Chʼol 64
Eb’ laj Santil Paab’anel sa’eb’ li Tzuul Rocky
Xtiklajik li po julio re 1847
Eb’ laj tehol b’e ke’xtikib’ xyiib’ankil jun li tenamit sa’ li nimla ru taq’a Lago Salado. Lago Salado ke’xke’ choq’ xk’ab’a’. Laj Brigham Young kixsik’ ru jun li na’ajej choq’ re xyiib’ankil li santil ochoch.
Laj Brigham Young ut xkomoneb’ chik aj jolominel ke’xk’uub’ chanru taayiib’amanq li tenamit. Li junjunq chi junkab’al kik’ehe’ reheb’ ch’och’ choq’ re jun li ochoch ut jun li hacieent. Eb’ laj tehol b’e ke’xkab’laheb’ ochoch re yok’b’il toon che’ ut ke’raw li iyaj. Ke’xnaw naq ajb’il ru li paab’ank chi numtajenaq ut li k’anjelak chi kaw re kanaak arin, a’b’an ke’xpaab’ naq te’ruuq chixb’aanunkil rik’in xtenq’ankil li Dios.
Laj Brigham Young kixjach ru li tenamit sa’ oob’ li teep, ut li kristiaan ke’ok chixyiib’ankil li ch’utleb’aal. Naq xkomoneb’ chik laj tehol b’e ke’b’eek chiru li helhookil ch’och’ ut ke’wulak sa’ li ru taq’a, ke’tuqub’aak xkomeneb’ chik li teep.
Eb’ laj tehol b’e ke’xtikib’ jun li tzoleb’aal. Juntaq’eet li kab’l ke’b’aanuman wi’ li tzoleb’aal ut eb’ li ch’utam re li Iglees. Moqon kitikib’aman li Dominkil Tzoleb’aal.
Laj Brigham Young kixtaqlaheb’ laj k’amol aatin sa’ jalaneb’ li tenamit chixjunpak’al li nimla palaw. K’iila mil li chalenaqeb’ sa’ naab’al li tenamit ke’xjunaji rib’ rik’in li Iglees.
Ki’eek’asiik xch’ooleb’ naab’al reheb’ li ani ke’xjunaji rib’ rik’in li Iglees naq te’xch’utub’ rib’ rik’ineb’ laj Santil Paab’anel sa’ li nimla ru taq’a Lago Salado. Q’axal ninqeb’ lix mayej rik’in naq ke’xkanab’ li rochoch, ke’xq’ax ru li nimla palaw, ut ke’b’eek chiru li ch’och’ America toj li ru taq’a Lago Salado.
Lix k’ihaleb’ laj tehol b’e ke’b’eek chiru li helhookil ch’och’ rik’in li b’eleb’aal, li kelonb’ileb’ xb’aan li xul. Jalaneb’ chik maak’a’eb’ xtumin re xloq’b’al li b’eleb’aal chi moko li xul. Jo’kan naq ke’xyiib’ kok’ b’eleb’aal rik’in wiib’ ajwi’ li laant. Eb’ laj tehol b’e ke’xk’e chixjunil li k’a’ru wan reheb’ sa’eb’ li kok’ b’eleb’aal, toja’ naq ke’xkeloheb’ li kok’ b’eleb’aal chiru li helhookil ch’och’. Q’axal ch’a’aj li k’anjel re xq’axb’al li helhookil ch’och’. Junjunq reheb’ ke’yajer ut ke’kam.
Laj Brigham Young a’an jun aj jolominel chaab’il xna’leb’. A’an kixtaqlaheb’ laj Santil Paab’anel re xyiib’ankil li k’aleb’aal sa’ jar paay chi na’ajej sa’ li ch’och’ sa’ xjayal li roqeb’aal saq’e. Junjunq reheb’ li na’ajej a’in a’aneb’ Idaho, Wyoming, Arizona, ut California.
Naab’aleb’ xyalb’al rix laj Santil Paab’anel. Wan naq ink’a’ te’ruuchini li iyaj xb’aan naq numtajenaq li ke malaj jwal tik ut ke’chaqik. Wan naq li kok’ xul te’xk’ux li iyaj. A’b’an eb’ laj Santil Paab’anel ke’tijok ut ke’wan xpaab’aaleb’, ut li Dios kixtenq’aheb’ chixnumsinkil lix yalb’aleb’ rix.
Ke’wan junjunqeb’ laj ral ch’och’ sa’ xweent li na’ajej a’an naq ke’wulak laj Santil Paab’anel. Wan naq kiwakli li ch’a’ajkilal sa’ xyanqeb’ laj Santil Paab’anel ut laj ral ch’och’. Laj Brigham Young kixye reheb’ laj Santil Paab’anel naq q’unaqeb’ xch’ool. Naab’al reheb’ laj ral ch’och’ ke’ok choq’ ramiiweb’, ut junjunq reheb’ ke’ok choq’ komon sa’ li Iglees.
Eb’ laj Santil Paab’anel ke’ok chixyiib’ankileb’ santil ochoch, jo’ chanru ak ke’xb’aanu chaq sa’ Kirtland ut Nauvoo. Sa’ 1853 ke’xtikib’ xyiib’ankil jun li santil ochoch sa’ Lago Salado. Ke’k’anjelak chiru 40 chihab’ re xyiib’ankil. Ke’xyiib’ jalaneb’ chik li santil ochoch sa’eb’ li tenamit St. Geore, Logan, ut Manti rub’elaj naq kitz’aqlo ru li Santil Ochoch re Lago Salado.