Chʼol 3
Li anjel Moroni ut eb’ li perel ch’iich’ oor
1823–1827
Kinume’ oxib’ chihab’ chirix li Xb’een K’utb’esink re laj Jose. Naq wuqlaju chihab’ xyu’am, laj Jose kiraj xnawb’al li k’a’ru naraj li Dios naq tixb’aanu. Sa’ jun q’ojyin laj Jose kitijok chirix a’in. Kiwan xpaab’aal naq li Dios tixye re li k’a’ru tixb’aanu.
Laj Jose kiril jun li saqen q’axal nalemtz’un sa’ lix warib’aal. Xaqxo jun li anjel sa’ li saqen. Q’axal nim xlemtz’unkil li ru li anjel. Jutju sa’ jun ch’ina-usil b’aatal saq ru.
Li anjel kixye naq a’an laj Moroni xk’ab’a’. Taqlanb’il xb’aan li Dios re aatinak rik’in laj Jose. Laj Moroni kixye naq li Dios wan jun li k’anjel choq’ re laj Jose.
Li anjel Moroni kixye resil jun li hu re laj Jose. Li hu naxye resil li ani ke’wan najter sa’ li ch’och’ America. Li Jesukristo kik’ulun sa’ xyanqeb’ li tenamit a’in ut kixk’ut lix evangelio chiruheb’.
Laj Moroni kixye naq tz’iib’anb’il li hu chiruheb’ perel ch’iich’ oor. Tz’iib’anb’il sa’ jun li aatinob’aal li ink’a’ chik nanawman ru anajwan. Li Dios kiraj naq laj Jose tixjaltesi ru li hu a’in toj sa’ ingles.
Li anjel Moroni kixye naq muqmuukeb’ sa’ ch’och’ li perel ch’iich’ oor sa’ jun li tzuul nach’ rik’in li rochoch laj Jose. Laj Moroni kixye naq wiib’ li pek, li Urim ut Tumim nayeeman reheb’, k’uulanb’ileb’ rochb’eeneb’ li perel ch’iich’. Eb’ li pek te’xtenq’a laj Jose chixjaltesinkil ru li hu. Naq yoo chi aatinak laj Moroni, laj Jose kiril jun k’utb’esinb’il matk’ sa’ wi’ kik’ute’ chiru li na’ajej muqmuukeb’ wi’ li perel ch’iich’.
Laj Moroni kixye ajwi’ re laj Jose resil laj Elias, jun nimla profeet li kiwan najter. Li esilal chirix laj Elias natawman sa’ li Najter Chaq’rab’.
Laj Moroni kixye naq laj Elias taachalq ut tixk’ojob’ wi’chik li xnimal ru wankilal re li tijonelil sa’ ruchich’och’. Rik’in li wankilal a’in eb’ li junkab’al te’ruuq te’tz’ape’q sa’ junajil sa’ li santil ochoch choq’ re li junelik q’e kutan.
Xko’o li anjel Moroni, toja’ naq kixk’ut rib’ wiib’ sut chik sa’ li q’ojyin a’an. A’an kixye naab’al na’leb’ re laj Jose rajlal sut, toja’ naq xko’o naq saqewk re li kutan. Laj Jose kiwakli chaq sa’ ch’aat ut xko’o chi k’anjelak rik’in lix yuwa’ sa’ xch’och’.
Ink’a’ kiru chi k’anjelak laj Jose xb’aan naq oso’jenaq xmetz’ew, jo’kan naq lix yuwa’ kixtaqla sa’ kab’l. Naq xik re sa’ kab’l, kit’ane’ chi ch’och’. Toja’ naq laj Moroni kixk’ut wi’chik rib’ chiru ut kixseraq’i wi’chik chixjunil li ak kixye sa’ li q’ojyin xnume’. Chirix naq xko’o laj Moroni, laj Jose kixye re lix yuwa’ li k’a’ru kik’ute’ chiru xb’aan laj Moroni. Lix yuwa’ laj Jose kixpaab’ li raatin. A’an kixnaw naq taqlanb’il laj Moroni xb’aan li Dios, ut kixye re laj Jose naq taa’ab’inq chiru.
Laj Jose xko’o sa’ li tzuul muqmuukeb’ wi’ li perel ch’iich’ oor. Kixtaweb’ li perel hu sa’ jun li kaxon pek chirub’el jun nimla pek. Li Urim ut Tumim wankeb’ ajwi’ chi sa’ li kaxon pek.
Naq wan sa’ li tzuul laj Jose, kichal li anjel Moroni rik’in. Laj Moroni maji’ kixkanab’ laj Jose chixk’ulb’aleb’ li perel ch’iich’ oor. Kixye re laj Jose naq taachalq sa’ li tzuul sa’ tz’aqal kutan a’an chiru kaahib’ chihab’.
Laj Jose ki’ab’in chiru laj Moroni ut xko’o sa’ li Tzuul Kumorah rajlal chihab’. Aran laj Moroni kixtzol laj Jose chirix li rawa’b’ejihom li Qaawa’ sa’ ruchich’och’.
Neb’a’ lix junkab’al laj Jose Smith ut tumin ke’raj. Laj Jose kiraj xtenq’ankil lix junkab’al, jo’kan naq xko’o sa’ li estado Pennsylvania re trab’ajik. Kikana sa’ rochoch jun li winq, Qawa’ Hale xk’ab’a’.
Wan xrab’in li Qawa’ Hale, a’an li xEmma xk’ab’a’. Laj Jose ut li xEmma ke’xra rib’, ut chirix xnumik junjunq kutan ke’sumla. Toja’ naq ke’sutq’i rik’in lix junkab’al laj Jose sa’ Nueva York, b’ar wi’ laj Jose kixtenq’a lix yuwa’ sa’ xch’och’.
Chirix xnumik junjunq po lix sumlajik laj Jose ut li xEmma, laj Jose xko’o wi’chik sa’ li Tzuul Kumorah. Numenaq kaahib’ chihab’ chalen chaq naq laj Jose xb’een kirileb’ li perel ch’iich’ oor, ut sa’ li hoonal a’in laj Moroni kixkanab’ laj Jose chixk’ulb’aleb’. Laj Moroni kixye re laj Jose naq tixk’uulaheb’ chi us li perel ch’iich’.
Naab’aleb’ ke’rab’i resil naq laj Jose kixk’uleb’ li perel ch’iich’ oor. Ke’xyal xq’e chixmaq’b’aleb’ li perel ch’iich’ chiru, a’b’anan a’an kixmuqeb’ b’ar ink’a’ te’tawmanq. Li Dios kixtenq’a laj Jose chixk’uulaninkileb’ chi us li perel ch’iich’ oor.
Eb’ li wankeb’ sa’ li na’ajej a’an ke’xyoob’ li ch’a’ajkilal choq’ re laj Jose. Ke’tik’ti’i chirix a’an ut lix junkab’al.
K’a’jo’ xnimal li ch’a’ajkilal, jo’kan naq laj Jose ut li xEmma ke’xk’ulub’a xch’ooleb’ naq te’sutq’iiq Pennsylvania, b’ar laj Jose kiroyb’eni xyoob’ankil xjaletsinkil ruheb’ li perel ch’iich’ sa’ tuqtuukilal. Jun li winq, laj Martin Harris xk’ab’a’, kiwan rochoch nach’ rik’in laj Jose. Q’un xch’ool ut kixtenq’aheb’ laj Jose ut li xEmma rik’in tumin re te’q’axonq.