Chʼol 57
Nakamsiik li Profeet
Junio re 1844
Eb’ li ch’uut chi aj rahob’tesinel ke’josq’o’ rik’in naq ki’ach’ab’aak laj Jose Smith. Ke’xyeechi’i naq te’xpleeti Nauvoo. Ke’xyeechi’i ajwi’ naq te’xb’on li tiqwal q’ol ut te’xk’e rismal li kaxlan chiru xtib’el laj raqol aatin. Laj Jose kixpatz’ re li awa’b’ej re Illinois naq tixrameb’ li ch’uut chi aj rahob’tesinel, a’b’anan li awa’b’ej kixpaab’eb’ lix tik’ti’ li ch’uut ut ink’a’ kitenq’an.
Laj Jose Smith kixnaw naq maare taatz’ape’q wi’chik sa’ tz’alam, ut kixuwak naq li ras laj Hyrum taatz’ape’q ajwi’ sa’ tz’alam. Laj Jose kixye re laj Hyrum naq tixk’am xjunkab’al ut te’xik sa’ jalan chik li tenamit, a’b’anan laj Hyrum ink’a’ kiraj xkanab’ankil li riitz’in.
Laj Jose Smith kireek’a sa’ raam naq wi a’an ut li ras ink’a’ te’elq chaq Nauvoo, eb’ li ch’uut chi aj rahob’tesinel te’xrahob’tesiheb’ laj Santil Paab’anel. Ke’xk’ulub’a xch’ooleb’ naq te’xik toj chixjunpak’al li nima’ ut te’xmuq rib’. Toja’ naq te’b’eeq sa’ xjayal li rokeb’aal saq’e re xtawb’al jalan chik li na’ajej choq’ reheb’ li komon sa’ li Iglees.
Ke’wan junjunqeb’ li ke’xk’oxla naq yoo chi eelelik laj Jose Smith xb’aan naq naxuwak. Li xEmma Smith, li rixaqil laj Jose, kixtaqlaheb’ junjunqeb’ li ramiiw re xtawb’al ut xpatz’b’al re naq taasutq’iiq. Laj Jose kixk’oxla naq taakamsiiq wi taasutq’iiq Nauvoo, a’b’an kixb’aanu li ke’raj li ramiiw.
Jun kutan chirix lix sutq’ijik laj Jose ut laj Hyrum sa’ Nauvoo, eb’ a’an rochb’eeneb’ xkomon chik laj jolominel re li tenamit xkoheb’ Carthage, jun tenamit 30 kiloom tana’ xnajtil. Sa’ Carthage ke’chape’ xb’aaneb’ li aatin tik’ti’, ut laj Jose, laj Hyrum, ut junjunq chik li ramiiw ke’tz’ape’ sa’ tz’alam toj reetal taaruuq taaraqmanq aatin chirixeb’.
Chiru oxib’ kutan ke’kana sa’ tz’alam laj Jose, laj Hyrum, ut eb’ li ramiiw. Chiru li hoonal a’in, eb’ li ch’uut chi aj rahob’tesinel ke’xyeechi’i li rahilal reheb’ ut ke’xye li yib’ ruhil aatin reheb’. Naq wan sa’ tz’alam, laj Jose ut eb’ li ramiiw ke’tijok ut ke’ril ru lix Hu laj Mormon. Laj John Taylor kixb’icha jun reheb’ li b’ich chirix li Jesus li q’axal nawulak chiru laj Jose.
Chiru li kutan re li 27 xb’e li po junio re 1844, ka’ajwi’ laj Jose, laj Hyrum, laj John Taylor, ut laj Willard Richards toj wankeb’ sa’ li tz’alam sa’ Carthage. Sa’ oob’ hoonal tana’ re li ewu, jun ch’uut chi aj rahob’tesinel, numenaq 100 rajlankileb’ li winq chi sa’, ke’ok sa’ li tz’alam. Junjunq reheb’ li ch’uut ke’xpuub’aheb’ li rilob’aal li kab’l, ut jalaneb’ chik ke’xnumsi laj k’aak’alenel ut ke’xyal ok sa’ li na’ajej wankeb’ wi’ laj Jose ut eb’ li ramiiw.
Laj Jose ut eb’ li ramiiw ke’xyal xramb’al li okeb’aal re naq tz’aptz’o taakanaaq, a’b’anan k’a’jo’ xk’ihaleb’ li winq ut ink’a’ ke’ru chixkolb’aleb’ rib’. Li ch’uut chi aj rahob’tesinel ke’xte li okeb’aal ut ke’xpuub’a laj Hyrum Smith. Naq laj Jose kiril naq kamenaq laj Hyrum, kixjap re ut kixye, “Ay, at raarookil was laj Hyrum!” Li ch’uut ke’xpuub’a ajwi’ laj John Taylor, li kixk’ul jun xuwajel toch’olal a’b’an ink’a’ kikamsiik. Ink’a’ ke’xpuub’a laj Willard Richards.
Chirix naq ke’puub’aak laj Hyrum ut laj John Taylor, laj Jose Smith xko’o sa’ li rilob’aal li kab’l. Aran wiib’ sut kipuub’aak xb’aaneb’ li winq sa’ li rokeb’aal li na’ajej ut jun sut chik xb’aan junaq chirix kab’l. Kixjap re ut kixye, “At Qaawa’ lin Dios!” ut kit’ane’ chi ch’och’ sa’ rilob’aal li kab’l. Kamenaq li Profeet. Kixk’e lix yu’am choq’ re lix evangelio li Jesukristo.
Lix tib’eleb’ laj Jose ut laj Hyrum Smith ke’k’ame’ toj sa’ Nauvoo, b’ar ke’muqe’. Ke’raho’ xch’ool lix junkab’al ut li komon sa’ li Iglees.
Nim xwankil li k’anjel kixb’aanu li Profeet aj Jose Smith. Kixjaltesi ru lix Hu laj Mormon. Li Jesus kixk’ojob’ wi’chik lix Iglees rik’in. Laj Jose Smith kixtaqlaheb’ laj k’amol aatin sa’ jalaneb’ ch’och’ re xk’utb’al li evangelio. Kixb’eresiheb’ laj Santil Paab’anel sa’ xyiib’ankil jun chaq’al ru tenamit. Li Dios kixra laj Jose Smith. Eb’ laj Santil Paab’anel ke’xra ajwi’. Q’axal wi’chik kixb’aanu laj Jose Smith choq’ re li qajunelikil kolb’al chiru yalaq ani chik, ka’ajwi’ li Jesukristo naq’axok re.