Ch’ol 20
Eb’ li maatan re li Musiq’ej
8 xb’e li po marzo re 1831
Laj Jose Smith kixk’ul k’iila k’utb’esinb’il na’leb’ li neke’k’utuk chirix li Santil Musiq’ej. Li Santil Musiq’ej a’an jun musiq’ej li naxtenq’a li qaChoxahil Yuwa’ ut li Jesus. Maak’a’ lix junxaqalil tib’ ut b’aq okenaq chaq li Santil Musiq’ej.
Rik’in lix wankil li Santil Musiq’ej, li Dios naxk’eheb’ chaq’al ru maatan reheb’ li komon sa’ li Iglees. A’aneb’ a’in li maatan re li Musiq’ej nayeeman reheb’, malaj li musiq’ejil maatan. Wan jun malaj xkomon chik li maatan re li Musiq’ej reheb’ chixjunjunqaleb’ laj Santil Paab’anel. Eb’ li komon sa’ li Iglees tento te’tzoloq chirixeb’ lix maatan ut tento te’roksiheb’ re xtenq’ankil rib’ chirib’ileb’ rib’. Li Jesus kixye re laj Jose Smith k’a’ruheb’ li maatan a’in.
K’eeb’il reheb’ junjunqeb’ laj Santil Paab’anel li maatan re xnawb’al naq li Jesukristo a’an li Ralal li Dios. Neke’xnaw naq kikam sa’ qak’ab’a’. K’eeb’il reheb’ jalaneb’ laj Santil Paab’anel li maatan re xk’eeb’al reetal ut xpaab’ankil lix tz’aqal ch’olob’ahom jalaneb’ chik chirix li Jesukristo.
K’eeb’il reheb’ junjunqeb’ laj Santil Paab’anel li maatan re jolomink.
K’eeb’il reheb’ junjunqeb’ laj Santil Paab’anel li maatan re xtz’ilb’aleb’ rix li musiq’ej, ma tiikeb’ malaj moko useb’ ta. Eb’ li musiq’ej li tiikeb’ raam taqlanb’ileb’ xb’aan li Dios ut nokohe’xk’e chi saho’k. Eb’ li maa’us aj musiq’ej taqlanb’ileb’ xb’aan laj Satanas ut neke’xk’am jun rahil eek’ahom.
K’eeb’il reheb’ junjunqeb’ laj Santil Paab’anel li maatan re chaab’il na’leb’. Li maatan a’in naxtenq’aheb’ chixsik’b’al li us ut roksinkil chi chaab’il li na’leb’ k’eeb’il reheb’ xb’aan li Dios. K’eeb’il reheb’ junjunqeb’ laj Santil Paab’anel li maatan re li nawom. Eb’ li neke’xk’ul li maatan a’in tento te’xtzoleb’ jalaneb’ ut te’xtenq’aheb’ chixsik’b’al li chaab’il na’leb’ ut b’aanuhom.
K’eeb’il reheb’ junjunqeb’ laj Santil Paab’anel li maatan re te’k’irtesiiq. K’eeb’il reheb’ jalaneb’ li maatan re xk’irtesinkileb’ li yaj. Li Santil Musiq’ej naxk’e reheb’ junjunqeb’ laj Santil Paab’anel li maatan re xk’anjelankil li sachb’a-ch’oolej. Eb’ li sachb’a-ch’oolej neke’xk’utb’esi lix wankil li Dios.
K’eeb’il reheb’ junjunqeb’ laj Santil Paab’anel li maatan re aatinak sa’ jalanil aatinob’aal li ink’a’ nawb’il ru xb’aaneb’.
K’eeb’il reheb’ junjunqeb’ laj Santil Paab’anel li maatan re aatinak jo’ profeet. Li maatan a’in naxtenq’aheb’ xnawb’al ut xtawb’al ru li k’a’ru kik’ulman najter, li k’a’ru yoo chi k’ulmank anajwan, ut li k’a’ru toj taak’ulmanq.
K’eeb’il reheb’ junjunqeb’ laj Santil Paab’anel naab’al li maatan. Chixjunil laj Santil Paab’anel tento te’roksiheb’ lix maatan re xtenq’ankil ut rosob’tesinkil li jun ch’ol chik.
Li obiisp taaruuq tixnaw k’a’ruhaq xmaatan li junjunq laj Santil Paab’anel. A’an naxnaw ani chaab’ilaq choq’ aj k’utunel. A’an naxnaw b’arwan reheb’ laj Santil Paab’anel li neke’xra li Dios ut neke’ab’in chiruheb’ li taqlahom.
Eb’ laj Santil Paab’anel li tiikeb’ xch’ool tento te’k’anjelaq ut te’tijoq re taak’eemanq reheb’ li maatan ajb’il ru xb’aaneb’. Chixjunileb’ li maatan a’in neke’chal rik’in li Dios.