Chʼol 26
Li oxib’ chi aw’ab’ejihom re li choxa
16 xb’e li po febrero re 1832
Sa’ jun kutan laj Jose Smith ut laj Sidney Rigdon yookeb’ chirilb’al ru li Ak’ Chaq’rab’. Li Ak’ Chaq’rab’ kixye naq li ani chaab’il xch’ool taaxik sa’ choxa chirix naq waklijenaqeb’ chi yo’yo. Laj Jose kiraj xnawb’al ma juntaq’eet li na’ajej neke’xik wi’ chixjunileb’ li kristiaan.
Tzolʼlebʼ ut Sumwank 76, xtiklajik li tasal
Naq laj Jose ut laj Sidney yookeb’ chi k’oxlak chirix a’in, li qaChoxahil Yuwa’ kixk’e reheb’ jun chaq’al ru k’utb’esinb’il matk’. Sa’ li k’utb’esinb’il matk’ a’in ke’ril li choxa. Ke’ril li qaChoxahil Yuwa’ ut li Jesus sutsuukeb’ xb’aan li saqen. Chirix a’an ke’rileb li anjel yookeb’ chixloq’oninkileb’ ru li qaChoxahil Yuwa’ ut li Jesus.
Tzolʼlebʼ ut Sumwank 76, xtiklajik li tasal
Naq laj Jose ut laj Sidney ke’tz’iib’ak chirix li k’utb’esinb’il matk’ a’in, ke’xch’olob’ xyaalal naq yo’yo li Jesus. Ke’ril ru! Ut ke’rab’i jun xyaab’ kuxej li kixye naq a’an li Ralal li Dios. Li xyaab’ kuxej a’an kixye ajwi’ reheb’ naq li Jesus kichal sa’ ruchich’och’ re naq chixjunil te’ruuq te’sutq’iiq wi’chik rik’in li qaChoxahil Yuwa’.
Chirix a’an, laj Jose ut laj Sidney ke’ril li na’ajej neke’xik wi’ li kristiaan naq ak waklijenaqeb’ chi yo’yo. Wankeb’ oxib’eb’ li na’ajej, malaj awa’b’ejihom, b’ar wi’ te’wanq li kristiaan sa’ choxa. Eb’ laj Santil Paab’anel li tiikeb’ xch’ool te’xik sa’ li choxahil awa’b’ejihom chirix naq waklijenaqeb’ chi yo’yo. Li choxahil awa’b’ejihom a’an li na’ajej wankeb’ wi’ li qaChoxahil Yuwa’ ut li Jesus.
Eb’ li ani li te’wanq sa’ li choxahil awa’b’ejihom ke’xpaab’ li Jesukristo naq wankeb’ sa’ ruchich’och’. Ke’kub’e xha’ ut ke’xk’ul li Santil Musiq’ej.
Eb’ li ani li te’wanq sa’ li choxahil awa’b’ejihom ke’yale’ rix naab’al sut naq wankeb’ sa’ ruchich’och’, a’ut ke’numta sa’ xb’een li yalb’a-ix rik’in xpaab’aaleb’ chirix li Jesukristo. Ke’xyal xq’e chi ab’ink chiruheb’ lix taqlahom li Dios, ut ke’xjal xk’a’uxl chirix naq ink’a’ ke’ab’in.
Eb’ laj Santil Paab’anel li tiikeb’ xch’ool te’ok jo’ chanru li qaChoxahil Yuwa’ ut li Jesus. Reheb’ a’an chixjunileb’ li k’a’aq re ru. Te’wanq chiru rilob’aal li qaChoxahil Yuwa’ ut li Jesus chi junelik q’e kutan.
Chirix a’an laj Jose ut laj Sidney ke’ril li terrestil awa’b’ejihom re choxa.
Eb’ li ani li te’wanq sa’ li terrestil awa’b’ejihom chaab’ileb’ chaq sa’ ruchich’och’, a’b’anan ke’b’alaq’iik xb’aaneb’ li maa’us aj kristiaan. Ke’ab’in chiru junjunqeb’ li taqlahom, a’ut moko kaweb’ ta xch’ool rik’in xnawomeb’ xch’ool chirix li Jesus.
Sa’ li terrestil awa’b’ejihom te’wanq ajwi’ li ani ink’a’ ke’xpaab’ li evangelio naq ke’rab’i sa’ ruchich’och’ ut ke’xpaab’ chirix naq kamenaq.
Eb’ li ani li te’wanq sa’ li terrestil awa’b’ejihom te’ril li Jesus. A’b’anan ink’a’ te’ruuq te’wanq rik’in li qaChoxahil Yuwa’ ut li Jesus.
Chirix a’an laj Jose ut laj Sidney ke’ril li teleestil awa’b’ejihom re choxa. Eb’ li ani li te’xik sa’ li teleestil awa’b’ejihom moko tiikeb’ ta xch’ool sa’ ruchich’och’.
Eb’ li kristiaan a’in ink’a’ ke’xpaab’ li Jesus chi moko lix evangelio. Ink’a’ ke’xpaab’eb’ li profeet ut ink’a’ ke’ab’in chiruheb’ lix taqlahom li Dios.
Eb’ li ani li te’wanq sa’ li teleestil awa’b’ejihom ink’a’ te’ril li Jesus chi moko li qaChoxahil Yuwa’ ut ink’a’ te’ruuq chi wank rik’ineb’. A’b’anan, eb’ li anjel te’rula’aniheb’ li kristiaan a’in, ut li Santil Musiq’ej tixtzoleb’.
Eb’ li ani li te’wanq sa’ li choxahil ut terrestil awa’b’ejihom te’wakliiq chi yo’yo naq li Jesus taak’ulunq wi’chik sa’ ruchich’och’. Eb’ li ani li te’xik sa’ li teleestil awa’b’ejihom ink’a’ te’wakliiq chi yo’yo toj reetal naq ak numenaq 1,000 chihab’ xk’ulunik li Jesus sa’ ruchich’och’.
Sa’ li k’utb’esinb’il matk’ a’in, laj Jose ut laj Sidney ke’ril ajwi’ li na’ajej te’xik wi’ li ani q’axaleb’ aj maak. Te’wanq rik’in laj Satanas. Ink’a’ te’ruuq te’wanq rik’in li qaChoxahil Yuwa’, li Jesus, chi moko li Santil Musiq’ej.
Eb’ li ani li te’wanq rik’in laj Satanas ke’tzolok chirix li Jesus ut lix evangelio naq wankeb’ sa’ ruchich’och’. Li Santil Musiq’ej kixch’olob’ xyaalal li Jesukristo chiruheb’. Ke’xnaw naq yo’yo chaq ut naq kikam sa’ qak’ab’a’.
A’b’anan q’axal xuwajel li k’a’ru ke’xb’aanu li kristiaan a’in. Ke’xtz’eqtaana li yaal ut ke’xyal ru lix wankil li Dios. Ke’xtz’eqtaana li Santil Musiq’ej. Ke’xye naq ink’a’ chik neke’xpaab’ li Jesus. Eb’ li kristiaan a’in te’xk’ul li rahilal maak’a’ roso’jik.
Laj Jose ut laj Sidney ke’ril xkomon chik li na’leb’ sa’ lix k’utb’esinb’il matk’, a’b’anan li Jesus kixye reheb’ naq me’xtz’iib’a chixjunil li ke’ril. Rik’in lix wankil li Santil Musiq’ej, eb’ laj Santil Paab’anel li tiikeb’ xch’ool te’ruuq chirilb’al ut chixnawb’al li k’a’aq re ru a’in xjuneseb’ rib’. Laj Jose ut laj Sidney ke’xb’antioxi re li Dios li chaq’al ru k’utb’esinb’il na’leb’ a’in.