o sa Iareto o loo maua i le mataupu e 7 o le tusi a Eteru. Na faamaumauina e Moronae na o mea taua lava o lenei talafaasolopito i lana otootoga. Na ia faamamafaina mea e tutusa ai ma lona nuu ma lesona o le a sili atu le aoga mo tatou aso.

E itiiti lava faamatalaga na tuuina mai e Moronae e uiga i vaega o le nuu i le va o sa Iareto ma nuu o sa Nifae. Ae ui i lea, o loo ia faasinoina mai o le ‘nuu o Morona’ a sa Iareto ‘sa lata ane i le nuu ua taua o Nuunaumati e sa Nifae.’(Eteru 7:6.) O le tele lava o le nuu o Morona sa avea ma laumua o sa Iareto ma nuu o sa Nifae o Nuunaumati sa i matu o le laueleele vaapiapi o le nuu, o loo faapea o le vaega autu o tagata sa Iareto na nonofo i matu o le laueleele lauitiiti o le nuu” (Daniel H. Ludlow, A Companion to Your Study of the Book of Mormon [1976], 321–22).

I Lona agalelei ma le alofa mutimutivale, na auina atu ai e le Alii perofeta e lapatai tagata o le malo o Sule. O le taimi muamua na latou upuleaga ma tauemu i perofeta; ae ui i lea, na puipuia perofeta e le folafolaga a le tupu amiotonu. Ona usitai loa lea o le nuu o Sule i lapataiga a perofeta ma salamo, ona faasaoina lea o i latou mai le mala semanu e oo mai ona o se taunuuga o lo latou teena o le savali a perofeta.

Na faamalamalama mai e Peresitene Henry B. Eyring o le Au Peresitene Sili le mafuaaga na lapatai ai e le Alii Ana fanau ia latou amioletonu: “Talu ai ona e agalelei le Alii, o lea Na te valaau atu ai i Ana auauna ina ia lapataia tagata e uiga i mea matautia. O lena valaau ina ia lapataiina ua faigata ma sili atu ona taua i le manatu faapea, o lapataiga o mea sili ona aoga e uiga i mea matautia, ae ua manatu tagata e le moni” (i le Conference Report, Oke. 1998, 40; po o le Liahona, Ian. 1999, 37).

Aisea e masani ai ona tauemuina ma upuleagaina perofeta? Na faamalamalama mai e Elder Robert D. Hales o le Korama a Aposetolo e Toasefululua:

“E ao i perofeta ona lapatai mea o le a oo mai pe a solia poloaiga a le Atua. Latou te le talaiina atu mea e fiafia i ai le lalolagi. …

“Aisea e folafola mai ai e perofeta poloaiga e le fiafia i ai tagata ma valaau atu i nuu e salamo i lo latou teena, fesuiaia, e oo lava i le faagalogalo o poloaiga? E faigofie lava le mafuaaga. E ala i le mauaina o faaaliga, e leai se filifiliga a perofeta ae ao ina folafola atu ma faamautu mea ua tuuina atu e le Atua ia i latou e ta’u atu i le lalolagi” (i le Conference Report, Ape. 1996, 52; po o le Liahona, Iulai 1996, 44).

Na faamalamalama mai e Elder L. Aldin Porter o le Au Peresitene o Fitugafulu se isi mafuaga e masani ai ona teena e tagata fautuaga a perofeta. Na ia faamalamalama mai o tagata e talitonu sese faapea o lapataiga faaperofeta e faalavelave i lo latou faitalia: “E faitio nisi ma faapea a saunoa mai perofeta ma le manino ma le mautinoa, ua latou aveeseina lo tatou salotoga. O loo tatou saoloto lava e filifili. Peitai, e tatau ona tatou taliaina taunuuga o na faaiuga. E maeu le faavalevalea o le tauseseina o perofeta ia latou fautuaga” (i le Conference Report, Oke. 1999, 82; po o le Liahona, Ian. 2000, 79).

Na malolo Moronae mai lana otootoga faavavevave o le talafaasolopito o sa Iareto ina ia tusia i se auiliiliga tele le faatuina o pulega faalilolilo i lona nuu. Na faia lenei mea e Moronae ona o nei faalapotopotoga na mafua ai le faafanoga o nuu uma lava o sa Iareto ma sa Nifae (tagai Eteru 8:21); vagana lava ua tatou salamo, o pulega faalilolilo o le a mafua ai le faafanoga o nuu i o tatou lava taimi (tagai fuaiupu 23–25).

Eteru 8:9 o loo faaalia mai ai o sa Iareto na aoao e uiga i nei pulega faalilolilo mai tusi na aumaia e o latou tama ma i latou mai le lalolagi tuai. Atonu na i ai i na tusi se faamatalaga o pulega faalilolilo muamua lava (tagai Mose 5:29–33, 47–55). Ua tatou iloa na i ai i sa Iareto tusi o le “foafoaga o le lalolagi, ma le faiga o Atamu, ma le tala e afua ina ona aso, seia oo i le olo tele” (Eteru 1:3).

O le fuafuaga na tuuina atu e le afafine o Iareto e fesoasoani ina ia faatumauina le malo mo lona tama ua faaalia ai le ala e faaaoga ai e tagata leaga vaivaiga faaletagata. Na iloa lelei lava e le afafine o Iareto lona lalelei tele, e faapena foi le manao o Akiso ia te ia. I lona manao tele e fesoasoani i lona tama ia maua le malo ma le tamaoaiga, sa naunau ai o ia e faatino se fuafuaga faatiapolo.

Tagai faamatalaga mo le Helamana 6:18–40 (itulau 271).

Ona o le Alii “o le Atua o le faamaoni, ma ua le mafai ona pepelo” (Eteru 3:12), o Satani “o le sa pepelo mai le amataga” (MFF 93:25). Na faaali atu e le Alii ia Mose “Ona avea ai lea o ia ma Satani, ioe, o le tiapolo lava lea, o le tamā o pepelo uma lava, e faasese ma faatauaso mafaufau o tagata, ma ta’ita’i faatagataotaua i latou i le mea na te loto i ai, i latou uma ia o e e le faalogo i lo’u leo” (Mose 4:4).

Na faamalamalama mai e Elder Dallin H. Oaks o le Korama a Aposetolo e Toasefululua o Satani “ma agaga o e na mulimuli atu ia te ia ma taufaasese i le lalolagi. Ua faailoa mai e faaaliga o ona po nei e faapea. … O auala taufaasese a Satani e faatosina tele: o musika, tifaga ma isi ala o faasalalauga, ma le faatosina o se taimi manaia. Afai e manuia pepelo a Satani i le faaseseina o i tatou, ua tatou tosina atu i lona mana” (i le Conference Report, Oke. 2004, 46; po o le Liahona, Nov. 2004, 43).

I lana lauga i le Meleniuma, na faamalamalama atu ai e Nifae “ona o le amiotonu foi o le nuu [o le Atua] e le pule ai Satani; … aua ua latou nonofo i le amiotonu, e pule aoao foi Le Paia o Isaraelu” (1 Nifae 22:26). Na taua e Moronae o le tasi faamoemoega o le faaalia o togafiti a Satani ina ia mavae atu le agasala ao taulai atu tagata i le aso “e le toe i ai ia Satani le pule i loto o le fanauga a tagata, ae peitai, ina ia faaoleole ai ia te i latou e fai pea le amiolelei” (Eteru 8:26).

Na folafola mai e le Perofeta o Iosefa Samita (1805–44): “O le tiapolo e leai sona mana ia i tatou sei vagana ua tatou faatagaina ai o ia; o le taimi lava tatou te tetee ai i soo se mea e mai le Atua, ua pule le tiapolo” (Aoaoga a Peresitene o le Ekalesia: Iosefa Samita [2007], 227).

Vaai i le Eteru 9:5–12 o le faateleina o pulega faalilolilo ua toe taitaia ai le tele o tagata i le faafanoga. Fuaiupu 15–35 ua faaalia ai se mamanu ua tupu i le tele o taimi i le Tusi a Mamona atoa lava:

1. Na matua faamanuiaina le nuu i le taimi o nofoaiga amiotonu a Emera ma Korianetumu (tagai fuaiupu 15–25).

2. Na toe amata ona potopoto faatasi le nuu i pulega faalilolilo ma liliu atu i le amioletonu i lalo o le nofoaiga a Hetu (tagai fuaiupu 26–27).

3. Ua auina atu e le Alii perofeta e lapatai le nuu ia latou amioleaga (tagai fuaiupu 28).

4. Ua teena e le nuu o Hetu perofeta (tagai fuaiupu 29).

5. Ua pau faamasinoga a le Atua i luga o le nuu (tagai fuaiupu 30–33).

6. Ua faamaualaloina e le nuu i latou lava ma ua salamo, ma ua toe faamanuiaina i latou (tagai fuaiupu 34–35).

I le totonugalemu o nei taamilosaga o le faamanuiaina ma le amioleaga, na faataitaia mai e sa Iareto o se nuu e mafai ona tamaoaiga ma tumau i le amiotonu. E foliga mai na mafai ona tumau sa Iareto i se tulaga o le amiotonu ma faamanuiaina mo le silia ma le 100 tausaga (tagai fuaiupu 15–25). Sa lava le amiotonu o le Tupu o Emera e vaai ai i le Alii (tagai fuaiupu 22). Mo se ata e faaalia ai le taamilosaga o le faamaualuga, tagai i le “O Le Taamilosaga o le Amiotonu ma le Amioleaga” i le faaopoopoga (itulau 438).

O se tasi tagata aoaoina na tusi e uiga i le ta’ua o elefane i sa Iareto ma le le toe ta’ua mulimuli ane i sa Nifae:

“Ou te manatu o se mea mataina tele i le Tusi a Mamona le ta’ua o elefane i na o sa Iareto lava, ona e leai se mafuaaga talafeagai o le a le tatau ai ona maua elefane i le seneturi lona lima e pei ona maua i le lona sefululima T.L.M. Pau lava le mea ua tatou iloa o lenei, na amata ona le toe maua i vaega tetele o Asia i se vaitaimi lava i le va o na tausaga, e pei ona i ai i le Lalolagi Fou, ina ia mulimuli i le Tusi a Mamona, ae tuua ai na o le tala tusia a tagata e molimau i lo latou ola ai i na taimi.”

I lenei lava talanoaga i elefane, na ia faamalamalama mai ai se manatu na aumai i le faamatalaga a Marco Polo o ana faigamalaga. I lenei faamatalaga na tusi ai e Marco Polo ni elememe e le foliga masani i tagata o lona lava atunuu. Ona faaaogaina lea e Hugh Nibley mataupu faavae lautele o le aafiaga a Polo i manu o le Tusi a Mamona o loo taua i le Tusi a Mamona ae le masani ai la tatou aganuu: “‘E tele la latou uamea, akaruma, ma atanikuma,’ le tala a Marco Polo i le nuu o Kobian. ‘O iinei latou te faia faaata i le sila ua matua polesi lelei, e lapopoa ma matagofie.’ O le mea e tatau ona mataituina iinei e le na o le tulaga maualuga o galuega tau sila i Asia Tutotonu, e ui lava o lena mea e pei ona tatou vaaia e taua, ao le mea moni e leai se tasi e iloa moni lava po o a akaruma ma atanikuma. Na iloa e Marco, e moni lava, ae ona o mea na le maua i Europa sa leai se upu faaitulagi sisifo mo na mea, ma pau lava le mea na mafai ona ia fai o le faaigoa i o latou lava igoa. E faapena tonu lava le kureloma ma kumoma i le Eteru 9:19. E le masani sa Nifae i nei manu, ma o lea na tuu ai e Moronae upu e le faaliliuina, a le o lena e ui ina iloa e sa Nifae, ua le oo i ai lo tatou malamalama ma o la tatou gagana e le maua ai se igoa e faaigoa ai. Ua na o ni mea fafaga o na ‘ituaiga e tele o manu e aoga mo taumafa a tagata’” (Hugh W. Nibley, Lehi in the Desert and the World of the Jaredites [1952], 217–18).

Eteru 10:5–7 ua faamatalaina le nofoaiga a le Tupu o Ripelakiso. O lana nofoaiga amioleaga ma lona toilalo na tutusa lelei lava ma le nofoaiga ma le toilalo o le Tupu amioleaga o Noa (tagai Mosaea 11). Matau uiga faaalia nei o tupu uma e lua:

Na lapatai mai Isaia, “Aua ua faaseseina lenei nuu ona o latou taitai” (Isaia 9:16; 2 Nifae 19:16). Na poloaiina e le Tupu amiotonu o Mosaea mulimuli ane lona nuu ia aua nei faia ni tupu ona “ua fai agasala tagata e toatele talu le amioletonu a o latou tupu” (Mosaea 29:31).

E ui lava i le le atoatoa o le tusi,Eteru 10 o loo tuuina mai se vaaiga i le tulaga maualuga o le nuu na olioli ai sa Iareto i le puleaga a le Tupu o Lipi. Ua tauina mai e Moronae ia i tatou nei mea e uiga i lo latou tulaga tau le tamaoaiga:

1. “Sa matua filiga i latou, ma ua latou fefaatauai mea, ma feaveai mea ina ia latou toloai oa” (fuaiupu 22).

2. “Ua latou galulue foi i maa uamea uiga eseese, ma ua latou faia auro, ma ario, ma uamea, ma apamemea, ma metale uiga eseese. … Ua latou galulue i galuega matagofie uiga eseese” (fuaiupu 23).

3. Ua ia te i latou le “silika, ma le lino miloa lelei; na latou lalaga ie uiga eseese” (fuaiupu 24).

4. “Na latou gaosia foi mea eseese e fai ai galuega, e galueaiina ai le eleele, e sua solo ma lulu, e selesele ma eli, atoa ma mea e sasa ai le saito” (fuaiupu 25).

   Ata

   Fafine o loo la’uina saito ua seleseleina

   Robert Barret, © 1986 IRI

5. “Na latou gaosia foi meafaigaluega, na latou galulue ai ma a latou manu” (fuaiupu 26).

6. “Na latou gaosia foi le auupega uiga eseese o le taua. Ma ua latou galulue foi i galuega eseese ma gaosiga matua uiga ese lava” (fuaiupu 27).

Na faaiu e Moronae i le tauina mai ia i tatou, “E le mafai ona faasili le manuia o se tasi nuu i lo latou manuia” (fuaiupu 28).