Chʼol 2
Li Xb’een K’utb’esink re laj Jose Smith
1820
Naab’aleb’ li iglees ke’wan sa’ li na’ajej wan wi’ laj Jose. Jalan jalanq xna’leb’ li junjunq aran chirix b’arwan li iglees tz’aqal yaal. Laj Jose ink’a’ kixnaw b’arwan li ch’uut chi paab’al tixjunaji wi’ rib’. A’an kiraj xnawb’al b’arwan reheb’ a’an lix tz’aqal Iglees li Jesukristo.
Sa’ jun kutan naq kaalaju chihab’ wan re laj Jose, kiril sa’ li Santil Hu naq tento toopatz’oq re li Dios sa’ xhoonalil naq wan k’a’ruhaq taqaj xnawb’al. Laj Jose kixxaqab’ sa’ xch’ool naq taatijoq ut tixpatz’ re li Dios b’arwan reheb’ li jar iglees tento tixjunaji wi’ rib’.
Sa’ jun kutan ch’ina-us naq toja’ yoo chi tiklaak li saq’ehil, laj Jose xko’o sa’ li k’iche’ nach’ wan rik’in rochoch. Kiwiq’la ut kitijok chi kaw xyaab’ xkux. Kiwan xpaab’aal naq li qaChoxahil Yuwa’ tixsume lix tij.
Laj Satanas ink’a’ kiraj naq taatijoq laj Jose. A’an kixyal xq’e chixramb’al laj Jose ut kixk’e chi aak’ab’o’k ru li kutan chixsutam. Kixuwak laj Jose ut ink’a’ chik kiru chi aatinak.
A’ut, laj Jose ink’a’ kixkanab’ tijok. Laj Satanas ink’a’ kiru chixminb’al ru re naq ink’a’ taatijoq.
Toja’ naq laj Jose kiril jun li k’utb’esinb’il matk’. Kiril jun ch’ina-usil saqen q’axal nalemtz’un ru li kik’utun chixsutam. Kiril li qaChoxahil Yuwa’ ut li Jesukristo xaxqookeb’ chi kutankil sa’ xb’een. Li qaChoxahil Yuwa’ kixk’ut chi ruq’ li Jesus ut kixye, “A’in li Walal Raaro Inb’aan. Chawab’i a’an!”
Laj Jose kixpatz’ re li Jesus b’arwan reheb’ li jar ch’uut chi paab’al tixjunaji wi’ rib’. Li Jesus kixye re laj Jose naq maajun reheb’ tixjunaji wi’ rib’ xb’aan naq sachenaqeb’ chijxunileb’. Maajun reheb’ a’an lix Iglees. Kixye re laj Jose naab’al chik chi k’a’ re ru. Toja’ naq kiraqe’ li k’utb’esinb’il matk’.
Naq kiwulak sa’ rochoch laj Jose, lix na’ kixpatz’ re k’a’ru reek’. Kichaq’ok laj Jose ut kixye naq sa wan. Toja’ naq kixye re lix na’ naq rilom chaq jun k’utb’esinb’il matk’. Kixye re li k’a’ru kixtzol sa’ lix k’utb’esinb’il matk’.
Laj Jose kixye resil lix k’utb’esinb’il matk’ reheb’ junjunqeb’ sa’ k’aleb’aal. Ink’a’ ke’xpaab’ li raatin laj Jose. Ke’xye naq tik’ti’ naxye, ut ke’josq’o’ ut ke’xrahob’tesi.
Laj Jose junelik kixye li yaal chirix lix k’utb’esinb’il matk’. A’an kixnaw naq kirileb’ chaq li Choxahil Yuwa’b’ej ut li Jesukristo. Kixnaw naq maajun reheb’ li jar ch’uut chi paab’aal sa’ xb’een li ruchich’och’ tz’aqal yaal.